بنویسوو ڕۆمانەو "مەولە"ی: 'ئیسە خجڵوو نویستەی ڕوٙمانێوە تەریٛنا بە نامیٛ: "گیٛجاوەو ژیوای" و هەتا ئیسە ٢٥٠ لاپەلێم چەنە نویستیٛنە، تاوو واچوو بڕێوە خاستەر جە ڕوٙمانەو "مەولەی" چەنەش ڕازینا و خوٙڎا یار بوٙ پی نزیکارە وزوٙش بەرۆ'
دنیاو ئەدەبیاتی دنیێوە پانە و وافرەنە، ئینسان جە سەرسەعبوو تاریخیوە تا ئیساتێ چنی ئەدەبیاتی خوڎهاگا و ناخوڎهاگا پێوەرە شێلیێنی و لازموومەلزوومێ یۆتریننێ، ژانرەو ڕۆمانێ سەر بە دنیای تازێنە و پەیوەندییش بە ویرۆکەرڎەی تازەیۆ هەن، هەورامان هەرچنڎ وارێوە دۆڵەمەندا، وەلێم زیاڎتەر دۆڵەمەندییش شیعرەنە بییەن، ڕۆمانەو"مەولە"ی یوەمین هەنگامەو ڕۆماننویستەینە "پانیشتوو هەورامانینە" هەورامانوو بەشوو کوردڎسانوو عێراقینە، هەم یووەمین ڕۆمانەو بنویس "ئیبراهیم مەیکە عەلی"نە، پێسە یووەمین هەرمانەو ڕۆمانی پانیشتنە، پێسە گرنگیدایما بە فەرهەنگی هەقەتینوو هەورامی، بە هەرمانەو وێما زاناما، بەشوو هەورامی سایتوو "ئەنەفە"ی، ئی واتەواچما چەنی کەرد.
ئەنەفە: فرەو بنویسا هەورامانی و سوٙرانیزوانەکیٛچ کە داخڵیٛ دنیاو ئەدەبیی با، عاڎەتەن بە شیعرە دەس پەنە کەرا، شیعرە ژانرەی ئەوەڵینەشانە، بەڕیٛزتا بە ڕوٙمانە دەس پەنە کەردیٛ، ئینە چی؟ شیعرە نەتاویٛ واچەکاو بەڕیٛزیتا بەیان کەروٙ؟ ئینە هەنگامێ تازیٛ و دڵوەشکەرەنە، یام چی ڕوٙمانە ئەوەڵۆ؟
* ئا ورکە بوٙقەش نییا منۆ پەی دلیٛ جەهانوو ئەدەبیاتی، گیٛرە ئەلاحەڎە بوٙ و ئا ورکە نەبوٙ هەکە بوٙقە منیوٙ بنویسێوە عاڎەتیوە.
ورکەکەو من ئانەبیٛ وەڵیٛ ئانەینە هەکە مەرامم ڕوٙمان نویستەی یام هەرمانێوە ئەدەبیە بوٙ، مەرامم گلدایۆ و پاریٛزنای زوانو ئەڎایی ویٛم بیٛ، چەمم گیٛڵنا نویستەی ڕوٙمانیٛم بە بەپیت تەرین بوار زانا کەروش کەنوٙڵێوە پەی جەم کەرڎەیۆ واتە و واچە هەورامیەکا و چاوە هەم گلشا دەوە و نازو دلیٛنە پشا و هەم ڕاو زوانو ڕوٙمانیٛچۆ هەکە زوانێوە گردینیین و پاسەیچم نیانەرە هەکە فرەو بوانە جوانەکا حەوسەڵەو ڕوٙمان وانایۆیشا هەن، چاوە زوانەکەی وزوە سەرو زوانا و دەوشۆ دەسو نوکو قەڵەمەکا.
