جە مەریوان "یاسینەو سەرەمەرگو تیشکێ" پەردەش سەرلادریا
جە مەریوان بە مەڕاسیمێ جەماوەری گەورە کتێبو"یاسینەو سەرەمەرگو تیشکێ" جە نویستەی (ژوان ڕەحیمی)ێ، پەردەش سەرلادریا.
جە شارو مەریوان-ی، بەسەپەرشتی ئەنجومەنی فەرهەنگیی- ئەدەبیی ڕۆجیاری جە مەڕاسیمێ جەماوەری گەورەنە پەردە لادریا سەرو کتێبو"یاسینەو سەرەمەرگو تیشکێ".
کتێبەکە جە نویستەی و ئەوەهۆنای و ئامادەکەردەی شاعیرە و نویسەرە (ژوان ڕەحیمی)ێن و
جە میانو مەڕاسیمەکەنە کە سەڎان ڕۆشنۋیرێ، نویسەرێ، ئەدەبدۆستێ و هاموڵاتیێ ئامادێش بیێ و ژمارەو بەشداربییەکان بە جۆرێ فرە بێ کە بەشێوشان جە هۆڵو مەڕاسیمەکەیەنە یاگێشان نەبییەوە و جە بەرو هۆڵەکەیەنە ئامادێ بیێ. ئانە کە یاگۍ سەرنجی بێ، نیمە زیاتەر جە بەشداربییەکان ژەنی بێنێ.
جە مەڕاسیمەکەنە (ژوان ڕەحیمی)ـە، نویسەر عادل موحەممەد‌پوور، نویسەر ڕەئۆف مەحمودپوور، نویسەر سابیرعەزیزی، نویسەرە مەهوەش دروستکارە، قسێ و باسێشان سەرو کتێبو"یاسینەو سەرەمەرگو تیشکێ" کەردێ و دنیاوینی و هۆرسەنگای وێشان جەبارشەوە وست ڕووە.
کتێبو"یاسینەو سەرەمەرگو تیشکێ" ١٧٠لاپەلێن و جەلاو دەستگاو چاپ و وەڵاوکەردەیۆ (نماد ئەندیشەی) جە شارو تاران-و پایتەختوئێرانی چاپ و وەڵاو کریانەوە و ئەرکو چاپکەردەکەیش جەلاو شاعیرە و نویسەرەو کتێبەکەی (ژوان ڕەحیمی)ێ گیریان ئەستۆ و هیچ کسێ و لایەنێ یاردی و هامکاریش نەکەردێنە.
جە مەڕاسیمەکەنە چەنڎین ئەندامێ یانەو ژەناو هەورامانی ئامادێ بێنێ و چوون پشتیوانیێوی سومبولیک پەی (ژوان ڕەحیمی)ێ دەیان نوسخێ جە کتێبەکەیشان ئەسانێ و بڕیارەن بەخشاشان بە ئەندامەکانو یانەکەیشان.
