تۆڕۊو مافەکا مرۆڤو کوردەسانی سەبارەت بە هەڕەشەکەردەی وەزارەتو ئیتلاعاتو ئێرانی جە بنەیانەو وریشە مورادیۍ زینانییەی سیاسییەو کوردی جە زینانو ئەوینی ئەرەیاۋناش: "جە ٨و حوزەیرانو ئېساڵیوە چڼین جارۍ ئەنداماو بنەیانەو وریشە مورادیۍ چڕیێنۍ پەی بنکەکا وەزارەتو ئیتلاعاتو سنەی و تارانی و هەڕەشۍ باڵبەسکەردەیشا ۋنە کریان."

ئاماژەش پانەی کریان جە درێژەو هەڕەشەکانە کەسێوە نزیکو بنەیانەو وریشە مورادیۍ بالبەس کریان و ئامان: "کەریم ئەسغەری خەڵکو مەحاڵەو شوێشەو سنەو ۋەرکۊتوو کوردەسانین و هامژینو واڵەکۍ وریشە مورادیێن جە لایەنو هێزەکا وەزارەتو ئیتلاعاتو ئێرانیوە باڵبەس کریا و پەی شۊنەمێوە نادیاری فاڕیانۆ."

ئاماژەیچ پانەی کریان کەریم ئەسغەری بەبێ ئەمرەو دادوەری و بە بەکارئاوردەی تنوتیژی جە دووکانەکەشەنە باڵبەس کریان، هەرپاسە هەڕەشۍ جە واڵەکۍ وریشە مورادیۍ بە نامۍ مێهرانە مورادیۍ کریان. کە هامژینەو ئەسغەرینە.

یاگۍ ئاماژەیەنە، جە ١٧و حوزەیرانو ٢٠٢٤، وریشە مورادیە جە لقو ١٥و دادگاو شۆڕشو تارانی بە سەرۆکایەتی دادوەر ئەبولقاسم سەڵەواتی بە تۆمەتۊو “یاخیبیەی” تۆمەتبارە کریا و جە ١٠و تشرینو دووەمو ٢٠٢٤ ینە سزاو جە قەنارەدایش سەرەرە سەپیا.