سەرەڕاو ئینیشایچە گردی من ئیسەیچ و وەڵتەریچ بەخیٛڵیم بەرڎەن و بەرو بە هوٙنەرە بە توانایەکا هەکە بە چنڎ واچێوە کەمیٛ و کوٙڵێ مەرامیٛ زلیٛ و وەرفراوانیٛ وزا ڕووە.
نموونیٛ فریٛ و فراوانیٛنیٛ وەرو کوٙڵیی دەرەتانەکەی من چیٛگەنە تەنیا گلکە وزو سەرو ئی هوٙنیا زەریفەو هوٙنیار: فەتحوڵڵای ڕەزایی جە هوٙنیاو:
دونیا دەوران دەورانا... یوٙ والی و یوٙ وەیلانا
ڕەزایی دریٛژەو بەرویرە ئەدەبیەکەیشەنە یاووٙ یاگێوە ئیٛتر من چەنەم نمێ قسیٛش سەر کەرونە و تەنیا گوٙشیٛش پەی شل دارو، واچوٙ:
یوٙ چەنی بەختیٛش گژیان
سەروەنەشیٛویاو دژیان
یوٙ بیٛڕەحم و مروەتەن
یوٙ زاڵما و یوٙ چەتەن
یوٙ مەسا مەیخانەنە
یوٙیچ ئینا کڵیٛسانە
دەی ئی چەنەئاما ئەدەبییە هینو ئانەیە نیا یوٙ بەخیٛڵیش پەنە بەروٙنە و ئاواتش وەنە وازوٙ؟
ورکەو ئانەیچە چەنی کەوت مەژگم هەکە واچە و واتەکا جە فەوتیای پاریٛزنو؟
ئانەبیٛ فرەو وەختی جەمەوەبیەکانە چەنی ڕەفیٛقەکام هانەو خەڵکی و جوانا دیٛنمیٛ بە هەورامی بنویسا و بواناوە و دوایچ، وەرو ویٛمەرە لوٙمەو ویٛم کەردم و پەرسام ئەو ویٛم: ئەریٛ ئانە توٙ عەیب مەکەری هەتا ئیسە ویس کتیٛبیٛ زلیٛ و گولانیٛڎ بە سوٙرانی چاپیٛ وەڵێ کەردیٛنیٛوە و لاڎ نەکەرڎەنوٙ ئەو زوانەکەو ویٛت و خزمەتێوە مفتو زوانو سوٙرانیڎ کەرڎەن و چیلایچۆ مەی بە خەڵکی و بە جوانا ماچی: بە هەورامی بنویسدیٛ و بواندیٛوە و دوٙدیٛ؟
ڕەنگە جوانەکیٛ تەقیەو سەرە چەرمەکەیم کەردیٛبوٙشا و جەمەکانە تەریٛقشا نەکەرڎەبووە، ئیٛنڎا حەقو ویٛشا بیٛ یوەم جەمەنە ئا عەیبەیە بڎاوە ڕوەمەرە.
پەی پینەو ئا لەکەیە کەوتا ویٛم، قەرەبوو ئا دما کەوتەیە بە چیٛش کەروە خاسا؟
دمای ئاورڎەی و بەرڎەیێوە فرەی هەرچنڎە تەرسیٛنیٛچ ئا هەرمانیٛمە چەنە نێ، وەلێم دماجار قەرارم دا ڕوٙمانە بنویسو.
پەی بابەتو ڕوٙمانەکیٛچ فرەم ئاورد و بەرد هەتا کەوتا ملو ڕازەو مەولەی و واڵەکیٛشەرە و ئا وەرویرە خاکەساریەمە چەنە بەرهەم ئاورد هەکە شمە و بوانە ئازیزەکا نامیٛ نیا ڕوٙمان و بیە بە ماییٛ شانازیی پەی من و هوٙمیٛڎەوارنا تاوو خزمەتی خاستەر بە زوانەکەیم کەرونە و شوٙتەکەو چیچا ئەڎێم حەراڵ کەرو.
