جە هەڵەبجە دیڎارو ماموٙسا عوسمان هەورامی لواڕاوە

جە هەڵەبجە بە بەشداری ژمارێوی فرێ جە ئەدەبدوسێ هەورامانی و کوردستانی، دیڎارو ماموٙسا عوسمان هەورامی لواڕاوە کە چەنڎین پانێلێش جەوێش گێرتەبێ.

ئارو شەممە ڕێککەتو ٣٠/١٠/٢٠٢١ی، جە هۆڵو مۆنۆمێنتو شارو هەڵەبجەینە، جە یوەمین ساڵیادو کۆچی دماییشەنە (دیڎارو ماموٙسا عوسمان مەحەمەد هەورامی) پەی ئەدەبو هەورامانی لواڕاوە. 
دیڎارەکە بەسەرپەرشتی سازیی مارگرێتی و چیٛرو چەمڎاری وەزیرو ڕوٙشنویری هەریٛمو کوردستانیەنە ساز کریا و جە میانشەنە چەنڎین پەیجۆرێ زانشتییٛ پیٛشکەشێ کریێ کە باس سەرو ئەدەبو هەورامانی و کۆچکەردە عوسمان هەورامی مەکەرێنێ.
هەرپاسە جە دیدارەکەنە ژمارێوی فرێ کە سایەتیێ و ئەدەبدۆسێ هەر دوێ دیمێ هەورامانی و کوردستانی بەشدارێ و ئامادێ بیێ.
دیڎارەکە جە سەعات ١٠:٠٠و بەیانی دەسش پەنە کرد و بە پانێلێ و گفتوگۆ و پرسیارێ و وەڵامێ تا سەعات ١٦:٠٠و دمانیمەڕوٙیش خاینا.

یاگۍ باسین، سازیی پەروەردیی مارگرێتی ڕێکوزو  دیڎارەکەی، سازیێوی تایبەتەن بە هەرمان و کاری پەروەردەیی و جە ئا بوارەنە جە پانیشتو کوردستانیینە هەرمانێ فرێ و گەورێش کەردێنی.

جاگەو یادئاوەرین، عوسمان محەمەد هەورامی، کەسایەتی ڕۆشنویر، ئەدیب، مامۆسا و داناو هەرێمو هەورامانی، ساڵێ ویەردێ بەنەوشی کرۆنای کۆچی داییش کەرد. کۆچکەردە ساڵەو ١٩٤٠ی جە شارچەو تەوێڵێ سەر بە هەرێمو هەورامانی جەڎێ بییەن و ساڵەو ١٩٤٨ی یانەشان لوان شارو سلێمانیێ.
کۆچکەردە، قۆناخەکێ وانایش جە تەوێڵێ، سلێمانییە و بەغداد تەمامنێنێ و دەرەنجام بییەن بە مامۆستا و فێرکار و پەروەردەگار و نزیک بە نیم سەدە جە ئا بوارەنە خزمەتش کەردەن. هامتەریب چەنی ئانەیە، شیعرێ، نویستێ، پەیجۆرێ فرێش هەنێ و بە تایبەتی گرنگی فرەش بە دنیاو زارۆڵان دابێ. بەگردی زیاتەر جە ٢٥ کتێبێ و نامیلکێش چاپێ یاونێنێ و وەڵاوێش کەردێنێوە و ژمارێوی فرێ کتێبێچش ئامەدێ چاپیەنێ.
هاوەخت ڕۆچنامەنویس و میدیاکاریێوی بەتوانا بییەن و جە چەندین ڕادوینێنە چوون، (دەنگی گەلی کوردستان، بەغداد، خاک و مەدەنیەت) بەرنامێش بە هەورامی و سۆرانی ئامادێ و پێکەشێ کەردێنێ.
هەورامی، ساڵەو ١٩٦٠ی چەنی خاتوو گەلاوێژ ئیسماعیل مەلا بەکر تەوێڵەیی هامسەرگیریشان کەردەن کە بەرهەمەکەش ٦ کناچێ و ٤ کوڕێ بییەن.