جە ۋەرا ۋەرو پڕوپاگەندە تاریکەکا دۊڵەتو تورکی ئەرەگیرینە، گەریلا ڕۆ بە ڕۆ بەهێزتەر بۆ، جە ڕوو سەروازی و تەکنیکیوە بیەن بە خاوەنو ئا هێز و هونەریەی کە گورزەی کوشندۍ ۋنەو دژمنی بڎۆ. چالاکی ٣٠ی کانوونو دووەمو گاباری نموونێوە ئاشکراو ئا بەهێزییەینە.
حەرچڼە ۋەرپەرسا تورکی ماچا، 'تەنانەت ژمارەو پاڵەیەکایچشا مزانمۍ، مزانمۍ چنشا چنە مەنێنێوە، گرڎو سنوورەکاما پاکێکریێنێوە جە گەریلاکاو ئازادی کوردەسانی پېسە گرڎ جارێ بە پراکتییکیانە جوابو ئی قسە و باسا مڎاوە و گرڎو درووەکاشا پوچ مکەرۊوە. هەرپۊکەی هەر چالاکیێوە گەریلاکاو ئازادی کوردەسانی جوابێوە ڕاسەوخۆن جە ۋەرا ۋەرو دۊڵەتو تورکی ئەرەگیرینە.
دۊڵەتو تورکی ئەرەگیری بە تایبەتی پڕوپاگەندەو ئانەی مکەرۆ جە سەرنیشتوو کوردەسانینە گەریلا نەمەنەن و هەوڵمڎۆ پی پڕوپاگەندا بڕوا بە گرڎ کەسی بارۆ. بەڵام هێزەکاو گەریلای هامشێوەو گرڎ جارێ و جە یاگۍ و کاتو ۋێشەنە جوابو ئەرەگیرا مڎاوە. هەر پۊکەی جە ٣٠ی کانوونو دووەمینە جە بۆتان ۋەرا ۋەر بە بارەگاو تابوورو سەسلیجی و بڕۍ بیرە نەوتێنە جە گابارەنە چالاکیێوە گۊرە ئەنجام دریا و پەیامێوە بەهێز دریا.
گەریلاکاو ئازادی کوردەسانی مڎرامانێوە پا جۊرە ئەنجام مڎا کە جە جەهانەنە شێوەش نیا. پۊکەی مشۆم فرە بە عالی جە گرڎ چالاکی و هەر هەنگامێوە گەریلای بیاومێنە. ۋەرو ئانەی حیچ چالاکیێوە گەریلای جە خوتو خۊڕا نیا؛ هەریۆ چا چالاکیا هۊرگیرو پەیامێوەن. دۊڵەتو تورکی نمەتاوۆ ۋێش جە ۋەرا ۋەرو هەناسەدای گەریلاکاو کوردینە گێرۆ و جە هەر فرسەتێوەنە هرووژم مکەرۆ سەرو گەلوو کوردی. دۊڵەتو تورک چی چوارچێوەنە ئەغلەبیەت هرووژم مکەرۆ سەرو پانیشتوو کوردەسانی و بە فڕۆکەی بێفڕۆکەوان بۊمبوارانو خەڵکی مەدەنی مکەرۆ. میت پەی ئانەی بتاوۆ جە پانیشتەنە ئۆپەراسیۆنە پیسەکاش ڕاوەبەرۆ چنی پاراستنو پەدەکەی ئینۍ هامکارینە و پی جۊرە ۋنەو کوردا مجۆ. هەر پۊکەی گرڎو هرووژمەکاشا بە ئەنقسە و بە پلانۆ ئەنجام مڎا.
چی دماییەنە جە ٢٧و کانوونو دووەمی جە دەگاو شهێی ناوچەو دینارتەو سنوورو ئاکرێ جە هەرێمەکاو پارېزنای مەدیاینە ئەندامو عەشرەتو زێباری جافەر جەلال و ستی هامژینەش جە لایەنو میتی و پاراستنیۆ بە ئەنقەس کریۍ ئامانج و تیرۆرۍ کریۍ. حەرچڼە ئینە نە یووەم و نە دما کۆمکوژییا؛ ۋەرو ئانەی هرووژمی پی جۊرەو دۆڵەتو تورکی جە ۋەرا ۋەرو گەلوو کوردینە گرڎ ڕوۍ ئینا ئارانە. بەڵام گەریلاکۍ ئازادی کوردەسانی بە هێزی فیدای و حەقکەردەیۊیشا، بە چالاکییەکاشا جوابو ئی کۊمکوژیە مڎاوە و گورزەی قورسە ۋنەو دۊڵەتو تورکی مڎا.
مشۊم چنی جە پەیامو هەپەگەی بیاومێنە؟
ئەر گەرەکما بۆ جە ستراتیجو تەڤگەری ئازادی کوردی بیاومێنە مشۊم فرە بە عالی جە پەیامو هەپەگەی بیاومێنە. ۋەرو ئانەی تا کۊمکوژی سەرو ئی خاکیە جە دژو گەلوو کوردی بەردەوام بۆ، گەریلایچ ڕۆ بە ڕۆ بەهێزتەر بۆ و گورزەی قورسە ۋنەو دۊڵەتو تورکی مڎۊ. ئی چالاکیۍ چالاکیێوە ئاسایی جواب دایۆ نەبێنۍ. گەریلا پەیامێوە ڕۊشنش دا پا کەسا کە باوەڕیشا بە دۊڵەتو تورکی و درووەکاشا ئارڎەن؛ گەریلا گرڎ کاتێ ئینا گرڎ یاگێنە.
پېسە ئانەی چڼین جارۍ ڕاوەبەری تەڤگەرو ئازادی ئەرەیاۋنانش؛ گەریلا ئەزموون و تواناو تەکنیکو ۋێش زیاڎ مکەرۆ و جە ڕوو سەروازییوە گەریلا خاوەنو ئا هێزە تەکنیکیەینە جە گرڎ فرسەت و جە گرڎ شۊنێنە متاوۆ گورزە ۋنەو دۊڵەتو تورکی بڎۆ. جە قسەکا فەرماندەکاو تەڤگەرو ئازادینە درک پانەی مکریۆ، گەریلا گرڎ ڕوۍ زیاتەر بەهێزتەر بۆ، جە ڕوو تەکنیکی و سەروازییوە بانۍ بە خاوەنو ئا هونەر و هەرەکەتەی کە گورزەی قورسە ۋنەو دۊڵەتو تورکی بڎا. ڕاسی ئا جەنگەی ئارۆ جە کوردەسانەنە ڕاوەبەرمکریۆ پی جۊرەنە. تەڤگەرو ئازادی جە مېڎانەکانە بە زوانو چالاکییەکاشۆ قسۍ مکەرۆ و چالاکییەکۍ ئی دماییەو گاباری نموونێوە ڕۊشنو ئی بەهێزییەو گەریلاین.