ئەنەفە: زوانی هەورامی و شیعرە پێسەنیٛ وەهاری و هەورامانی، زەریفییەکاو یوٙترینی نیشانە مڎا، خەیاڵما بارەو زوانی هەورامی و زوانوو ڕوٙمانیٛوە پەرسوو، پەی بەڕیٛزیت پیٛسە یوٙ جە ئەوەڵینەکا، تەواناو زوانی هەورامی و کیٛشمانش مەجالەو ڕوٙماننویستەینە چەنی ورسەنگنی؟ حیچ قوٙرتیٛت پەی وەشیٛ بییٛ جە ڕووەو زوانی هەورامیوە؟ زوانەکە وەش ئاما دەستۆ؟
* هامڕاتەنا جە ویٛنا کەرڎەکەیتەنە میانو زوانو هەورامیی و شعریٛنە و زەریفڎ شوٙبهنێنیٛ ئەو یوٙترینی.
جە بارەو زوانو ڕوٙمانیٛچۆ منیچ وەڵیٛ ئانەینە بە هەورامی بنویسو هەمان تەرسەم بیٛ و ئەجیٛم زوانو هەورامیی گریکو نویستەیش نیا یام کەم تفاقا جە واتە و وشیٛنە، تا خایتێ ئیٛنڎە ئا زوانە هەکە خەڵک پەنەش واچوٙ سوٙرانیی ئیٛنڎە زاڵ کریابیٛ ملو ویرۆکەرڎەیمارە ئەجیٛما زوانی هەورامیی دەرڎەو وتاردایچ مەوەروٙ نەک نویستەی.
وەلێم دمای وانایۆ شاکارە زەریفەکەو ماموٙسا ڕەزا بەهمەنی (چنارە) من ویٛم تەرسیم مەڕیا و ئا تارماییە ڕەماوە مەژگمەنە و هازیم ئامارە نەتەرسونە و بنویسونە.
ڕاسەن من جە پانیشتو هەورامانیەنە یوەم بنویسەنا دەسم پەی ڕوٙمان نویستەی بە هەورامی بەرڎەن، وەلێم فەزڵەکە پەی کەسانیٛ تەری پیٛسەو ماموٙسا جەمال بیٛداری و ماموٙسا ڕەزا بەهمەنی و کاک دکتوٙر ناجیٛحی و کەسانی تەریچ گیٛڵوٙوە هەکە سامو ئیٛمەشا ماڕا و ورەشا وستیمیٛ وەر بە هەورامی بنویسمیٛ.
پەی جوابو دما بڕگەو پەرسەکیٛچڎ: نەخیٛر نەک حیچ قوٙرتێوەم پەی وەش نەبی جە نویستەی ڕوٙمانەکیٛنە، بە چەپەوانەیچۆ زوانەکەو ویٛم یارڎەیش دانیٛ ئانە مەژگمەنە بیٛ پیٛسەو ویٛش وزوٙش سەرو کاغەزی و بنویسونەش.
شکەڎ نەبوٙ ئەگەر ئا ڕوٙمانەو مەولەیمە بە سوٙرانی نویستێ، هەم وەرو ئانەی فەرهەنگە هەورامیەکە بە سوٙرانی بەرنەوزیێ و هەم وەرو ئانەیچە هەکە زوانو ئەڎاو من نەبیٛ، نەتاویٛنیٛ پا جوٙرە ناڎامەتیەکا و سەرئامایەکا و قوٙمیایەکا و دلیٛ ڕوٙمانەکەی وزو ڕووە.
