ئەندامو کۆمیتەو ڕاوەبەری پەکەکەی دوران کاڵکان واتش: "جە کردار و گوفتاریچەنە ئاکەپە هیچ فاڕیایێش نەکەردەن. کۊششەکۍ ڕابەر ئاپۆی دما چانسەنە پەی ڕزگاربیەو تورکیای. گرڎ کاتێ ئینایمۍ پەشتەو پرۆسەکەو ڕابەر ئاپۆیۆ."
ئەندامو کۆمیتەو ڕاوەبەری پەکەکەی دوران کاڵکان جوابو پرسیارەکا مەدیا خەبەر تیڤیش داوە. هۊرسەنگنای و جوابەکۍ دوران کاڵکانی پی جۊرەنۍ:
"وەڵۍ گرڎ چێوێنە سڵامو وێما مکیانمۍ پەی ڕابەر ئاپۆی کە ماناڎارتەرین مڎرامانی تاریخی ڕاوەبەر مکەرۆ. جە ساڵەی ۋېیەردێنە دووۍ دیدارۍ چنی ڕابەر ئاپۆی ئەنجامدریۍ. دیداری یووەم چنی برازاکەیش و دیداری دووەم چنی شاندو دەم پارتی ئەنجامدریا.
بەیاننامە دریا بە ڕای گرڎی، پېسە پەیامەکاو ڕابەر ئاپۆی. دماتەر شاندەکە دەسش بە هەرمانەکاش کەرد. چنی ناوەندە گرڎییەکاو پارتەکا پەڕلەمانی گلېرۆبیەکۍ کریۍ. گلېرۊبیەیشا چنی بڕۍ کەسایەتیا کەرد. چی دماییەیچەنە ئەرەیاۋنێوەشا سەرو گلێرۊبیەکا وەڵا کەرڎۆ. هەرپاسە پېوەس بە دیداری چنی ڕابەر ئاپۆی جە ڕاو ئەرەیاۋناکاوە بڕۍ زانیاریێشا ئەرەیاۋنۍ.
بە وردی شۊنیرەلوایما پەی ئینیشا کەرڎ، بەردەوامێچەنمۍ. کۊشش مکەرمۍ کە جە پەیامەکاو ڕابەر ئاپۆی بیاومێنە. هامکات جە هەرمانەکاو شاندەکەو دەم پارتیچ. جگە چینەی هیچ زانیاریێوەما سەرش نییا. هەڤاڵ جومعە ئاماژەش پانەی دا، هیچ داواکاری، پەیام و بانگەوازێوە ڕسمیما تا ئیساتۍ پەی نامان. پۊکەی دلېینەو گفتوگۆکا نمەزانمۍ. هەرپاسە چېوۍ نیا داواما ۋنە کریابۆ.
چێوۍ فرۍ وچیا، بەڵام جە پراکتیکەنە هیچ ئاژێوە جیاواز نیا ئارانە. مشتومڕێوە بۍ کە فرە گرنگ و ماناڎار بۍ. ڕاوەبەریما دەربارەو ئینەی ئەرەیاۋناش وەڵا کەرڎۆ. گرنگیما دا پی گفتوگۆیا و بە گرنگما زانۍ. پەی ڕای گرڎی و پەی ۋێچما ئانەما ئاشکرا کەرد بە ۋەرپرسیاری ۋێما هۊرسەنگنمۍ. موخاتیبما ڕابەر ئاپۆن. گرڎ کاتێ ئینایمۍ پەشتەو ئا پرۆسەیۆ کە ڕابەر ئاپۆ دەسش پنەکەرڎەن.
جە ئیسەو ئایندەیچەنە ئینایمۍ چنیش و بە پاو قەرارەکا ئاڎیی جمێوە. ئینەما بە ئاشکرا باسکەردەن. بەڵام جیا چینەی ئێمە هیچ پراکتیکێوە نمەوینمۍ. نە جە گفتار و نە جە کرداریچەنە بە تایبەت جە لایەنو ئاکەپەیۆ هیچ فاڕیایۍ نیا ئارانە. بڕۍ ئەرەیاۋنۍ ژەعر دەمشانە مۍ جبەر. بە پاو ۋێشا نزیکایەتیێوە سووک و بێ مانا گێرانە ۋەر. هەڵبەتە قینە بەرایەتی مکەرا. بەڵام جە حەقەتینەنە ئاژەو کەسی و هەرزانی ۋێشا نیشانە مڎا.
بێگومان دلۍ پارتە جیا جیاکانە هاندای هەن. جە لێوەتەرۆ پراکتیکشا بەردەواما. چی پراکتیکەیشانە هیچ فاڕیایۍ ڕووەش نەڎان. هرووژمەکۍ سەرو گەلی، گێرتەی، سەپنای قەیومی بەردەوامێنۍ. جە ئیمراڵچەنە پېوەس بە ئاژەو ڕابەر ئاپویۆ هیچ فاڕیایۍ نەکریان. بەڵێ چەمپنەکۊتەی بۍ. ئینەیچ جە ئاکامو ئەوەکۊشای هەڵمەتۊو جەهانی پەی ئازادی ڕابەر ئاپۆی ئاما ئاراوە.
وەڵتەریچ باسمە چینەی کەرڎەن، ئینە سەرکەوتەیۍ بۍ. ڕاوەبەریما ئەرەیاۋنایش دا. دەسنیشانش کەرد دڎان بە گۆشەگیرییرە نریان. ئینە هۊرسەنگیا و هۊرسەنگنایۍ درووسا. بەڵام جیا چینەی هیچ پراکتیکێوە نیا. پېوەس بە ئاژەو ڕابەر ئاپۆیۆ هیچ فاڕیایۍ جە لایەنو دەسەڵاتداریییوە ئەنجام نەدریان. زانیارییما نییا.
ئانۍ داوا و بانگەوازیشا کەرڎ، ئانۍ ۋەرپرسیارێنۍ ئەر جددیێنۍ با هەنگامەی کردەییە بنیا'
بەڵی بێگومان گۆشەگیری بەردەواما. سیستەمو ئیمراڵی هەر پېسە ۋێش بەردەواما. پێوەس پینەی هیچ هەنگامێوە کردەییە نمەوینمۍ. بەڵێ، گفتوگۆ کریان. شاندەکەو دەم پارتی دیدارش کەردەن، پارتە سیاسییەکۍ تورکیای ئەرەیاۋنای و قسێشا بێنۍ. ئینە گرنگ و مانادارا. بەڵام ئینۍ گرڎ تەنیا گفتوگۆن. پراکتیکەکۍ پاو وەشحاڵی گفتوگۆکا نییەنۍ. پەی نموونەی نمەزانمۍ جە پەڕلەمانەنە هیچ کارێ مکریۆ یا نا. ڕۊشن نیا هەموارکەردەیۆ و سەرڕاس کەردەیۆ یاسایی هەن یا نا. دەوڵەت باخچەلی داوا و بانگەوازش کەرد. چڼین لایەنۍ تەرێچ بەشدارۍ بانگەوازییەکەی بێنۍ. واتشا، با ڕابەر ئاپۆ بێنە پەڕلەمان. واتشا با جە گرووپو دەم پارتیینە قسۍ بکەرۆ. خاسا ئاڎ چنی جە ئیمراڵینە بەربشۆ و بۍ؟ با بۍ. کێ کۊسپا ۋەردەمو ئینەینە؟ پەی ئامایش، ئایا ئانۍ کە داواشا کەردێنە و ئی بانگەوازییەشا کەردەن هیچ چێوێشا ئەنجام دان پەی ئی هەرمانۍ؟ کۊششا کەردەن؟ هیچ کۊششێوەشا هەن؟ هیچما نەڎیی. پا مەعنۍ بەبێ ئانەی حیچ فاڕیایی کریۆنە داوا جە ڕابەر ئاپۆی کەرانە داواکاشا جابجێ کەرۆنە و جە چەمەڕای ئاڏشانێ. ئینە هەرمانێوە کردەنی نییەنە. ئەر جددی بانە، ئینەیە بە گرنگ وینمێ و مانادارا. پەشتگیری مکەرمێ. یانی با حیچ کەسێ نەواچۆنە پەکەکە فڵان چيو ماچۆنە، جە دژش مڏمێوە. حیچ چێوێ چی جۆرە بییەیس نییا. پێسەو تەڤگەر و گەلی بە سەرنجدارییۆ چەمدێری پرۆسەکەی مکەرمێنە. بەڵام ئانێ ئی داوێشا کەردێنە، ئانە گەرەکشانە چێوێ ڕووەدۆنە، بەو پاو ئانەی هەرمانە مەکەرانە و مەجوڵیاوە. ڕابەر ئاپۆ واتش، ئەر هەلومەرجەکێ بڕەخسیانە ئانە متاونە دەوری پراکتیکی و تیۆری وێم گێڵنونە. چی دۆخەو ئیسەیشەنە متاوۆنە چێش کەرۆنە؟ چەنین قسێ کەرۆنەو و ئەرەیاونێ بڏۆنە؟ مەتاونە حیچ چێوێ واچۆنە. بە ئیسەیشۆ مەتاوۆنە قسەکاش وەڵا کەرۆوە، هەرکەسێ وەڵاشا بکەرۆوە تاوانەنە. نەک بە تەنیا کتێبەکێش بەڵکوم پاریزنامەکێشش گلێرێ کریاوە. چێوێ کە بە شێوێوە یاسایی ئەنجام دریان. کێ میاوۆنە ئینەی بکەرۆنە؟ پۆکەی هەوڵدای نییا. حیچ مەوینمێ. هەڵبەتە پەنەوازش بە پراکتیکی هەن. ئانێ ئی داوێشا کەردە و ئانێ وەشبەختی خوڵقنانە ئەر جددیێ بانە ئاکاتە مشۆم هەنگامێ پراکتیکیێ بنیانە. با بارودۆخێ گونجیای خوڵقنانە کە ڕابەر ئاپۆ تاوۆنە جە گرووپو دەم پارتیینە قسێ بکەرۆنە. با ڕاش پەی بکەراوە تا تاوۆنە سیاسەت بکەرۆنە. با خاوەنو بارودۆخو هەرمانێ و ژیوایێ ئازادیش بۆنە. با ئیتر دمای بە سیستەمو گۆشەگیری و ئەشکەنجەی ئیمراڵی بێنە. جە کاتێنە ئا سیستەمە بەردەوام بۆنە . ئینە بابەتێوە درووس و ڕاس نییا.
