جە تورکیا و سەرنیشو کوردستانی قڕکەردەی سیاسی دژ بە هەدەپە-ی و هاموڵاتیان بەردەوامەن و دەیان (هەدەپە)یێ تەرێ جە مێردین، هەتای، مێرسین، ئەدەنە و ئەستەنبۆڵ دەستگیرێ کریێ و هامسەرۆکی هەدەپە-و ئامەدی ڕەوانێ داداگای کریێ.
جە تورکیا و سەرنیشو کوردستانی ئۆپەرسیۆنو قڕکەردەی سیاسی کە ڕژێمە فاشیست و ئەرەگێرەکەو تورکیای دژ بە هەدەپە-ی گێرتەنشەنە وەر، بەفراوانی بەردەوامەن.
جە ئا چوارچوەنە، ئارۆ و هیزی دەیان (هەدەپە)یێ و هاموڵاتیێ تەرێ جە شارەکێ (مێردین، هەتای، مێرسین، ئەدەنە و ئەستەنبۆڵ) دەستگیرێ کریێ و هامسەرۆکی هەدەپە-و ئامەدی ڕەوانێ دادگای کریێ.
جە ئامەد-ەوە ئاشکرا کریا: سەرسەبای ئارۆی، هولیا ئالۆکمەن ئویناک و زیاد جەیلان، هامسەرۆکی هەدەپە-و ئامەدی جە دمایی ٨ ڕوان جە دەستگیر و زیندانیکەردەیشان، ڕەوانێێ بەنامێ دادگای تورکی کریێ و بڕیارەن بەنامێ دادوەر ونەکۆلیای جە دۆسیەکانشان بکەرۆنە.
هەر سەرسەبای ئارۆی، بەڵام جە ناوچەکەکێ (دێرک، ئارتوکلو و قۆسەر)ی سەر بە پارێزگاو مێردین-ی، هێزە قڕکەرێ و ئۆپەڕاسیۆنکارەکێ ڕژێمە ئەرەگێرەکەو تورکیای هۆرشانکوان سەرو یانا و جە ئاکامەنە ژمارێوی فرێ هەدەپە-یێ و هاموڵاتیێ دەستگیرێ کریێنێ کە نامێ ٧یشان زانیێنێ و ٣ شان ژەنێنێ. زانیان، عایشە گۆکان، چالاکوانەو جمیەرو ژەنێ ئازادێ یوە جە ژەنە دەستگیرکریێکانە و نامێ ٦ دەستگیرکریاکێ تەرێچ بەئی جۆرە ئاشکرێ کریێنێ: ئەحمەد ئینجی هامسەرۆکو شارەوانی کەربۆران-ی، کە قەیوم یاگێشەنە سەپیان، ، لوقمان فندک، خەدیجە کاڵکان، رەمەزان کاڵکان و فاتمە تەکین، ساکینە یڵماز و مەسعود چەلیک.
زانیان، سەرجەم دەستگیرکریێکێ ڕەوانێ ڕاوەبەری ئاساییشی جە مێردین کریێنێ و جە ئاگە زیندانیێ کریێنێ.
هاموەخت جە شارو ئەدەنە-ی، هێزە سەرکوتکەرەکێ ڕژێمی ئەرەگێری دانشان سەرو ژمارێوی فرێ جە یانا ئەندامێ هەدەپە-ی و هاوڵاتیێ شارەکەیەرە و جە ئەنجامەنە ٥ کەسێشان دەستگیرێ کەردێنێ کە نامێ دوێشان زانیێن کە بە ئی جۆرەنێ: بەدری ئاڵتان کە نەوەشی کۆئەندامو هەناسەیش هەن، چەتین ئاڵتان.
سەرجەم دەستگیرکریێکێ بریێنێ ڕاوەبەری ئاساییشی جە ئەدەنە و زیندانیێ کریێنێ.
سەرسەبای هیزی پەنج شەممەی، جە شارەکێ هاتای و مەرسین-ی، هێزە ئەمنیە تایبەتەکێ ڕژێمی ئەرەگێری، بە چەنڎین ئۆپەراسیۆنێ هۆرشانکوان سەرو یانا و ژمارێوی فرێ ئەندامێ هەدەپە-ی و لایەنگرێ ئا پارتەیشان دەستگیرێ کەردێنێ.
هامکات، جە ناوچەکێ (سوڵتان بەیلی، گازی عوسمان پاشا و ئەسەنلەر) سەر بە گەورە شارو ئەستەنبوڵی، بەهەمان شێواز هێزەکێ ڕژێمی ئۆپەراسیۆنێشان دژ بە هەدەپەی ئەنجامێ دێنێ و جە ئاکامشانە (روئوف ئالتون هیسار، ئەرجان یوجەسان و ڤۆڵکان ئەرەن) ئەندامێ هەدەپەی دەستگیرێ کریێنێ.
تا ئیسە جە ئۆپەراسیۆنو قڕکەردەی سیاسییەنە کە ڕژێمی ئەرگێر و فاشیزمو ئەردۆغانی دژ بە هەدەپە-ی و هەوادارەکانش ئەنجامش دان، زیاتەر جە ٦ هەزار کەسێ دەستگیرێ و زیندانیێ کریێنێ کە سەدان هامسەرۆکێ، هامشارەدارێ، پارلەمانتارێ و ڕاوەبەرێ پارتەکەی ئیێنێ دلێشانە.