ئەنەفە: "مەولە" پێسە ناموونیشان و هەم کارەکتەرێوە سەرەکیی ڕوٙمانەکیٛ، کەسایەتیێ واقیعین بە میکس کەرڎەی خەیاڵی نویسیانۆ، بە ڕاو بەڕیٛزیتا ڕوٙمانەی خەیاڵییە، یان واقیعییەی-خەیاڵییە، متاوا کاریگەریی جیا بازا؟ بەڕێزت پەنەت خاسا واقیعی خەیاڵی کەریوە، یان تەنیا خەیاڵێوە جوانما نیشانە دەی؟
* ڕاسا کارەکتەری سەرەکی ڕوٙمانەکیٛ مەولەن، وەلێم دونیاو واقعینە کەسێوە نیا بە نامیٛ مەولەیۆ و ئەگەر ڕوٙمانەکیٛ بەشە کەری ملو سەڎیرە، نەوەڎش فەنتازیان و دەش واقعا و واقعەکەیچ بە فاڕای نامیٛ کارەکتەرەکا کاڵ بیەنۆ.
من حەرچن فرە شارەزاو جەهانو ئەدەبیاتی نیەنا و تازە پام هوٙرگیٛرتەن پەی دلیٛش، وەلێم من پاسە مزانو چیٛوێوەما نیا بە نامیٛ ڕوٙمانیٛ واقعییٛوە، هەکە واتڎ ڕوٙمان یانیٛ فەنتازیا و خیاڵ و گەشتو خیاڵی، ئیٛتر پەی جیاوازیی بەقەوەتیی و لەڕولاوازیی خیاڵەکا، دونیاوینی بنویسەکەی و ئاستو ڕوٙشنویریش کاریگەرا نەک حیچی تەر، وەلێم مشوٙم ئانەیچما ویر بوٙ هەکە گرد فەنتازیا و خیاڵێوە ئامیانێوەش گەرەکا هەتا گرسوٙ، حەر چەنی قابلەمێوە شوٙت بە چەمچێوە ماسی کوٙنە گرسوٙنە و بوٙ بە ماس، خیاڵو بنویسیچ حەرچن ساز و وەرفراون و قوڵ بوٙ، حەر لازمش بە چەمچە ئامیانەکەی هەن هەتا گرسوٙ، ئامیانو خیاڵیچ سەرئاما یام قوٙیایێوەن ئەشۆم ویرەوەری بنویسینە بوٙ هەتا خیاڵەکیٛش گرسا و با بە بەرویرێوە ئەدەبی، منیچ ئا کولەمەرگییە هەکە مەولەو واڵەکیٛش دلیٛشەنە ژیویٛنیٛ و بەچەمیٛ ویٛم وینابیٛم، بی بە ئامیانو خیاڵیم و گرسناش.
چێگۆ تاوو واچو کاریگەریی ڕوٙمانیٛ بەسیان بە سەلیٛقەو بنویسەکەیشۆ و زاڵیشەرە ملو قەڵەمەکەیش و خیاڵیشەرە، نەک بە واقعیی بیەی یام خیاڵیی بیەی بابەتو ڕوٙمانەکیٛشوٙ.
پەی ئانەیچە هەکە واتم چیٛوێوەما نیا بەنامیٛ ڕوٙمانیٛ واقعییٛوە، مەرام ئانەنە واچو ئەگەر نویسیاێوە گردش باسو ژیوای کەسێوە یام چنڎ کەسێوە ئەژناسیاش کەرد و خیاڵ دەروش نەبی دلیٛشەنە، ئانە ئیٛتر پەنەش وچیوٙ ژیوا نامە یام ڕازەو ژیوای ئا چنڎ کەسەیە نەک ڕوٙمان، چون ڕوٙمان جە ڕوٙمانسیەتیوە هوٙر گیٛریان هەکە ئاشکرا باسو خیالیی و گەشتو گیٛڵ و خیاڵی و ویرو بنویسەکەین نەک حیچی تەر.
بە پەیلوای کوڵ و ڵوٙرو منیچ ڕوٙمان ئەشوٙ خزمەتێوە یام بە ویەرڎەو کوٙمەڵگەی یام ئایندەیش کەروٙ، ئیٛنڎا خیاڵاتی ڕوت یام خیاڵ پڵاویٛ حیچ کەڵکێوە مەیاونا بوانی و بە چەپەوانەۆ زەرەرش مڎا وەنە و وەختش کوٙشا.