مەواچمێنە گرڏ چێوێ ئەرێنییا، بەتایبەت ئانێ ئی داوێشا کەردە، ئانێ چی هەرمانێ وەرپرسیارێنێ، ئانێ بە ڕاسی گەرەکشانە چێوێ بکەرا، دۆخەکەی فاڕانە، ئەر باوەڕییشا بە قسێ وێشا هەن ئاکاتە با هەنگامێ کردەیی بنیانە.
'نمەبۆ هیچ کەموکوڵی و لاوازیێوە جە ئەوەکۊشاینە بکریۆ'
جگە جە ئەوەکۊشای هیچی تەر نییا. پېسە چنی تا ئیساتۍ پەی ئازادی جەسەیی ڕابەر ئاپۆی و چارەسەری پرسو کوردی جە چوارچێوەو 'هەڵمەتۊو ئازادی مېیاننەتەوەیی'نە چالاکی کریان، گەلوو کوردی و دۆسەکێش جە چوار پارچەو کوردەسانی، جە گرڎ لێوە جەهانی مشۊم بەردەوامی بڎا پی هەڵمەتۍ و ئەوەکۊشایشا بەردەوام بۆ. نمەبۆ تەنانەت لاوازییێوە گولانەیچ بۆنە. بە ئەوەکۊشای متاویۆ هەنگامە پا کەسا بنریۆ کە قسۍ مکەرا و جابەجێش نمەکەرا.
گرڎ چێوۍ بە ئەوەکۊشای فەراهەم بۆنە. کەواتە چا کاتەنە مشۊم ئەوەکۊشای ۋەرفراوانتەر بکریۆ و بە میتۆدی جیاواز ڕاوەبەر بکریۆ و بیاوۊ بە ئەنجام.
بەڵێ، چا ڕوانگۆ هەڵمەتۊو ئازادی دەرەنجامی گرنگش بەدەسئاوردەن. واتما پی جۊرە بۆنە. بەڕاسی واتما وەڵێکۊتەی هەمیشەیی جە چوارچێوەو ئامانجەکا هەڵمەتۊو ئازادیینە بۆنە. جە ئیساتێنە ڕا وەردەمو ئینەینە کریانۆ. بەڵام پەی وەشکەردەی و ئەنجام هۊرگېرتەی مشۊم زیاتەر کۊشش بکەرمۍ، ئەوەکۊشایۍ کاریگەر ڕاوەبەر بکەرمۍ. جارێوەتەر سڵام جە ئەوەکۊشای هەڵمەتەکۍ مکەرمێوە. بانگەوازیما جە گەل و دۊساما بە بەهێزییوە ئەوەکۊشایشا بەردەوام بکەرا.
٢٠ ساڵۍ چێوەڵی جە کاتو پرۆسەو یاسایینە، چا کاتەنە ڕابەر ئاپۆ ۋەرگری جە ۋێش کەرۍ، جە پارێزنامەکاو ۋێشەنە ئی ئاژەشە هۊرسەنگنا. شەرتەش نیارە. واتەبێش، ئەر پی جۊرە ئەنجام بڎریۆ ئی ئەنجامە مېنە ئاراوە، پاجۊرە ئەنجام بڎریۆ دەرەنجامێوە پا جۊرەشە بۆ. قسەکۍ ڕابەر ئاپۆی یۆ بە یۆ مەیانە دی. مشۊم وەڵۍ گرڎ چێوێنە گرڎ کەسێ ئینەی بوینۆ. نمەبۆ بە سووکی نزیکۍ ئیمراڵی باوە. کەسانۍ سووکۍ هیچ مانا و قیمەتێوەشا نییا. ئیتر جەهان ئینەش قبوڵ کەردەن. گرڎ کەسێ قبوڵش مکەرۆ. چن کەسێوە بێ ئیرادۍ بەرکۊتێنۍ و هەوڵمڎا پشێوی وەش بکەرا. هیچ مەعنێوەشا نییەنە. جە لێوەتەرۊ چنین بۍ؟ دووۍ لایەنێش هەنۍ؛ یووەم، ئێمە ئەوەکۊشمۍ. پەکەکە بە سەرمەشقایەتی ڕابەر ئاپۆی زیاتەر جە پەنجا ساڵان چی بوارەنە ئەوەکۊشۆ. پەی ئانەی ئی ئاوەزیەت و سیاسەتە بواڕیۆ. ئانەی گەرەکما بۍ فاڕمێش چێش بۍ؟ ئاوەزیەت، سیاسەتو قڕکەری، چەوەسنەری، فاشیست و دژمنو کوردان. کە چل ساڵێش ۋېیەرنان. جەنگو ئازادیما ئینا ساڵۊو ٤١ـەمینینە، بە شێوێوە سەرەمڕە بەردەوامە. هرووژمە قڕکەرەکۍ جەنگی تایبەتی کە سەرو بنەماو 'پلانەو چالاکی دلێنەبەردەی' ڕا مکەرۆ ١٠ ساڵێش پەڕ کەردەنۆ.
