ڕابەر ئاپۆ بە ۋېیەرڎەیش دلۍ ۋەرنیشتی و کۆبانێنە، مزانی شۆڕشو کورڎەسانیش ئەرەیاۋنا. بناغەو پەکەکەی چی خاکە مبارەکەنە مجیاراوە. ئەرەمەرزناو پەکەکەی بی بە یاگۍ همێڎوو گەلی، پۊکەی گەلو کورڎی پەکەکەش جە ئامێز گېرت. گەلو کورڎی بە شۆڕشو کۆبانێ جوابوو هەرمانە و ڕەنجو ڕابەر ئاپۆیش داوە. یۊ جە ڕۊڵە قارەمانەکاو کۆبانێ ڕۊنیجان حەمۆ (ڕزگار چاوڕەش) بۍ کە چی شارو مڎرامانینە جە ئەڎۍ بېیەن. دلۍ بنەیانە و هۆزێوە وڵاتپارێزنینەگۆرەبی، کە هۊرگیرو تایبەتمەندی دڵسۊزی بە بەهاکاو کوردایەتی بۍ. ۋەرو ئی حەقیقەتەو دلۍ ژیۋایش، هەر جە زاوڵەیۆ ئاشناو پەکەکەی بی. بە تایبەت کۆت چېرو کاریگەری کۊشییای فیداکارییانەو گەریلای کە پەی ئازاڎی گەلو کورڎی هەنگامە منیا. جە بنەیانە و ئەشناسەکاشۆ گۊشش جە داستانە قارەمانیەکا گەریلای بۍ، ساڵەو ٢٠١٢ی چنی شۆڕشو ۋەرنیشتی ئاشناو ۋیرو ڕابەر ئاپۆی بی.

رۆنیجان ئا کاتەی کە دیش چەتەکۍ داعشی هرووژم مکەرا سەرو کورڎەسانی، ئیتر بە ئەرکی سەرەکی ۋێش زاناش کە بەشداری ڕیزەکاو مڎرامانی بۆ. پېسە گرڎ گەنجێوە دڵسۆزی بە خاک و چاندوو ۋێش، دژوو دەوڵەتو تورکی و چەتەکاش بە قەرارداریوە ئەرەکۊشایش دەسپنەکەرد. یاوا پا قەناعەتەی کە ماڕای دەوڵەتو ئەرەگیروو تورکی بە ئەرەکۊشایۍ پسپۆرانە مبۆ، ئینەیچ دلۍ ڕیزەکاو گەریلاینە فەراهەم مبۆ.

پی جۊرە نامۍ ڕزگار چاوڕەشیش پەی ۋێش هۊرچنیە و ڕووەش کەردە کەشە ئازاڎەکا کورڎەسانی. بە ویست و ئەنەیاوایۍ گەورۆ بەشدارو دلۍ ژیۋای گەریلایەتی و کەشەکا بی. ڕۆ دماو ڕۊی زیاتەر ۋێش وەڵۍ وزۍ. سەرو بنەماو فکر و فەلسەفەو ڕابەر ئاپۆی جە ڕوو سەروازی، ڕێکوستەی و فەلسەفەیۆ پەرە بە ۋێش دۍ. بە ئیراڎێوە بەقوەتۆ جە کۊششەنە بۍ پەی یاوای بە ئامانجەکاش. ژیۋایۍ ئاساییش پەسەنڎ نەکەرد، پۊکاتی بی بە یاگۍ وەشەسیایی هامڕاکاش.

ئەرەکۊشای جە جەنگە قورسەکانە کەرۍ

ڕزگار جە ڕۆزگارێوەنە لووا پەی کەشەکا کورڎەسانی کە دەوڵەتو ئەرەگیروو تورکی بە گرڎ جۊرە چەکێوە کیمیاوی و قەڎەغەکریا هرووژم کەرۍ. ئی هرووژمۍ توڕەیی ڕزگاری زیاتەر مکەرۍ. پەی پاکۊکەردەی وڵاتەکەیش جە ئەرەگیری گەرەکش بۍ حەقەو گەشمەرڎا جە دوژمنی بکەرۆوە. پۊکاتی زانۍ کە مشۊم جە گەریلایەتی سەردەمی تازەینە شارەزابۆ و سەرو ئی بنەمایۍ بەشدارو پەروەرەردەی پسپۆری سەروازی بی. جە سەرەتانە بەشدارو پەرەوەردەو نیشانە ماڕۍ بی، جە مودۍ کەمەنە بی بە نیشانە ماڕێوە پسپۆر، بەڵام هەر چینەینە نەمردا بەشدارو پەرەوەردەو چەکی قورسی بی، بی بە گەریلایۍ پرۆفیشناڵ چا مەجالەنە. دماو هۊرگېرتەی پەروەردەی سەروازی و فکری، ئیتر ئامادەیش جە ۋێشەنە شکە بەرد کە دژوو دەوڵەتو ئەرەگیری تورکی گژیۆ. پی ئامانجۆ لووا پەی هەرێموو گەشمەرڎە دەلیلی جە ۋەرنیشتوو زاپی کە جەنگکەردەی چنەشەنە ئاسان نەبۍ.

چڼین جارۍ بەشداری جەنگیش کەرڎ و بەسەرەوەری ۋێشۆ جە مېڎانەکانە دژمنی ماڕۍ. جە هەر مېڎانێنە بەشداری جەنگیش کەردەبیۍ پېسە میلتانێوە ئاپۆی بە بێ کەموکوڵی ئەرکەکاش جابەجۍ کەرۍ. پەی ئانە حەقەو هامڕایاش بسانۆ بە تەمامی دژوو دەوڵەتو تورکی چالاکی کەرۍ. پەی سەرکەوتەی جە چڼین چالاکیېنە لووۍ سەرو پێگەکاو دوژمنی و دلېشانە بەرۍ.

جە دما چالاکی ١٢/١/٢٠٢٤ ینە بەشداریش جە ئۆپراسیۆنی شۆڕشگێڵنی گەشمەرڎە هەڵمەت دێرەلوکینە کەرد. چنی سەرخۆبوونی هامڕایش ۋێش یاونا دلۍ سەنگەرەکاو دژمنی. چی چالاکیەنە کە ٦١ ئەرەگیرۍ سزادریۍ و ڕزگار چاوڕەش و سەرخۆبوون سەرحەد (سەفا ئالتونای) هامڕاش گەشمەرڎۍ بیۍ و یاوۍ بە کارەوانوو نەمرا.