ئەنەفە: تا چن گرنگا ڕوٙماننویس ویٛش کارەکتەرەکا نەنویسوٙوە و ڕاشا بدوٙ و وەرەشا پەی وەر بدوٙ ویٛشا ویٛشا بنویساوە، یانێ تا چن ئازادییت دان مەولەی، مەولە ویٛش قسیٛ کەروٙ؟ ڕوٙماننویسێ ویٛسەپننی یان دیموکرات، مەولە ویٛت خەلق کەرد، یان مامانیت کەرد تا پەیدا بی؟
* پەرسەکیٛڎ ئیٛنڎە زەریفەنە مەزانو چکوٙوە دەس بەروو پەی جوابەکاش.
بەڵیٛ لازما ڕوٙمانویس دیموکرات بوٙ هەتا پیٛسە توٙ واچی وەرە شلە کەروٙ پەی کارەکتەرەکا ویٛشا دوا.
وەلێم ئینە پەیوەندیش هەن بە جوٙرو دونیا وینی ڕوٙمان نویسەکەیۆ، پەی نمونەی من نویستەی ڕوٙمانەو مەولەینە پام نیا جەرگو ویٛمەرە و گوٙشم نەڎا ئانەیە دمایی وانەرێوە ڕادیکاڵ واچوٙ ئەشیام توٙ پیٛسە کەسایەتیێوە ئەژناسیای ڕووجەخوٙڎای ئەشیا باسوو ماچوومووچوو دلیٛ یاگیٛ خانەی و وەنەوشیٛ، یام قالەی و ڕیٛحانیٛ، یام وەختو دەزگیرانداریی مەولەی و زەریفیٛڎ نەکەردێ.
وانەر بەچەمیٛ ویٛش وینوٙ من حەولیٛم دێنیٛ چنڎم چەنە ئامابوٙ سڵ چا جوٙرە قسا نەکەروە.
ئینە ئانەما پەنە واچوٙ هەکە کارەکتەرەکیٛ تا ئەنڎازێوە فرە ویٛشا ویٛشا نویستەنۆ نەک من، منیچ حەولیٛم دێنیٛ ڕاوی قوٙمیایەکا بوو نەک خولقنەرشا.
وەلێم پەی نمونەی واچوو: وەختێ وەشەویسێوە ڕوٙمانەو مەولەیش هوٙرگیٛڵنا پەی سوٙرانی، داواش کەرڎە ئەو من ڕاش دەو ئا ماچوموچا لابەروٙ وەرو ئانەیە پیٛسە کەسایەتیێوە ئایینیی سەرش نەگوٙ دلیٛ خەڵکینە و لوٙمەش نەکەرا، تا خایتێ ئا ماموٙسا وەشەویسە وەختێ قسیٛما کەردیٛ چا بارۆ بە خوۆ واتش: خوٙ مزانو خانە و قالە نەک تەنیا ماچیٛ بەڵکو چیٛوی تەریچشا کەرڎەن چەنی وەنەوشیٛ و ڕیٛحانیٛ، وەلێم پەی من مەشیوٙ ماچەکایچ بنویسو.
دەی ئینە ئا وەشەویسە بەویٛش بزانوٙ یام نا ویٛ سەپناین، وەلێم نەک بە مەیلو ویٛش بەڵکو بە فشارو ئا گەروبانیە هەکە هوٙرگیٛڵن چەنەش ژیووٙ.
پەی جوابو دما بڕگەو پەرسەکیٛچڎ واچو: بەڵیٛ من حەولیٛم دێنیٛ مامانیی کارەکتەرەکا کەروٙ هەتا بە سڵامەت پیٛڎێ با، وەلێم داخەم مەشوٙ بڕێشا بە ناکامڵیی جە ئەڎێ بینیٛ و خەتاکیٛچ ئینا کوٙڵیٛ منۆ هەکە مامانێوە کەم ئەزمونەی تازەپەنەیاوێ بیٛنیٛ، وەلێم وەشحاڵنا هەکە ئا هەرمانیٛ بیە بە وەڵینێوە پەیم و ئیسە خجڵو نویستەی ڕوٙمانێوە تەریٛنا بەنامیٛ: گیٛجاوەو ژیوای و هەتا ئیسە ٢٥٠ لاپەلێم چەنە نویستیٛنەو تاوو واچوو بڕێوە خاستەر جە ڕوٙمانەو مەولەی چەنەش ڕازینا و خوٙڎا یاربوٙ پی نزیکارە وزوٙش بەرۆ.
