جە بیناو پەڕلەمانو ئینگلتەراینە مەراسیمو پێشوازی نەورۆزی ئەنجام دریا، کە واتەواچو پەڕلەمانی ئېژا لیندسای دۆیلی مالوڤانی پێشوازییەکەی ڕاوەبەر کەرۍ. پێشوازییەکە جە لایەن و کوردیش پرۆگریسیوە ڕێکوزیا کە مېیانەکەش ئینا شارو لەندەنینە.

جە پێشوازییەکەنە کۆمسیۆنو پەیوەندییەکا جبەرو ئەنجوومەنو گەلوو کوردی، نوێنەراو ئینگلتەرایی مەسەدەی، زیاتەر جە ٨٠ پەڕلەمانتارا پارتو کرێکارا، نوێنەراو گلېرگەی، چالاکا و ئەکادیمیسییەکۍ بەشدارۍ بێنۍ.

سەندیکاو گەمەبەی پاڵپەشتی ۋێشا پەی گەلوو کوردی بەربڕی

گاری سمیس سەرۆکو گرڎی گەمەبەی (GMB) جە مەراسیمەکەنە قسێش کەردۍ، سمیس ئەرەایاۋناش چڼین ساڵێن سەندیکاکەشا پەشتیوانی جە گەلوو کوردی مکەرۆ و واتش: "سەربەرزێنمۍ بەشداری مەراسیمەکا گەلوو کوردیما کەردەن. پېسە سەندیکاو GMB خاوەنو ٥٠٠ هەزار ئەندامانمۍ، درێژە بە پاڵپەشتی ۋێما پەی هەڵمەتۊو "ئازاڎیی پەی عەبدوڵا ئۆجالان"ی مڎەیمۍ. گرڎ کاتێ ئینایمۍ چنی ئەوەکۊشای دژو ستەمی و ئیمپرالیزمی. قەولو پاڵپەشتیما واوەی مکەرمێوە."

'گەرەکمانە گەلوو کوردی بە دەسا ۋێش چارەنوویسو ۋێش دیاری بکەرۆ'

میک ولیان سەرۆکو گرڎیی سەندیکاو ئاسلیف (ASLEF)ی، کە یۊن چا سەندیکایا کە دەورێوە گۊرە و کاریگەرش بیەن جە هەڵمەتۊو 'ئازادی پەی عەبدوڵا ئۆجالان'ینە ئاماژەش پانەی دا پەیوەندی بەینو تەڤگەرو کوردی و ئەنتەرناسیۆنالیستەکا جە ساڵۊو ١٩٩٩ینە جە کۆنفرانسێوە ئاسلیفیوە دەسشپنەکەرڎ. ویلیان واتش: "چا کۆنفرانسەنە بە زانابیەیۆ جەختما چانەی کەرڎۆ کە گەلوو کوردی مافو ئانەیشە هەن چارەنوویسو ۋێش دیاری بکەرۆ و چا سەردەمۆ تا ئیساتۍ درێژە بە پەشتیوانییەکاما مڎەیمۍ."

هەر جە مەراسیمەکەنە نوێنەرو هەرچوار پارچەو کوردەسانی قسێش کەردۍ. هەرپاسە ڕامېیاریمەدارا ئینگلتەرایچ گرنگیێوە فرەشا جە مەراسیمەکەنە نیشانە دا. سەرۆکو گرووپو دۆسایەتی کوردو پەڕلەمان  ی(APPG on Kurds) و پەڕلەمانتارو ئێکستێری، ستیڤ ڕاسی ئێم پی ئەرەیاۋناش ئاڎۍ پەی پڕۆژە کۆمەڵایەتییەکا سووریای پاڵپەشتی جە دەورو سەرمەشقایەتی کوردا مکەرا و دەسنیشانش کەرد جە نزیکۆ شۊنیرە لوای پەی پێشئامایەکا مکەرا.

هەر جە مەراسیمەکەنە یووەم ژەنە پەڕلەمانتارەو کوردی-عەلەوی ئینگلتەرای و هامکات شالیارەو تەکنەلۆجیای فریال کلاریشە سڵامش جە بەشدارا مەراسیمەکەی کەرد و پەیامو پەشتیوانیش ئەرەیاۋنا.

نوێنەرو ئەنجوومەنو سوریای دیموکراتیکی (مەسەدە)یچ سەرنجش وست سەرو پێشئامایەکا سەرانسەرو ۋەرنیشتی و سوریای و بانگەوازش کەرد کە ئی مژارە جە مېڎانی ڕامیاری و پەڕلەمانەنە بۆ بە ڕۆژەڤ.

هەرپاسە داواش جە گلېرگەی مېیاننەتەوەیی کەرد فشار جە ڕژێمو دەسەڵاتداری ئیساتۍ سوریای بکریۆ تا شێوازو هەرمانکەردەی ۋێش فاڕۆ.

پێشوازی نەورۆزی بە پەیامو پاڵپەشتی پەی ئەوەکۊشای گەلوو کوردی و پاڵپەشتی مېیاننەتەوەیی