'جەنگش کەرڎ، نەتاواش ئەنجام دەس وزۆ، ئیساتۍ شۊنەو چارەسەری تەریرە گێڵۊنە'
جمیەرو ئازادیما و گەلەکەما مڎرامانێوە قەوتشا ڕاوەبەر کەرد. چا هەلومەرجەی کە بۍ، ئانۍ پلانەکێشا ئاماڎۍ کەردە و جابەجێشا کەردە نەیاوۍ مەرامو ۋێشا و ڕووبەروو شکسی بیێوە. حکومەتو فاشیستی ئاکەپە – مەهەپەی یاوۍ بە ئاستو هۊرشێویایۆ. چێششا کەرد؟ گرڎو ئیمکانو تورکیایشا بەکار ئارڎ، جە گرڎ لێوە پاڵپەشتییشا هۊرگێرت، جە ناتۆ، چین، ڕووسیا، جە گرڎ لێوە پەشتیوانیشا هۊرگېرت، گرڎ جۆرە چەکێوەشا بەکار ئارڎ، ئەخلاق و یاساکێشا پاشێلۍ کەردۍ، بەهەزاران تاوانۍ جەنگیێشا جە هرووژمەکاشانە ئانجامدۍ و سەرنەکۊتۍ. گەریلا قارەمانەکۍ کوردی جە زاپ، مەتینا، ئاڤاشین، هەرێمەکاو پارېزنای میدیای و سەرانسەرو کوردەسانینە ئازایانە سەرو هێڵۊو فیدایی بیەی مڎرامانی کەم وێنەشا ڕاوەبەر کەرڎ و قارەمانیێوە تاریخیشا تۆمار کەرد. ژەنا و جوانا کوردی شەو و ڕۆ بە هۆشیاری و ڕێکوستەی بێوێنۆ ئەوەکۊشایۍ گۊرەشا ڕاوەبەر کەرڎ. هەرپاسە گەلو کوردی و دۆسەکێشا جە چوار بەشۍ کوردەسانی و جبەرو وڵاتی دەسشا بە ئەوەکۊشای کەرد. ئی کۊششە دماجار جە ١٠و ئۊکتۊبەرو ٢٠٢٣ بەدماوە سەرو بنەماو چارەسەری پرسو کوردی و ئازادی جەسەیی ڕابەر ئاپۆی، بی بە چالاکی پلان پەی مجیایرەی و ماوەو ساڵێوەش ۋېیەرنا و پاش نیا ساڵەی دووەمو ۋێشۆ و شکسش بە گۆشەگیریێوە ڕەهای ئارڎ. پەی ڕزگاربیەی چا ئاژەیە شۊنەو چارەسەریرە گێڵۍ. دەوڵەت باخچەلی، یووەم کەس بۍ کە شۊنەو چارەسەریرە کۊت هەوڵدایۆ. پەی چێشی؟ چونکی ئا جەنگش ڕاوەبەر کەرڎ. ئاژێوە ئاشکرا و ڕۊشنا گرڎ کەسۍ چنەش مېیاوۆنە. ماچا چی هەوڵدایەکۍ جە لایەنو دۊڵەت باخچەلیوە دەسش پنەکەرڎ؟ من ئا کاتەیچ واتم ئەی کێ دەسش پنەکەردەبیۍ؟ ئا کەسەی جەنگەکەی ڕاوەبەر مکەرۆ جە لایەنو ئاڎیۆ دەسشپنەکریان، ۋەرو ئانەی جە جەنگەکەنە نەتاواش ئەنجام گێرۆ، بێچارە مەنۆ. ئیساتۍ شۊنەو چارەسەرێوە جیاوازیرە گێڵۊنە. ئینە چێوۍ ئاساییا. کەواتە ئینە لایەنێوە مەسەلەکێن. ئینەیچ ئاشکرا بی. جە دماینە چانەی یاوێنە کە نمەتاوا درێژە بە هرووژمەکاشا بڎا. پۊکەی نیەنۍ ئاستێوەنە کە بتاوا مەرامەکاشا بارانە دی
جە لېوەتەرۆ ئینە بەرکۊتەو جەنگی جەهانی یەرەمین کە ماوەو ٣٥ ساڵان جە ۋەرکۊتوو مېیامینینە ملۆڕاوە. ئی جەنگە بەردەوام یاگۍ هۊرسەنگنایا. سەرەتا بە جەنگ و قەیرانەو کەنداوی دەسش پنەکەرڎ، دماو هۊرشێونایۆ یۆبیەی سۆڤیەتی، سەرو بنەماو ستراتیجو سیستەمی تازەو جەهانی ئەمریکایۆ، ماوەو ٢٠ساڵان جە دەورو کەنداوی جەنگ ڕووەشدا. زیاتەر جە ١٠ساڵا، نزیکەو ١٥ ساڵا، پەی مسۆگەرکەردەی کۆنترۆڵو ۋەرکۊتوو بەحرو مېیامینی جەنگ ڕاوەبەر مکەرا. جەنگەکە جە مابەینو سیستەمو سەرمایەداریی جەهانی و دەوڵەت نەتەوەینە کە بەمەڵامەتو جەنگی جەهانی یووەمیۆ ئەرەمەرزیۍ ڕووەشدا. سەرەتاو ئی جەنگەیە جە عێراق و جە وڕنای ڕژێمو بەعسیوە دەسش پنەکەرڎ. جەنگو غەززەی جە ٧و تشرینو یووەمو ٢٠٢٣ دەسش پنەکەرڎ. ئا ڕووەدایۍ دماتەر ڕووەشا دا، کەم تا فرە گرڎ ئاگاڎارێندۍ. چی؟ چونکە وەڵۍ ئانەینە ئانۍ جەنگ کەرێنۍ مەرامو ۋێشا ئەرەیاۋنا. باسشا جە پرۆژەی گۊرەو ۋەرکۊتوو مېیامینی کەردەبۍ، فرەو چێویچ بە پەنهانی مەنۆ. بەڵام دماو گلېرۊبیەو قولەپۊپەو گروپو ٢٠ جە هێندستان گرڎ چێوێشا ئەرەیاۋنا. یانێ پڕۆژەی تازەو بازرگانی و وزەیشا جە هێندستانۆ ئاشکرا کەرڎ. سەرەتا دەوروبەرو کەنداویشا وست چېرو هەیمەنەو وێشاوە دماتەر دەوروبەرو سعودیەیشا کۆنترۆڵ کەرد. دماتەر بە سەرکردایەتی ئیسرائیلی ۋەرکۊتوو بەحرو مېیامینی کۆنترۆڵ مکەرا. واتە ڕاکۍ پاک مکەراوە. بێکاریگەر کەردەی حەماسی سەرو ئی ئەساسیە بۍ. ئا کاتە واتما، لوبنان گنۆ دلۍ ئا پلانێوە. چونکی ڕاکێشا ئاشکرا کەردەبۍ. هەرپاسە٣ واتما دماتەر مېیاوۆ سوریا. ڕێک پاسە بۍ. ئیسرائیل کە پەشتگیری ئەمریکا و ئەوروپایش هەن، دیارە کە ئامادەکاری فرەش پەی کریابۍ. دماتەر ئاشکرا بی کە پلانەو دماتەری سوریان. دماو ئانەی حزبوڵا گورزێوە قورسەش ۋەرکۊتە، ئینە پا مەعنۍ بۍ کە ئێران گورزەش ۋەرکۊتێنە. دماو ئانەی ترەمپ جە هۊرچنیەکا ٦و تشرینو دووەمینە سەرکۊتەیش بەدەسئاورد، دەرفەتو ڕێککەوتەی چنی ڕوسیای پەی حکومەتو ئەمریکای ئاما ئاراوە. جە ماوەو یەرۍ حەفتانە ڕێککەوتەی پەنەوازشا ئەنجامدا. دماو ٢٠ڕووا جە هۊرچنیەکا ئەمریکای، هرووژمشا کەرڎ سەرو دەسەڵاتو ئەسەدی و جە ماوەو حەفتێوەنە ڕژێمو بەعسی جە سوریانە وڕا.
'ئەر تورکیا نەفاڕیۆنە، دیموکراتیک نەبۆنە وڕۆنە'
کۆڵەکێ عەرەبی، پێگەو دۆڵەت نەتەوەی کە جە دماو جەنگو جەهانی یوەمیۆ جە وەرکەوتوو دلێڕاسەینە ئەرەمەرزیارە، هورشێونایۆ. چیێشش مەنەنۆ؟ تورکیا و ئێران مەنێنێ. تورکیا و ئێران زلهێزه هه ژموونوازەکا هەرێمیەکێ دۆخو ئیسەینێ. پۆکەی کاتو هورشانایۆ دۆڵەت نەتەوەو تورکیای و ئێرانین. هرووژمەکێ سیستەمی سەرو ئی بنەمێ ملا ڕاوە. ئێران جە نزیکۆ هەست بە دۆخەکەی مکەرۆ. هەوڵ مرۆنە با جۆرە مامەڵە بکەرۆنە. هەرپاسە دەسەڵاتو قووڵو تورکیایش هەستش بی چێوەی کەردەن. هەرپاسە دۆڵەتو باخچەلی پرسو مەنەیۆ دۆڵەتیش وست ڕۆژەڤۆ و جە ١ی تشرینو یوەمینە دەش بەقسەکەردەی کەرد. داواشا کەرد، با دلێنە یۆبییەی وەش کەرمێنە، تەنیا بی جۆرە متاومێنە مەنمێوە، ئەگینا تورکیاچ هورشنریۆوە. جە حەقیقەتەنە ئەر تورکیا وێش نەفاڕۆنە، دەس بە دیموکراتیک بییەی نەکەرۆنە، هەرپاسە پرسەکەی چارەسەر نەکەرۆنە، وڕۆنە.
