ھجومەکە مەنتیقەو دێری ئیسماعیل خانیەنە جە ویلایەتو خەیبەری و نزیک بە سنووروو ئەفغانستانی ڕووەشدان.

ئاژانسو هەواڵو فەرەنسای جە زۋانوو ۋەرپەرسێوە وەڵاش کەردۆ، "فرەو کوشیایەکا جلوبەرگی مەڎەنیشا وەرەنەبییەن. پۊکەی هەڵای دیار نییا کە ئاخۆ گرڎوو کوشیایەکا مەڎەنیۍ بیېنۍ یان سەروازیۍ".

ئا ۋەرپەرسە ئاماژەش پانەی کەردەن، کە لاوکەمیۆ ٢٣ کەسۍ بە مەڵامەتوو ھوجوومەکەیۊ کوشیېنۍ ٢٧ کەسېچ زامڎارۍ بیېنۍ.

گروپێوە بە نامۍ جمیەروو جیهادی پاکستانی کە سەر بە جمیەروو تاڵیبانوو پاکستانین ھجومەکەش جە ئەستۆ گېرتەن.

جەدماو ئابوو ٢٠٢١ یوە کە تالیبان ئەفغانستانەنە دەسەڵاتش گرتەن دەس، ئاژەو ئەمنی جە مەنتیقەکە سنوورییەکا پاکستانیەنە خراپتەر بییەن.

ئیسلامئاباد بانگەشەو ئانەیە کەرۊ کە بەعزۍ چا ھجوما کە جە مەنتیقەسنوورییەکانە ئەنجام مڎریا، دلۍ خاکوو ئەفغانستانیەنە پلانەشا پۍ منریۊرە، بەڵام کابول ئانەیە رەڎ کەرۊوە.

تالیبانو پاکستانی جە دماو دمایی ئامای ئاێربەسی جە تشرینوو دووەموو ٢٠٢٢ ھجومەکېش پۍ سەرو پۆلیسی و هێزە ئەمنییەکا زیاتەرۍ کەردېنۍ.

تالیبانو پاکستانی کە گروپێوە ئایینییەنۍ و ساڵەو ٢٠٠٧ ئەرەمەرزیېنۍ و فرەو جاری هېزەکاو سەر بە دەوڵەتوو ئیسلامئابادی کەرا نۍ ئامانج.

جە١٠ ساڵی ۋیەرڎەنە زیاڎ جە ١٠ هەزار مەڎەنیۍ و ئەنڎامۍ هێزە ئەمنییەکاو پاکستانی جە ئاکاموو جەنگی و ھجومەکا ئا گروپەینە کوشیېنۍ.