جە سەروبەڼو جه‌ژنەو قوربانینە ژمارێوە فرە گه‌شتیارۍ جە ‌ناوچه‌كا دلېڕاسەی و پانیشت و عێراقیوه‌ سەرشا ۋنەو ناوچه‌ گه‌شتیارییه‌كا هه‌ڵه‌بجەی ‌و هۊرامانی دان، خاوەن دووکان و بازاڕەکۍ ئا مەحاڵایچە باس چانەی مەکەرا، گه‌شتیارى دلېینە به‌ ڕێژێوە فرە كه‌مش کەردەن و ئانێچ سه‌ر ۋنەو ناوچە گەشتیارییەکا ئا سنوورەیە مڎا ته‌نیا پەی ماوێوە کوڵی مەناوە و گېڵاوە.

به‌پاو ئاماره‌كا ڕاوەبەرایەتی گرڎیى گه‌شتوگوزارو هه‌ڵه‌بجه‌ی، جە ڕوانو جەژنەو قوربانینە زیاڎ جە ٥٨ هەزار گەشتیارۍ ڕووەشا جە ناوچە گەشتیارییەکا هەڵەبجەی و هۊرامانی کەردەن، ئامای ئا گه‌شتیارا پەی ناوچه‌كه‌ی به‌رده‌واما ‌و ئاماره‌كۍ ڕووە جە زیاڎ بیەی مەکەرا.