پێسە چنین دۆڵەت نەتەوەکێ عەرەبی دلێنە شیێ، چارەنووسو دۆڵەتو تورکیاچ بەهەمان شێوە بۆنە. تاکە چيوێ کە متاوۆنە ڕاگیری چی هورشانایۆ بکەرۆنە دیموکراتیزە کەردەو تورکیاین سەرو بنەماو چارەسەری پرسو کوردی. ئەڵبەتە دیموکراتیزەکەردەو تورکیای تەنیا بە چارەسەری پرسو کوردی و ئازادی بەدی مێ. یانێ کڕێڵو چارەسەری پرسو کوردین. یانی کڕێڵو دیموکراتیزەکەردەی تورکیان. پۆکەی بە نامێ یۆبییەی داواشا جە ڕابەر ئاپۆی کەرد و پێسەو لایەنو پرسەی چنیش نیشارە. ئێمەچ دۆخەکەما بە گرنگ زانا. لێدوانێ پاسە ئاشکراو سەرۆکو مەهەپەی، دۆڵەتو باخچەلی کە هەر جە سەرەتاوە جەنگی کۆمکوژی دژو کوردی بە شێوێوە ئایدیۆلۆژی و سەروازی بەردەن ڕاوە، هەنگامێوە گرنگ بێ. بەڵام ئەنجامەکەش چێش بۆنە؟ واتما، ملمێ سەرو ئانیشا دژو ئی بابەتەینێ جە عێڕاقەنە، هەرپاسە قوبرس وسیۆ بەرنامەو هەرمانێشا چونکە پرسو دوورگەکێ ئاگەی ئینێ ئارانە، پۆکەی جە ئیسۆ باسو جە قوبرسی کریۆنە. تورکیا جە دژو ئینەی هەڵوێسو وێش نیشانە دا. قەیوم جە ئاکدەنیز نریارە. ئی نیارە پەیوەندیش با پرسەیۆ هەن. هرووژمەکێ دۆڵەتو ئاکەپەی پەی سەرو شارەوانییەکا پەیوەندیش بە سیاسەتو قەیومیۆ هەن، بەڵام چی کاتەنە نیارەو قەیومی جە شارەوانی ئاکدەنیزو مێرسینینە پەیوەندی راسەوخۆش بە قوبرسیۆ هەن. پۆکەی گەرەکشانە ڕای پەنەوازە گێرانە وەر، بەڵام ئی ڕێ حیچ کاریگەریێش مەبۆنە. ئاڏرێ گەرەکشانە قۆڵو وێشا، واتە پێگەکاشا بەهێز بکەرا. یانی وێشا پەی جەنگی ئامادە مکەرا، بێگومان پێسە واتما ئینە چارەسەری نییا.
ئی پرۆسە بەجۆرێ کەوت ڕۆژەڤو ڕاوەبەرایەتی تورکیای.خاس چنەش یاودێنە یان نا؟ هەرپاسە هۆرسەنگنای دروسش پەی مکەردێ یان نا؟ ئایا تاوتێنە سیاسەتێوە نەرم بەردێ ڕاوە پەی چارەسەرو کێشەکا یان نا؟ ئایا هێزە دیموکراتیکەکێ متاوانە جە پرۆسەکەنە دەور وینا یان نا؟ ماوێ کەمەنە گرڏ چێوێ ویندێ. ڕابەر ئاپۆش دەسشوەڵوستەن.
'پەنەوازا پارتەکێ تەرێ یۆبیەتەرۍ بانە'
شاندەکە خاوەنو ئەزموونین. جە کەشێنە کە بڕێ لایەنێ ناوەرپرسانە جە بڕێ ئەرەیاونێنە هەوڵێ راس و وەرپرسیارانە مەبەرا ڕاوە، ئەنجامەکێشا ئەرەیاونێ. ئاڏرێ لوای وەڵێشا ئەرێنی وینا، گەشبینێنێ، بەڵام نیگەرانییەکێشا بەربڕیێ. هەرپاسە نیگەرانییەکێشا جە ماوەو گلێرۆبییەکانە وینریێ. زیاتەر پەیوەندیش بە ئاکەپەیۆ بێ. دیارا ئاڏرێ جدیێ نییەنێ. قسەکێ تەیب ئەردۆغانی و بەشێ جە ڕاوەبەرا ئاکەپەی پێسەو یۆینێ. بەردەوام تەرسی هەنە. ئاڏرێ گەرەکشانە کەشێ وەش کەرانە کە هەستو ' من سەرکەوتەی دووەمەناو ئی جەنگەم بەردەنۆ'. بەڵام حەقیقەتەکەش بی جۆرە نییا. ئی دۆخە خەڵەتا و تەرسیش هەنە. ئینەیچ جە قسەکەردەو شاندەکەینە بەرکەوتەن کە: وەڵێ گرڏ چێوێ، بە ڕاس یان بە خەڵەت، ئینە ڕۆژەڤو گفتوگۆەکێ تورکیایش دیاری کەردێ. ئینەیچ ئەرێنی بی. چونکە دیموکراتیزەکەردەو و کڕێڵو پرسەکەی کوردا. هەرپاسە موخاتەبی سەرەکی پرسو کوردین و ڕابور ئاپۆن. پۆکەی بییەو ڕابەر ئاپۆی جە ڕۆژڤو گفتوگۆکانە دۆخێوە ئاساییا. بەڵام پێسەو پەنەوازی باسش چنە نەکریان، بابەتێوە جیاوازا، من بە شێوێ جیاواز وینونەش. بەڵام گفتوگۆی بی جۆرە گرنگا.
مێڏانو گفتوگۆیەکا چێشش سەرەرە ئاما؟ ئێمە ویناما، ئی جۆرە پرۆسە یوەم جارش نییا دەسش پنکەردەن، وەڵتەر ئێر بەس ئەرەیاویا، ڕابەر ئاپۆ و پارتەکەما پرۆسەی هامشێوەش ئەنجامدان، هیوا و نائومێدیش بێ، هورشنریاوە پۆکەی یاوایمێ ئی ئاستە. واتە حیچ دۆخێوە تازە نیا ئارانە. پۆکەی ئەزموون و زانیاریما هەن. بەبەراورد چنی ویەردەی، فرەو لایەنەکا، ماییانگەو سیاسی، حیزبەکا جەیۆیۆ نزیکێنێ. پۆکەی بڕێ جە پرۆسەکەی یاوێنێنە، واتە تەماشەکەردێوە هامبەشا هەن. بەڵام فاڕیێوە تەمام فکری و سیاسی بییەیش نییا، یانی واچانە ئی دۆخە بی جۆرە وەڵکەوتەی بە وێشۆ مەوینۆنە، پەنەوازا فاڕیۆنە. ئینەیش خاسا، ڕەنگە یۆبییەی بۆنە. بەڵام گرڏشا پێسەو یۆی نییەنێ.
