ئارۊ دوە شەممە، جە شارو هەڵەبجە-ی، ئەرمانگاو مامۊسایا شێۋەکاری بەدروشمو (ئەندێشەو فەخرەدین سەلیم)ی بەشداری خانوادەکەیش و هاوەڵا کۆچکەردەی و هۆنەردۆستا و جەماوەری فرەی کریاوە.
ئەرمانگاکە کە جەلاو ڕاۋەبەریی پەروەردەو شارەکەی و لقو هەڵەبجە-و سەندیکاو هونەرمەندانو کوردستانی و چالاکی هونەری وانگایەکان سەرپەشتی کریابۍ، جە گالەری جەلال عازەبانی بە دروشمو (ئەندێشەو فەخرەدین سەلیم)ی ڕێکۋزیا و بەرهەمە هونەریەکۍ کۆچکەردە مامۊسا فەخرەین سەلیم-ی و ژارێۋ جە شێوەکارا ئەرمانیێ کە وێشا جە پەیکەر، هۆرکۆڵنای، کارۍ هونەریۍ تەرێنە کۆچکەردەی وینێۋە کە گوزارە جە مەرگەساتو هەڵەبجەی و نەهامەتیەکانو کوردی مکەرێنۍ.
ئەرمانگەکە جەلاو ئامادەبییەکاوە بە گەرمی پێشۋازیش ونە کریا و ستایش و پنەزانای و ڕێزو وێشان وەرانوە بە کۆچکەردەی نیشانەدا.

یاگۍ یاداوەرین، فەخرەدین حاجی سەلیم تەوێڵەیی، ساڵەو ١٩٤٩ی کرستیانی جە شارو تەوێڵی سەر بە هەرێمو هەورامانی جەئەدێ بییەن. قۆناغەکێ وانایش جە تەوێڵێ، سلێمانیە تەمامنێنێ و دەرنجام پەیمانگەو مامۆستایانیش تەمامنان و بییەن بە مامۆستا. دمای ئانەیە جە فرێۋ جە دەگایێ و شارچێ و شارەکێ پارێزگاکی سلێمانێ و هەڵەبجەی مامۆستایش کەردەن و جە وانگەکانە خزمەتش بە بوارەکێ زانست، هونەر و وانای و ڕۆشنۋیری کەردەن. سەرەڕاو ئانەیە کە مامۆستا بییەن، نوۋیسەر، دەستڕەنگین، ۋێنەکێش، پەیکەرساز بییەن و دەیان بەرهەمێ هونەریێش بینێ و چەندین ئەرمانگێ هونەریێنە بەشدار بییەن. 

مامۆستا فه‌خره‌دين جە كيمياۋارانەکەو هه‌ڵه‌بجه‌یەنە جە خێزانە ۷ کەسیەکەیش ۳ زارۆڵێش شەهیدێ و ۲ زارۆڵێ تەرێش بێسەوشۆنێ بینێ و وێش، هامسەرەش و ۲ زارۆڵەکەی تەرش بریندارێ بیێبێنێ کە تا بە ئارۆچ ئاسەۋارش سەرشانەۋە مەنەن.
 مامۆستا هەمیشە شۆنەو زارۆڵە بێسەروشۆنەکانشەرە مەگێڵان و چەمەڕا بێ ڕووێ جە ڕووان بگێڵانێۋە و بە یەکتری شاڎێ ببانێۋە. 
پەی یاۋای بە ئاواتەکەیش چەنی ژمارێوتەری جە کەسوارو قوربانیانو هەڵەبجەی کۆمەڵەو قوربانیانو کیمیاۋارانو هەڵەبجەیشان مەرزنارە و بەردەۋام جە بەر و دلێ وڵاتینە کارش کەردەن پەی کەیسو هەڵەبجەی. جە ۰۲-٢۰-٢٠٠٩ی، سەبارەت بە کەیسو هەڵەبجەی پێسەو شایەدحاڵی جە دادگاو تاوانەکانو ئێراقی بەشداربییەن شایەتیش دژو هەر دووێ تاوانبارێێ سەددام حوسێن و عەلی حەسەن مەجیدی دان. 

دەرنجام بەهۆکارو ئاسەۋارو کیمیاوی شەۋەو هەینی ۲۰۱٥/۰۹/۱۱ی کۆچیی دماییش کەردەن و ئاواتەکەش کە ئێستەی زارۆڵەکانش بێ بەئاکام نەیاوا و پا حەسرەتەۋە سەرەش نیاۋە.

سەرەڕاو خانەوادەو مامۆستا فەخرەدین سەلیم تەوێڵەیی، ٧٤ خێزانێ تەرێ پارێزگاو هەڵەبجەی ۱۷۰ زارڵۆلێشان بێسەروشۆنێنێ و چەمەڕێنێ ڕووێ جە ڕووان بگێڵانێۋە و چارەنۋیسشان دیاری بکریۆنە.

جە مانگەو سپتەمبەرو ساڵەو ٢٠١٩یەنە، جە (باخو گشتیی) شارو هەڵەبجەی بە مەڕاسیمێ شایستە و شکۆداری جەماوەری و بە بەشداری کەسوکاریش و بە سەرپەرشتی پارێزگاو هەڵەبجەی، پەردە سەرو پەیکەرو مامۊسا فەخرەدین سەلیم تەوێڵەیی بەنامێ (چەمەڕایی) لادریا.
پەیکەرەکە هونەمەند هونەر ساحب-ی دروست کەردەبێ و نامبریا جە ئا بارەوە واتەبێش: ئامانج جە دروستکەردەی پەیکەرەکەی ڕێزگێرتەیەن جە ژیۋای و قوربانیدای و مانیای کۆچکەردەی و گوزارەن جە ئازەکاش و ئا چەمەڕاییشە پەی زارۆڵاکانش کە جە کیمیاۋارانەکەو ۱۹۸۸/۰۳/۱٦و هەڵەبجەیەنە شەهیدۍ و بێسەروشۆنێ بیێ و دماجار بە ئا حەسرەتەۋە سەرەش نیاۋە.

هەندرێن هەورامی