ئەنەفە: کوٙسەکاو کوردی بەگردین و هەورامانیچ بەتایبەت پیسە ژیوگەی پێسە شۆنێوە کارەساتبارێ و کۆسکەوتێ، هەڵەبجە، ئەنفالوو ژمارێوە فرەو خەڵکی، کۆڕەوەکە، تاریخی تازەنە مانیای و مەرڎەی خەڵکی و ئاورایی و بێهەرمانی و بێدەرەتانی، کوٙچوو گەنجا ڕووەو جبەر، ئینیٛ و هەزارانیٛ تەریٛچ متاوا میدیەمیٛ دەردواردیٛ با کە ڕوٙماننویس کەروٙشا کەرەسەو ویٛش؟
* بەڵیٛ گردشا کەرەسیٛ خاسیٛنیٛ با بە ئامیانو کەرەسەو دەیان ڕوٙمانا، وەلێم عاڎەتەن پەی ئانەی قەرەت بەرنەشا، ویەرڎەی وەختی کوٙڵەکێوە لازمەنە پەی هەریوٙ چا نەڎامەتیا هەتا تاوا با بە ئامیانو ڕوٙمانێوە عالیٛ.
پەی نمونەی: ئی دوە ڕوٙمانە هەکە من خجڵیاناشا پوٙرە، یوەمەشا یوٙە جە کوٙڵەکە سەرکیەکا و ڕستێ سەرەتانییەش، جەنگو ئیٛران و ئیٛراقین هەکە ٤٠ ساڵیٛش ویەرڎەبیٛ سەرەرە.
دوەمەیچشا ئامیانەکەش زوٙڵم و زوٙر و بەگزاڎان و ٨٠ ساڵیٛش لوان ملەرە.
یانێ گەرەکما واچوو ئا نەڎامەتییٛ توٙ باس کەردیٛنیٛ بڕێشا پیٛسە: کیمیاوارانو هەڵەبجەی و ئەنفالی، کوٙڕەو و هوٙرخیٛزیای خەڵکو کوٙردستانی (ڕاپەڕین)... ئینیٛشا ئیسە گرسێنیٛ و دەس مڎا پەی ئامیانو ڕوٙمانی، وەلێم تازەکیٛشا هەڵای نەگرسێنیٛ و ئەگەر کریا بابەتو ڕوٙمانی، گیٛرە خەڵک هازیش نەبوٙ وانوٙشاوە، چون دور نیا بوانەکە ویٛش یوٙ جە کارەکتەرەکا ئا ڕوٙمانیە بوٙ هەکە خجڵو وانایۆیشا و باسەکەیچ پاسە نەبوٙ هەکە بنویسی نویستەن.
ئی ڕەخنە زەقە یوٙبیٛ چا ڕەخنا هەکە جە ڕوٙمانەو مەولەی گیٛریا و فرەیچ یاگیٛ ویٛشەنە بیٛ و منیچ قبووڵم کەد.