جە کاتو دیدارەکا و ئەرەیاوناکا، شاندو ئاکەپەی واتش: 'گفتوگۆما ئەنجامدا'. حیچ کام جا شاندەکەی کە دیدارشا ئەنجامدا ئی قسێشا بەکارناردێ. دلێ ئاکەپەینە هەڵای قسێ بە زوانی کۆن، هەڕەشە و 'بێ ڕێزی کەردەی کریۆنە. ئینێ حیچ پەیوەندییش بە حەقیقەتەکاوە نییا. لایەنەکێ تەرێ یۆبیێ تەرێنێ. ڕێبازو جەهەپەی هەرپاسە یۆبییەی بێ. نیگەرانی ئانەی هەن کە ئاکەپە دۆخەکەی پەی هورچنەی بەکارمارۆنە. بەتایبەت جە لایەنو جەهەپەینە. ئەلبەتە بڕێ لایەنێ تەرێش چی بابەتەیە نیگەرانێنێ. بێگومان ئاڏێ مافو وێشانە. بەڵام ئینە هەڵسوکەوتێ ڕاس نییا کە کریۆنە ئامرازێ پەی هورچنیەی. بەتایبەت دۆخێ چانەنە، چارەسەرو پرسو کوردی، دیموکراتیزەکەردەو تورکیای، فاڕیای یاسایی کە لگەدریاو ئی قۆڵەیەن و هەموارکەردەیۆ دەستوری پەی تورکیای، مەکریۆنە پەی بەرژوەندی حزبی و هورچنیەی بەکاربێنە. ئینەیچ جەبوارو یاساییۆ، نایاسایی بۆنە. پۆکەی ئی ڕێبازە بە قازانجی چارەسەری مەمەڕیۆوە و کاریگەری دروسش سەرو گلێرگەی نییا. بەپێچەوانۆ کاریگەری نەرێنیش هەن و نیگەرانی هامشێوەش چنەگنۆوە، ئێمە ئینەما وەڵتەر وینان.
سیستەمو مۆدێرنیتو سەرمایەداری جەهانی و دۆڵەتێ و هێزە سیاسییەکێ چینەیە ئیسفادەشا کەرد. یانی جە پرسو چارەسەرنەکریای کوردی و جەنگو کوردا ڕانە وەریشا کەرد. جە تورکیانە ڕانە وەرێ فرێنێ. هەرپاسە فرە مییانگێ هەنێ کە چی دۆخەیە ئیسفادەشا کەردەن، بەردەوام زوانو جەنگی و هەڕەشێ بەکار مارانە، زوانشا پێسەو کاردێ تیژا، فەرماودێ گرڏ کردەوەێتا ئەنجامدێ. چل ساڵێن ئی جەنگە بەردەواما. کوێ ئانێ زمانی جا جۆرە بەکارمارانە چی پرۆسەو جەنگینە ئینێ چکۆ؟ پەنەوازا مرۆڤ ئەوەکۆڵیای کەرۆنە کە قەرارا چێش بکەرا، ئاشکرا بییەیش خاس بۆنە. ئەر کەسێ هەنێ تاوانە جا بارۆ ئەوەکۆڵای بکەرا ئینە پێسەو ئەرکێوە گرنگو ئەرەیاونای بۆنە. ئێمە ئینەما جە میانگەو ڕاسواچێ و نەتەوەپەرەسەکاوە وینان. حەقیقەتەکە ئانەن کە جەهەپە فرە جە مییانگەو ناسیۆنالیزمو کۆمەڵایەتینە بییەن. هەرپاسە فرە مییانگی بیێنێ کە چی کێشە و پرسو کوردی و جەنگی ئیسفادەشا وینان. وەڵتەر سەرو ڕابەر ئاپۆی واچێنێ 'ئاپۆ'و 'پەکەکە' ی پێسەو پوەن بەکار مارمێنە. یانێ بەشێوەی مادی ئی جەنگەیە ئیسفادە مکەرانە. ئینەما چی پرۆسەنە وینا. ئینە خاڵێوە گرنگ بێ.
'گلێرگەی کوردی هەم جە ڕوو چنینەی و هەم جە ڕوو چڼایەتیۆ بەهێزا'
جە دماینە متاونە ئینەیە واچونە. پرسو کورد پرسێوە ئاسان و ئاسایی نییا.تا چن ئاسانا؟ لگەدریاو عەقڵیەتی و سیاسەتین. پێسەو بڕێ کەسێ ویرش چنە مکەراوە، پەیوەندییێ چانەی بە بەرژەوەندی مادیی و کێشەو سیاسی و ئابووریی نییا. بەڵکووم پرسو عەقڵیەتیا. عەقڵیەتێوە فاشیستو، ئەرەگیرکارو، جینۆسایدا. ئا عەقڵیەتەیە کە گەرەکشا نکۆڵی جە کوردی بکەرۆنە و دلێنە بەرۆش
، ئا سیاسەتەی کە ئی عەقڵیەتە خوڵقنۆنە، ئی کێشەیە وەش مکەرۆنە. ئەر واقیعو کوردی وینمێنە ئنە ئاشکران کە دیارا، ئەر یاومێنە کە هەر چەنین گرڏ کەسێ مافو ژیوایش هەن، مافو دیموکراسیشش هەن، گەلو کوردیچ مافش هەن، ئەف ئەزموونو فاڕیای چانە جە عەقڵیەت و بییەو دیموکراسینە کریۆنە، دەمودەس پرسو کوردی چارەسەر کریۆنە. بە پاو شمە، بە پاو گرڏ کەسێ متاوۆنە یەکسەر چارەسەرش بکەرۆنە.
یانی پەنەواز مەکەرۆ سیستەمێوە ئەشکەنجەی فاشیستیانە ٢٦ساڵێن سەرو ڕابەر ئاپۆیرە بلۆ ڕاوە. عەقڵیەت و سیاسەتێوە بی جۆرە یەکسەر متاوۆنە چارەسەرش کەرۆنە. ئیسە کێشەکە ئانەن ئ عەقڵیەت و سیاسەتە بییەیش نییا، ئەر نکوڵی زیاتەر جە ٥٠ ملیۆن کەسا کریۆنە و گرڏو دەرفەتەکا تورکیای پەی دلێبەردەو ئی گەلەی، پەی قڕکەردەو گەلو کوردی بەکار بێنە، مەحاڵا چارەسەری سەرگنۆنە. ١٠٠ ساڵێن هرووژم کەردێ سەرش، نەتاواشا سەرکەوتەی بەدەس بارانە. کورد جە ڕووەو ژمارەی و تایبەتمەندییۆ گلێرگێوە لاواز نییا. بەڵکووم کۆنترین مرۆڤو تاریخین، جە چاخی بەردینۆ ئامان. کۆنترین نەتەوەو مزۆپۆتامیاین، کلتوور و بەهێکێش فرە کاریگەرێنێ. کەواتە چنین ئی گەلەیە دلێنە بەرا؟ جە حەقیقەتەنە شمە بە شێوێوە عەشیرەیی جە ئاسیای دلێڕاسەینە بە سوارو ئەسپیۆ ئامێبێندێ ناوچەکە، بە زەبرو شمشێریۆ تاڵانکاریتا کەردەن و جە ئەنادۆڵەنە نیشتەجێ بیێدێ. ئینە بەمەڵامەتو کێوە بییەن؟ بێگومان جە سەیە کوردیۆ بییەن. بە کوردەسانەرە ویەردێ و بە پاڵپەشتی کوردی تاواتا ئی ئەنجامەیە بەدەس باردینێ. ئەر ئیسە گەرەکتانە ئا لقەی سەرشۆ نیشتێندێرە بڕدێشۆ، گندێنە چ دۆخێوە؟ دۆخو ئیسەو حکومەتو تورکیای بی جۆرە. ئا حکومەتەی کە گەرەکشا کوردی دلێنە بەرۆ ئیسە ئینێ دۆخێ چانەنە.
نە گلێرگەو کوردی جەڕووەو ژمارە و تایبەتمەندییۆ گلێرگێوە چانەنە کە بە ئاسانی و جینۆسایدو کلتووری دلێنە بریۆ و جەڕووەو بەلەنیۆ دلێنە بریۆ، نە دۆڵەتو تورکیای، گلێرگەو تورکیای ئینا جا ئاستەنە کە تاوۆنە کوردا وەرو گلێرگەو تورکی دلێنە بەرۆ. وەرو ئانەی بییەیتا سەرو دەسو کورداوە بەدەس ئاردەن.
