شارو هامبورگو ئەڵمانیاینە، جە دژو هەوڵەکا کوشتەی، دەسدرێژیکەردەی، بڕفانای و دەس سەرەگێرتەی هێزەکا سەر بە هەتەشەی جە دژو عەلەوییەکا جە سووریانە ڕاپیما ئەنجامدریا.

نوێنەرو ئەرەمەزیاکا عەلەوی و پارتە سیاسیەکا جە یۆنگفێرستیگو هامبورگینە گلێرێ بیێ. نوێنەرەکێ جە چالاکی شەرمەزارکەردەکەینە دەستنیشانشاکەرد ئا گەلا کە سووریانە مژیوا ئینێ چێرو هەڕەشێ کۆمکوژیینە و جەختشا جە گرنگی یۆگێرتەی و هامپشتی گەلا سووریای کەردۆ.

چالاکییەکەنە پەرلەمانتارو هامبورگی پارتو چەپی، جانسو ئۆزەدەمیر قسێش کەردێ و ئاماژەش پانەیەدا کورد ساڵانێوەن پەی ئازادی بییەو وێش ئینا ئەرەکۆشاینە و واتش: سەرەڕاو ئانەی گرڏو جەهانی شاهیدی مڏرامانو کۆبانێ کوردا بێنێ جە دژو تیرۆری، بەڵام هەڵای دان بە ستاتۆیو کوردارە نەنریان. پەنەوازا دان با ئیدارەیرە بنیۆ. واتش 'با کوردێ چەک بنیارە' بە شێووە ئاشکرا ڕا پەی کۆمکوژی مکەراوە. ژەنی ژیوای ئازادی بە تەنیا درووشمێوە نییا، بەڵکوم پەی ئەرەکۆشای ژەنا جەهانی بییەن بە سەرچەمە."

نوێنەرو سوریانیەکاش جە چالاکییەکەنە قسێش کەردێ و ئاماژەش پانەیەدا گەلا سووریای وەڵتەرێ دوچارو کۆمکوژی بیێنێ و واتش: "دەسەڵاتو تنڕەوی ئیسلامی بە هرووژمکەردەی کەمەنەتەوەیییەکا گەرەکشا دمای بە فرەچەشنی پێوەرە ژیوای گەلا سووریای بارۆنە."

ئا نوێنەرەی سەرو نامێ مییانکەو عەلەوەییەکا هامبۆرگی قسێش کەردەو،باسش چانەیە کەرد گەلا سووریای جە دیکتاتۆرێوە ڕزگارشا بی، بەڵام دیکتاتۆرێوە تەر ڕاس بییەنۆ. ئا نوێنەرە ئاماژەش پانەیەدا جە دژو عەلەوییەکا سووریای هرووژمێوە دەسش پنە کەردەن و گەلو عەلەوی کۆمکوژێ کریانە و ناچار بە هۆرئامای جە سووریانە کریێنێ.

دماو تەمام بییەی وتارەکا ڕاپیماکەی تا وەردەمو پەڕلەمانو هامبورگی بەردەوامیش بێ، بێ مردای درووشمەکا "بژیو مڏرامانو وەرنیشتی"، "ژەنی ژیوای ئازادی" و "بژیو هامپشتی نەتەوەیی" واتشاوە