تەنانەت سەرەرە لوای وەختی ئیٛنڎە گرنگا، زاناکیٛ بوارو شوٙنەواری ماچا: ئەگەر گەرەکڎ بوٙ پەیکەرێوە مەنوٙوە ویاگیٛ گیٛرو، ئەشوٙم وەختێوە و یاگێوەنە ئا پەیکەریە بنیەیرە حیچکەس نەمەنەبوٙ وەشش چا کەسەیە نێ، یانێ لای کەم جیلێوە لوابوٙ ملشەرە، ئەگەر خەڵکو ئا سەرڎەمیچە مەنەبوٙ تەنیا مەتەرسیی ماڕایی سەرو پەیکەرەکەی ئانە نیا پاسە کەروٙ نیایرەی پەیکەرەکەی خراپنوٙ، بەڵکو چانەیە گرنگ تەر ئانەنە هەکە ساحیبوو پەیکەرەکەی و ویەرڎەش، هەڵای نەبیەن هینوو گرد کەسی.
ئەنەفە: بەڕیٛزتا جگە جە ڕوٙشنویرییە ئەدەبییەکەی ڕوٙشنویریییٛ "ویریی ئاینیی تازە" تا هەن، داراو ویرۆکەرڎەیێ ئاروٙیانەیندیٛ پەی دینی، ئینە تا چن متاودیٛ کەردیٛش بە شۆڵەو دەسیتا و ڕوٙمانەکاتانە، جە ڕاو کارەکتەرەکاوە، کونجە تاریکەکەو گلیٛرگە "کۆمەڵگە"یش پەنە ڕوٙشنیٛ کەردێ؟
* بە دڵنیایۆ حەرچی بی بە ویر و قەناعەت پەی بەشەری، ئیٛتر گروەختێ شوٙنەو ترەکێوەرە گیٛڵوٙ هەتا ئا ویرۆکەرڎەیەو ویٛش یاونوٙ گلیٛرگەی و کەروٙش قەناعەت پەی خەڵکی، منیچ حەریاگێنە یاگەدەسم بیەبوٙ ناستەنم سەرمەرە بلوٙ و زوانو کارەکتەرێوەم کەرڎەن بە زوانو ویٛم و ئانەمە واتەن هەکە لازمم زانان وچیوٙ.
ئی چڵەکنایرەو توٙیچ بە ئەهەمیەتۆ هوٙرگیٛرونە وەلێم پیٛسە وەڵیٛنە واتم: ڕەنگە سەرەرەلوای وەختی ڕام نەڎوٙ، چون ئا ویرکەردییە ئاروٙییانەو من گلیٛرگەو ئیٛمەنە هەڵای تازەن و خەڵک خوٙفی کەروٙ وەرو ویٛچشەرە باوڕ پانەیە کەروٙ پەی نمونەی: شافعیچ پیٛسەو منو توٙ بنیاڎەمێوە ئاسایی بیەن.
ئەنەفە: خێرامای بوانا "وەرڎەنگ"او هەورامانی پەی نۆبەرەو ڕوٙمانەو مەولەی چەنی ورسەنگندیٛ؟
* وەشبەختانە بوانیٛ هەورامییٛ وتاخایتێ سوٙرانییٛچ و ناوەندە ڕوٙشنویرییە هەورامییەکیٛ و چنڎ زانگایێوەیچ خیٛرئامیێوە گەرمشا کەرد جە ڕوٙمانەکیٛ و یەریٛ گلیٛرەوەبییٛ وەرفراوانیٛشا هەڵەبجە و خورماڵ و گوٙڵپەنە پەی ڕوٙمانەکیٛ سازیٛ کەردیٛ، یانەو سیاوچەمانەی و بەشەو ڕوٙشنویری خوٙرماڵی، سوپاسنامە و ئیٛژەنەشا دا بە من پیٛسە بنویسو ڕوٙمانەکیٛ، ئی دیدارەیچە هەکە ئیسە چەنی شمە خجڵشەنا ١٧ هەمین دیدار و چەمپەنە کەوتەی میدیایین چەنیم ئەنجام دریوٙ، چوار تەلەفزیوٙنیٛ و دویٛ ڕوٙنامیٛ و یەریٛ سایتیٛ و دویٛ دەزگێ میدیاییٛ و ڕادیویٛ و ... تاد دیداریٛ تایبیٛشا چەنی کەردا، ڕادیوٙ هەڵەبجەیچەنە بە پەنجا ئەڵقیٛ ڕوٙمانەکیٛ ونیاوە و قەرارا کەرایچش کتیٛبی دەنگیٛ و یوتیوبیچەنە وەڵاوش کەراوە.