بە هامپەیمانی چنی کوردی، ئەنادۆڵ کریان بە وڵاتێوە پەی وێتا و چاکە بییەتێ نەتەوە. ئینەن حەقیقەتو ئامایتا و بە نەتەوە بییەیتا. ئەر کوردی دلێنە بەردێ، ئانە یەکم جار وێتا دلێنە بەردێ. متمانە دلێنە بەردێ. کەواتە چنین چێوی چانە بۆنە؟ هەر پۆکەی ڕابەر ئاپۆ بەردەوام ماچۆنە: "کورد بەبێ تورکی بییەیش مەحاڵا و تورکیچ بە بێ کوردی بییەیش مەحاڵا". ئاڏرێ ژیوا و بییەیشا ئینا پێوەرە. ئەر ئینەیە نەوینا و واچا هەرکەسێ ئینا دلێ سنوورەکا کۆمارو تورکیاینە تورکا، گرڏ کەسێ مکەرونە بە تورک، ئینە خەڵەتێوە گۆرەن و پێسە تا ئیسە دیارا چێوی چانە ڕووەمەرۆنە، وەرو ئانەی شمە هێزی چانەتا نییا و مەتاودێنە سەرێ گندێ، با عەقڵیەتۆ بەردەوامێ بیدێ مەتاودێنە کێشەکا چارەسەر کەردێنە. پۆکەی مەتاودێنە بە زەبرو چەکی کێشەکا چارەسەر کەردێنە
بەهەمان جۆر بە جینۆسایدو پرسو کوردی چارەسەر مەبۆنە. چێش چارەسەر کریۆنە؟ بەڵکووم متاویۆنە بە فاڕیاو عەقڵیەتی، بە فاڕاو سیاسەتی پرسەکەی چارەسەر کریۆنە. ئەر تۆزێ دیموکراتیکێ بیدێ، تەماشەکەردێوە وەر بڵا و هەمە لایەنەتا بۆنە، هەرپاسە قەبوڵ کەردێ کە گەلو کوردی پێسەو تورکی نەتەوەن، مافو دیموکراسی و ژیوایێ ئازادش هەن، جە ماوێوە کەمەنە چارەسەری ڕووەمڏۆنە. پۆکەی ڕابەر ئاپۆ واتش: "جە ماوەو حەفتێوەنە چارەسەری خوڵقنمێنە. داوا مکەرۆ کە چارەسەرو من قەبوڵ کەردێ، با ڕاش پەی کەراوە. چی؟ چونکە پرسەکە بە فاڕیاو عەقڵیەتی چارەسەر کریۆنە. پۆکەی پەنەواز مرۆڤ جە گفتوگۆکاشەنە ڕەخنە جە سیاسەت و عەقڵییەتو فاشیستی و، ڕەگەزپەرسی و نەتەوەپەرەسی دۆڵەتی گێرۆنە.
پۆکەی پەنەوازا مرۆڤ ڕووەو گفتوگۆەکاش چا بارۆ دەس پنە کەرۆنە. پۆکەی پەنەوازا مرۆڤ بە تەماشەکەردەو ئازادی و دیموکراتیک ڕەخنە جە سیاسەت و عەقڵیەتو جینۆساید گێرانە و تاوانە دمای با ویرکەردەیۆ بارانە.
یوەم ئانەن کە ڕابەر ئاپۆ تاوۆنە بە شێوێوە چالاک هەنگامە سیاسیەکاش بەرۆ ڕاوە'
رابەر ئاپۆ وەڵتەر ١٥-٢٥ ساڵێ چێوەڵتەر کۆمەڵێ ئەگەرێ جیاوازێش وەرچەم گێرتێبینێ، ئێمە با جۆرە یاوایمێنە. بەپاو بڕێ سیاسەتا پێشبینی کریێ کە ئەنجامەکە بەرەو کۆکە ملۆنە. بەردەوام لواشۆنیش پەی کریێ. با مەڵامەتۆ پێشئامایەکێ خاس زانریا، وەڵێ گرڏ کەسینە وینۆشا و وەڵێ گرڏی با جۆرە هەڵوێس و سیاسەت پەرەپنە مڏرۆنە. ئاڏرێ دەرئەنجامو بەردەوامی ئەوەکۆشایش وینا. ڕاسا، ڕەنگە ئەوەکۆشایما دەرئەنجامی گۆرەش بەدەس ناردەبۆ، بەڵام پلانەو شکستیش هۆرشێونان. ئانێ بڕواشا پاسە بێ جە ڕاو هرووژمێ سەروازیۆ شکس بە تەڤگەرو ئازادیی کوردی مارانە، وێشا یاوێ دۆخێوە هورشنریاوە. واتە ئەوەکۆشای تەڤگەرو ئازادیی گرڏو پلانەکاشا دلێنە بەردێ.
جە لېوەتەرۆ پێشئامایەکۍ جەنگو جەهانی یەرەمی جە ۋەرکۊتوو مېیامینینە ئینا ئارانە. ئاژێوە هەن کە ئیسرائیل بۆ بە هێزی یووەمی هەژموونی جە ناوچەکەنە. ئێران و تورکیا ئیساتۍ زلهێزۍ هەژموونوازۍ ناوچەکەینۍ. ڕژێمو بەعسی جە سوریانە هۊرشێویاوە. سیستەمو دۊڵەت نەتەوەی جە عێراق و سوریانە دمایش پنە ئاما. ئیساتۍ تەنیا دۊڵەت نەتەوەکۍ ئێران و تورکیای مەنێنێوە. یانی متاومۍ واچمۍ، هەر جە ئیساتێوە بەمەڵامەتو جەنگی جەهانی یەرەمیوە مەنەیۆ دەوڵەت-نەتەوەی محاڵا. قەد چانسو مەنەیۊیشا نییا شکسشا ئارڎەن. جە حەقەتینەنە تورکیا و ئێرانیچ چی جەنگەنە شکسشا ئارڎەن. بەڵام چنی و ئەنجامەکەش چی پرۆسەو ئایندەینە دیاری مکریۆ. واتە ڕۊشن بۊوە کە چنی ڕووبەروو فاڕیایەکا باوە. ڕابەر ئاپۆ هۊرسەنگنایش پەی ئینیشا کەرڎەن. هەرپۊکەی ڕابەر ئاپۆ دەسوەڵێوستەیۍ پا جۊرەشە دەس پنەکەرڎ و ئامادەیی ۋێش نیشانەدا و دەرفەتەکێش هۊرسەنگنۍ و واتش: 'ئەر هەلومەرجی گونجیا بڕەخسیۆ، متاوو پرسو کوردی جە زەمینەو جەنگی و ملەملانێوە فاڕووە پەی زەمینەی یاسایی و سیاسی." گەرەکشا ئاژەو جەنگی و ملەملانێ مردنۆ و بەرەو چارەسەری یاسایی بکەرۊوە. گەرەکشا ڕا پەی سیاسەتی دیموکراتیکی بکەرۊوە و پرۆسێوە پەی پەرەپنەدای چارەسەری دیموکراتیکی پرسو کوردی بکەرۊوە. پۊکەی ئامادەیی ۋێش بەربڕی.
'مشۊم ئەوەکۊشای کاریگەرتەر بۆ و بە هێزتەر کۊشش بکەرمۍ'
کێ سیستەمو ئەشکەنجە و قڕکەردەی ئیمراڵیش وەشکەرڎ و ماوەو ٢٦ ساڵان ڕاوەبەرش مکەرۆ؟ پەنەوازا ئاژێوە عال وەش بکەرۆ و ئی سیستەمەیە وڕنا. ماچا با پەکەکە ۋێش وڕنۊش. ئێمەیچ پی جۊرە جوابو ئا کەسا مڎەیمێوە، پەنەوازا سەرەتا ئی سیستەمو ئەشكەنجە، گۆشەگیری و قڕکەردەیە، ئی سیستەمە کە تورکیا و کوردەسانش وستەن تەنگو چەڵەمۆ وڕنا. با ئا کەسۍ متاوا بەیا چی ئاژەنە هەرمانە بکەرا. با بەیا ئاژێوە کە بتاوا گفتوگۆ بکەرا... دماتەر نمەزانمۍ پەکەکە هۊرشێویۆوە یان نا، ئێمەیچ نمەزانمۍ. ئاڼنە هەرمانێوە ئاسانە نییەنە، جەهان سەرشەرە وڕۆ. یانی پەکەکەیی ئی دۊڵەتو، ئەو دۆڵەتی؟ چێش میاوانە؟ ئاسمان سەرو مرۆڤەکارە وڕۆ. یۆ جە ژیۋای گەلوو کوردی دیموکراتیک و ئازادی، بەشداربیەی دیموکراسی تورکیای مشۊم چنین بۆ؟ پەنەوازا ڕێکوستەبیەیۍ وەڵۍ گنۆ.
