جە هۊرچنیەو ئەنجومەنوو پارێزگاو کەرکوکینە کورد بە چن لیستێوە بەشداریش کەرڎەن و پەدەکە بە مەڵامەتی سەرەکی پارچەبیەو دەنگوو کوردی چا پارێزگانە منریۊورە و ئەگەرش هەن بەشێوە جە لیستەکا تەریچ ژمارېوە جە دەنگەکاو کوردی فەوتنانۍ.
ڕۊو دووەشەممەی دەنگدای گرڎیی پۍ هۊرچنیەو ئەنجومەنوو پارێزگاکاو عێراقی ملۊڕاوە و دماو ١٨ ساڵا پۍ ئەوەڵجاری پرۆسەکە جە کەرکوکەنە ئەنجام مڎریۆ، بەڵام سەرەڕاو حۊڵەکا لایەنە کوردییەکۍ نەتاواشا بە یەک لیست بەشداری چی هۊرچنیەینە کەرا و بەشداریکەرڎەیشا بە چن لیستێوە مەتەرسی فەوتنای دەنگێوە فرەیش ۋنەکریۆ.
یۊبیەی نیشتیمانی: ئاژەو خراپوو شارەکەی خاس کەرمېوە
یۊبیەی نیشتیمانی کوردسانی کە چنی پارتوو شیوعی کوردسانی هامپەیمانیی 'کەرکوک هێز و ئیرادەمانە'ش پێکئارڎەن جە زۋانوو بافڵ تاڵەبانی سەرۆکوو ئا پارتەیۆ جە بانگەشەو هۊرچنیەینە ئەرەیاۋناش: "دەنگما پنە دەیدۍ پۍ ئانەی ئاژەو خراپوو کەرکوکی ڕاس کەرمېوە، سنورېوە پۍ سیاسەتی شۆڤینی بنیەیمېرە"، حەرپاسە واتیچش "دەنگ دەیدۍ بە ئېمە و جەنگەکەی پۍ ئێمە جیابازدۍ".
تەڤگەری ئازاڎیی: لیستوو هامپەیمانی کەرکوک هێز و ئیرادەمانە عالتەرینا
تەڤگەری ئازاڎیی گلېرگەو کوردسانی جە ئەرەیاۋنېوەنە باسش چانەی کەرڎەن: " ئێمە جە تەڤگەری ئازاڎیی بە ڕشدبیەیۊیما جە کۆو لیستە کوردییەکا لیستوو هامپەیمانی کەرکووک هێز و ئیرادەمانە، کە جە یۊبیەی نیشتیمانی کوردسانی و پارتوو شیوعی کوردسانی پێکئامان، عالتەرین و گونجیاتەرین هۊرچنیەن کە دەنگش پنە بڎەیمۍ، بێگومان ئی لیستە دەرفەتوو پڕۆژەو گردیماش ئینا چنە جە ئایندەنە پۍ پېوەرە ژیۋای دیموکراتیانەو گەلا و باوەڕیەکا هەرمانە کەرمۍ و تەنیا لیستا کە چا چوارچێوەنە متاوۆ خزمەت بە کەرکووکی و کەرکووکییەکا بێ جیاوازی کەرۆ، داوا جە ئەنداما و دۆسا و گرڎوو ئا کەرکوکییە بەڕێزا کەرمۍ کە گۊش جە ڕەئیەو ئێمە گېرا دەنگوو ۋېشا بە لیستوو هامپەیمانی کەرکوک هێز و ئیرادەمانە بڎا" .
"شیوعی هامپەیمانوو یۊبیەی نیشتیمانیا"
پارتوو شیوعی کوردسانی: چنی یۊبیەی نیشتیمانی کوردسانی هامپەیمانا و کاندیدش هەن جە لیستوو 'کەرکوک هێز و ئیرادەمانە'، هەرمانە پۍ ئانەی کەرا لانیکەم کاندیدێوە ۋېشا سەر وزا پۍ ئەنجوومەنوو پارێزگای.
پەدەکە دەنگوو کوردی پارچە کەرۆ
پەدەکە پېسە هەمیشەی ئینا بەرەو ئەرەگیرا گەلوو کوردینە، چنی پارتێوە تورکمانی و عەرەبی سونەی کەرکوکەنە ئەنەیاوایشا هەن چی هۊرچنیەنە پۍ پارچەکەرڎەی دەنگوو کوردی، پۍ ئا مەبەسیچە ئەگەری فرەش هەن دەنگوو فرېوە جە کوردی فەوتنۆ و زەرەر جە کوردی بڎۆ چا پارێزگانە.
نەوەی نوێ: ئیدارەی گەندەڵوو شارەکەی فاڕمۍ
نەوەی نوێ: لیستێوە سەربخۆش هەن پۍ پارێزگاو کەرکوکی واتەواچوو جمیەرەکەیشا سەرۆکوو لیستەکەین، و حەرپاسە بە کۆی گرڎی چوار کاندیدېشا هەنۍ، بە چڕی هەرمانە پۍ ئانەی کەرا کە لانیکەم واتەواچوو جمیەرەکەیشا کەرا ئەنداموو ئەنجوومەنوو پارێزگای، بانگەشەو ئەنەیچ کەرا" ئیدارەی گەندەڵوو شارەکەی فاڕا".
کۆمەڵ و یەکگرتو ئەگەری فرەش هەن چن هەزار دەنگێوە کوردی فەوتنا
حەریۆ جە کۆمەڵی دادگەری و یەکگرتوی ئیسلامی پېوەرە هامپەیمانیشا پێکئارڎەن بە نامۍ ( هامپەیمانی مەشخەڵ'شۊڵەچراوی' کەرکوک)ی، سەرەڕاو ئانەی حەردووە پارتەکە جە کەرکوک تا ئیسە حیچ وەختۍ نەتاوانشا حیچ نوێنەرێوەشا بۊ جە هۊرچنیەکا کەرکوکی و حیچ وەختۍ جە هۊرچنیەینە سەرکۊتۍ نەبیېنۍ، بەڵام ئیجارەیچ حۊڵوو ۋېشا دان، ۋەرووئانەیچ تەوەقوعوو ئانەی کریۆ چن هەزار دەنگێوە کوردی شارەکەنە فەوتنا و زەرەر جە پێگەو کوردی بڎا چا شارەنە.