ئی وەشئامایە گەرم و گوٙڕە پەی من یاگیٛ دڵوەشیی بیٛ و هازیش ئاردارە هەرمانە و خزمەتی زیاتەر کەرونە و زیاتەر خڎیٛ دەو نویستەی بە زوانەکەیم.
چانیشایچ گردی گرنگتەر ئانەنە هەکە ئا ناوەندە من ڕوٙمانەکەم پەی نویست، ڕوٙمانەکەش قبوڵ کەرد و واتاش پەنە وەرڎەوام بە، حیچ چانەی وەشتەر نیا هەرمانێوە کەری پەی یوٙی و یوەکە بەدڵش بوٙ، وەلێم ئەگەر خوٙڎانەخاسە ئا کەسە یام ئا ناوەندە هەکە هەرمانەکیٛڎ پەی کەرڎەن هەرمانەکیٛ نەپەسینوٙ، ئەگەر گردو دونیێیچ دەسوەشیڎ وەنە کەروٙنە و پەسینوٙش، حیچ قیمەتێوەش نیا و مەبوٙ دڵش پەنە وەش کریوٙ.
منیچ پەوچی دڵوەشەنا، ئا ناوەندە هەکە ڕوٙمانەکەم پەی نویست، پەسیناش و منیچ چیٛگۆ ماچوو: منیچ کوڕو زوانەکەو ویٛمەنا و هەتا تاووٙ خزمەتش کەرو.
ئەنەفە: ڕوٙمانەی دووەمەتا بە نامێ " گیٛجاوەو ژیوای " تاودیٛ بە تەکانێوە تازەتەرەو دماو "مەولە"ی نامیٛش بەردیٛ، بە هەمان سەبکوو مەولەی نویسیێنە، یام مزانی چیٛشی مڎەی بە بوانا"خوێنەر" وەرڎەنگ-او ڕوٙمانیٛ تازیٛ هەورامییٛ؟
* بە دڵنیایۆ پیٛسە وەڵتەر باسم کەرد، ڕوٙمانەی دوەمەم تەکانێوە تازیٛنە و حیچ نەبوٙ هەنگامەی دوەمەو منەنە و دماو هەنگامیٛ یوەمیٛم میٛ، یانی حیچ نەبوٙ هەنگامێوەشا بەینا و هەنگامێ لوانا وەرۆ دونیاو ئەدەبیاتینە، ئینە سەرەڕاو ئانەیە هەکە چنڎ وەشەویسێوە بە ڕەخنەی ئەدەبی و زانستی ڕوٙمانەکیٛشا وستە وەرو ڕەخنەی و خزمەتێوە فرەشا بە منیچ و بە ڕوٙمانەو مەولەیچ کەرد و دماجار گردو ڕەخنەکاشا بییٛ بە دەسماێوە خاس دەسو منوٙ، چیٛگەیچۆ ئیٛژانەم هەن پەی گردو زەحمەتەکاشا.
س.ز
* ئیبراهیم مەیکە عەلی.
*بنویسوو بوارو هزر و ئاینی و ڕۆمانێن.
*هەتا ئیسە ٢٢ وەرویریێش بەچاپ یاوێنێ.
- *هورگێلنایش کەرڎەن پەی چند نویستەی بڕێوە جە بنویسە نامدارەکاو دنیاو ئیسلامی پێسەو: د.محمد عمارە، د.محمد عابد الجابری، د.محمد شحرور، د.محمد خاتمی، د.عبدالکریم سروشی.
- * وەرچەمتەڵین وەرویرێوە هەکە ئی پیاشە بە دونیاو ڕۆشنویری هەورامانی ئەژناسا، ڕومانەو مەولە ی بێ.