پۊکەی ئانەی بنەڕەتییا ئانەنە کە ڕاو ڕابەر ئاپۆی بکریۆوە تاوەکو بە شێوێوە ئازاد سیاسەت ڕاوەبەر بکەرۆ. واتا وڕنای سیستەمو ئیمراڵییا. ئینە پەنەوازیا. پەی ئانەی رابەر ئاپۆ دەورو ۋێش گێڵنۆ. ئانەی پەنەوازا بکەراش چێشا؟ بێگومان مشۊم ئەوەکۊشای بکریۆ. ئانەی چەرخو سیستەمو ئیمراڵی فاڕۆ بە دڵنییایوە تەنها ئەوەکۊشاین. یانی ئەوەکۊشای هێزو ئازادی گەلوو کوردی و دۆسەکاشا، ئەوەکۊشای هێزە ئازادیوازەکا تورکیای، جوانا کوردی و ژەنا جەهانییا. مشۊم عال چی حەقەتینیە بیاومێنە. با کەس جە چەمەڕایی ئانەینە نەبۆ چارەسەری سەرو مێزەو ئەرەنیشتەی وەش بۆ و گرڎ چێوۍ چارەسەر بۆ. با کەس پا جۊرە هورش نەگێرۆ پېسە ئانەی دمایی بە ئەوەکۊشای ئامابۆ. چێوۍ پی جۊرە بیەیش نییا. چی ڕاونگۆ مشۊم ڕێکوستەبیەیۍ زیاتەر بۊنە. یۊگێرتەیی زیاتەرش گەرەکا، ئەوەکۊشایش گەرەکا.
مشۊم جە ۋەرا ۋەرو گرڎ جۆرە فێڵ و گەمێوەنە، هۆشیارتەرۍ و ئاگاڎارۍ با. چی ڕوانگۆ مشۊم ڕێکوستەبیەی بۆ، یۊگێرتۍ با. دووەم ئانەنە مشۊم فرە هۆشیارۍ با و ڕاو جا بگێرانە ۋەر. مشۊم تا دمایی جە ئەوەکۊشاینە با. پەنەوازا ئەوەکۊشای نەمردۆ. مشۊم عالتەر جە قۆناغەکەی بیاوانە، مشۊم چارەسەری جە دەسو ئێمەنە بۆ. مشۊم بە ڕێوە درووس و چالاک ئەوەکۊشای وەڵۍ وزا.
'مشۊم هێزە دیموکراسییەکۍ خاوەنداری جە پرۆسەکەی بکەرا'
مشۊم جوانۍ و ژەنا کوردی سەرمەشقی بکەرا، گەلوو کوردی و دۆساشا هەنگامە بگێرانە ۋەر. بەڵام چێگەنە ئانەی پەنەوازا دەوری زیاتەرش بۆ هێزەکاو دیموکراتیک، چەپ و سۆسیالیستییەکێنۍ. ڕاوەبەریما چی مژارەنە بەیاننامێوەش وەڵا کەرڎۆ. داواش جە هێزە دیموکراتیکەکا تورکیای کەرد خاوەنداری بکەرا و سەرمەشقی بکەرا. ئی هەرمانۍ هەرمانەو دیموکراتیکبیەو تورکیاین. مشۊم جە ئاستو شۆڕشینە دیموکراتیکبیەی وەش بۆ. منیچ بەشداری ئی بانگەوازییە مکەرو. ئی بانگەوازییە واوەی مکەرووە. مشۊم گرڎو هێزە چەپ، سیۆسیالیست و دیموکراتیکەکا تورکیای جە گرڎ کەسێ زیاتەر خاوەنداری چی پرۆسەیە بکەرا. مشۊم چنی گەلوو کوردی، جوانا و ژەنا ئەوەکۊشایشا یەکانگیر بکەرا. پەی ئانەی پرۆسەکە بۆ بە پرۆسەو دیموکراتیکبیەو تورکیای مشۊم ۋەرپرسیاری جە ئەستۆ بگێرا و ئەوەکۊشا. مشۆم پێوەرە ئەوەکۊشای دیموکراتیکبیەی وەڵێوزا. ئا کاتە ئی پرۆسە وەڵۍ گنۆ. بەبێ دیموکراتیکبیەو تورکیای پرسو کوردی چارەسەر نمەبۆ. جە تورکیانە هیچ چارەسەریێوە وەش نمەبۆ. ئازادی کوردا بە دیموکراتیکبیەو تورکیای پېسە گۆشتی و ناخونین.
جە دماینە ئانەی ماچوو. لایەنەکۍ دەسەڵاتداری ماچا دلێمانە بەردێنۍ و ئەسپەردێشا مکەرمۍ. مشۊم ئا قسا مردنا. هەوڵمڎەیمۍ هەستیاری و پەنەوازی پرۆسەکەی نیشانە بڎەیمۍ. پېسە شێواز و فکری. بەراسی گەرەکمانە ئی پرۆسە سەرگنۆ کە ڕابەر ئاپۆ گەرەکشا بە جۆشو خرۊشۆ پەرەش پنە بڎۆ. کۊششما پەی ئینەینە. بەڵام گلېرگەو تورکیایچ مشۊم بزانۆ پی هەڕەشاوە مەلۊڕاوە. پا هەڕەشا هیچ چێوۍ نمۍ ئاراوە. ڕاوەبەری پەکەکەی چی مژارەنە ئەرەیاۋنایش دا. گرڎ کاتێ ئاماڎێنمۍ پەی جەنگی و ئاشتی. نمەبۆ گەمە بە دەمارو هێزەکاو ئازادی بکریۆ. بەراسی بڕۍ فاڕیایۍ پەنەوازێنۍ، کۊششەکۍ ڕابەر ئاپۆی پەی ڕزگاری تورکیای دما چانسەنۍ. ئەر ئینە هۊرنەسەنگیۆ چێوۍ پا جۊرەیچ بیەیش نمەبۆ. سەرو کوردەسانی ئەوەکۊشای زیاتەر بیەن. چڼین کارەکتەرۍ کاریگەرۍ هەنۍ، بە تەنیا دۊڵەتو تورکی نییا. چی ئاستەنە کورد چنی گرڎ کەسێوە ئینا پەیوەندینە. کوردەسان مېیانو ئەوەکۊشایا. پۊکەی کەس نمەتاوۆ کوردی دلېنەبەرۆ.
'گەریلا ئا بناغەشە ئەرەمەرزنا کە ڕابەر ئاپۆ دەسش کراوە بۆ'
کورد بێ چارەسەر و ئەڵتەرناتیڤ نییا. ڕابەر ئاپۆ سەرو بناغەو دیموکراتیک بیەو تورکیای ویستو چارەسەریش هەن. پەشتگیری چا چارەسەرییە مکەرمۍ. هەر ئانڼەن، چونکی باوەڕیما پنەشا. دیموکراتیکبیەو تورکیای مەبۆ بە دیموکراتیکبیەو ۋەرکۊتوو مېیامینی ئینەیچ ڕاو ژیۋایۍ دیموکراتیکی و ئازادییا پەی مرۆڤایەتی. پۊکەی باوەڕیما پینەینە و پەشتگیریش مکەرمۍ. چی ڕوۆ هەنگامە منیەیمۍ. نمەبۆ ئا حساباتە بکریۆ کە ئینە تەنیا هۊرچنیەین. پۊکەی ئەر چێوۍ نەرێنی بەرگنۆ، با هیچ کەسێ پېسە ۋەرپەرسی نیشانەما نەڎۆ. پېسە تەڤگەری، گەلی ئێمە بە ئارامی، هەستیارییوە بە پاو پەنەوازی پرۆسەکەی جماوە. سەرەڕاو گرڎو هرووژمو لایەن و بازنەکا دەسەڵاتداری. ئانڼە کەسێشا گێرتێنۍ. قەیوم سەپیۊنە. ۋەرا ۋەر بە جەهەپەی ئانڼە ملەملانێشا ئاردەن ئاراوە. تورکیاشا وستەن دلۍ کاری جیاوازیوە. تورکیایۍ کە چارەسەری وەش بکەرۆ و بۆ بە دیموکراتیک. هەرپاسە بێوە جەنگ مکەرا و جەنگ نمەمردنا. جە هەرێمەکاو پارێزنای مەدیای و پارچەکا کوردەسانینە بە گرڎو سەختییەکاوە جەنگ ئینا ئارانە. بەردەوامە و هەنگامێوە گولانێچ نەکیشیانۆ. با ئینە لاو گرڎ کەسێوە ڕۊشن بۆ.
ئانەی بی بە مەڵامەتو ئانەی دەوڵەت باخچەلی و بازنەکۍ تەرو سیاسی تورکیای بلانە دلۍ نزیکبیەیۆیۍ چا شێوەیە، ئەوەکۊشای ئازادیوازانەو گەلوو کوردین. ئینە گومانە هۊرنمەگێرۆ. بناغە و سەرمەشقایەتی ئی کۊششەیە جەنگو ئەوەکۊشای گەریلا فیداییەکا بیەیش هەن. ئی کۊششە جە ١٥و ئابو ١٩٨٤یوە سەرو هێڵۊو قارەمانیەتی بەردەواما. ئی کۊششە جە ساڵۊو ٢٠٢٤ ینە جە حەقەتینەنە سەرو هێڵۊو قارەمانا بەردەوام بی کە مېیانەکەشا زاپ و مەتینا بۍ. گەریلۍ هەرە دماینۍ نیشاندەرۍ ئینەی هەمڕایا ئاسیا و ڕۆژگەر بێنۍ کە بە دۆس، دوژمنی و گرڎ لێوەشا نیشانەدا کە هێز و دەرفەتشا هەن گرڎ گورزێوە بشانا جە دۊڵەتو تورکی جە دلېڕاسەو ئەنقەرەینە. جە ساڵۊو ٢٠٢٤ینە هەر ۋێش هامپەیمانی ئاکەپە-مەهەپەی بۍ، پەدەکەیچش پەی زیاڎ کریا، عێراقیچش پەی زیاڎ کریا، پا جۊرە تورکیا ئاما دلۍ ساڵۊو ٢٠٢٤یوە. ئاڎۍ پا جۊرە ئامۍ دلۍ سەنیشتوو عێراقی کە چێوۍ بە نامۍ پەکەکەی و پرسو کوردیۆ نمەمەنۆ. تەیب ئەردۆغان ۋێش ئینەش وات. بە سەرمەشقایەتی سوپاو عێراقی و پێشمەرگەو پەدەکەیۆ گرڎ جۆرە هرووژمێوەشا ئەنجامدا. واتشا، قفڵەکەی وزمێرە. ماوەو ٤ ساڵان ئی لەشکرە نەتاوانش گورزە جە سەنگەرێوەیچ بشانۆ. جەنگەکۍ بە تەنیا جە هەرێمەکاو پارێزنای مەدیاینە نیا بەڵکم جە گرڎو سەرنیشتوو کوردەسانینە وەڵا بیەنۆ. جەنگ ئینا کەش و شارەکانە. هێزی بڕۍ ڕەخنۍ بێنۍ کە گوایە چی جەنگ نمەکریۆ. بە هەرحاڵ شالیارو وەرگری واچۍ، ئانڼە بۊمبوارانما کەردەن مەگەر شمە نمەویندێش، زیاتەریچ ئەنجام مڎەیمۍ. جە ماوەو دوۍ ڕووانە ٤٦ هرووژمۍ ئاسمانیێشا سەرو هەرێمەکاو پارێزنای مەدیای ئەنجام دێنۍ. ماچۆ، مەگەر چینەی زیاتەر چێش بکەرمۍ؟ هەروێش جە زەمینەۆ نمەتاوۆ چێوۍ بکەرۆ. ماچۆ قفڵەکاما وستەرە، گرڎ ڕازەنە. کۊتۍ دلۍ کەشی و دۆڵەکاوە، بە تەمامی ئینۍ گێجاوەنە. کەشەکا کوردا سۊچنا و کاولێشا مکەرا و گەریلایچ ئاڎیشا پڵۊشنۊرە. ئەر هامکارییەکۍ پەدەکەی و عێراقی نەبا، گەریلا جە یەک ڕۆنە گرڎی بەرپڕنۆ. ئینە حەقیقەتەکەن. ئاژەکە پا جۊرەنە. هەرۋێش ئاژەکە فرە سەختا. هیچ نەمەنەن نەکەراش. ئینۍ تەنگەژەنە. بە دڵنیاییوە ئاژەو هرووژمە ئەرەگیریەکا سەرو هەرێمەکاو پارێزنای مەدیای پی جۊرەنە.
فەرماندەییما هۊرش سەنگنا. هێز و ماتەوزەو گەریلای ئینا ئەوجەو ئاست بەرزیینە. مێڎانەکەشا ۋەرفراوانا. وەش وەش متاوۆ ۋێش تازە بکەرۊوە و پەرە بە ۋێش بڎۆ. جەنگەکاش زیاتەر بکەرۆ جە مێڎانەکا ۋێشەنە. مەرامەکاش فاڕۊنە، تەرز و دەرفەتەکۍ وەڵێکۊتەی گەریلای فرێنۍ. ئەر جە قۆناغەکاو وەردەمیمانە جەنگ بەردەوام بکەرۆ، مشۆم گڕد حساباتۍ ئینەیچ بکەرۆ. ئانەی ڕاش وەردەمو ئینەینە کەرڎۆ، مڎرامانی قارەمانانەو گەریلایکا زاپین جە هەرێمەکاو پارێزنای مەدیاینە کە پلانەکۍ دلېنەبەردەیشا ماڕۍ. گەریلا دەرفەتو دەسوەڵێوستەی و دەسکراوەیش پەی ڕابەر ئاپۆی فەراهەم کەرڎ. پی بۆنۆ جارێوەتەر سڵامشا ۋنە مکەرو هیواو سەرکۊتەیشا پەی موازو. بە ڕێز و پنەزانایۆ گرڎو گەشمەرڎاما یاڎۍ مکەرووە.
ئەرەگیرکەردەو عەفرینی و هرووژمکەردەی سەرو تشرینی
ئاڏێ ئەرەیاوناشا کە ژمارەو گەشمەرڏا ٦ کەسێن و ژمارەو زامڏاراش ٢١کەسێن. بەڵام چاکە هرووژم مکریۆنە سەرو کەسی مەدەنی. جە تشرینەنە مڏرامانێوە گۆرە ئینا ئارانە.ڕوانە و حەفتانە گەلوو سەرنیشتوو و وەرکەوتوو سوریای، بە سەرمەشقایەتی گەلوو کوردی، بەڕاسی داستانو قارەمانییەتی منویساوە و ئەوەکۆشایێ بێوێنە بەراڕاوە. بە ورە و فیداکاریۆ ئی هەرمانێ مکەرانە و سەرکەوتووێ بانە. ئایندەو سەرنیشتوو و وەرکەوتوو سوریای ڕۆشنا. تاکە هێزێ کە بۆ بە نمونە و کاریگەریش سەرو بنیاتنیای سوریای تازە بکەرۆنە، ئیدارەو ڕاوەبەرایەتی دیموکراتیکیو سەرنیشتوو و وەرکەوتوو سوریاین. کەواتە ئی ئەوەکۆشایە، ئا ونێ کە مجیۆنە، ئا ئازایەتی و قوربانییەی کە نیشانە مڏریۆنە، بە دڵنیاییۆ سەرگنۆنە و ئەنجامێوە گۆرەس چنەگنۆوە و بێهودە نمەبۆنە. من ئینانا جا ببڕوێنە هەم گەلوو وەرنیشتی و هەم گرڏو گەلوو سەرنیشتوو و وەرکەوتوو سوریای فرە عال ئینەیە مزانا، با بۆنۆ سڵام جە مڏرامانی قارەمانانەشا مکەر و هەرپاسە بەڕێزداریۆ گرڏو گەشمەرڏە قارەمانەکاما و بەتایبەت تاتەو تەیار یاڏ ماروە، یاڏشا بەرز و بەڕێز بۆنە.
هرووژم کەردەی سەرو عەفرینی سەرەتێوە کاریگەر بێ پەی هرووژم کەردەی سەرو ئی هەرێما. هرووژمو ئەرەگیرو عەفرینی، جە ٢٠و کانوونو دووەمی ٢٠١٨، مەبۆنە بە جدیی هورنەگیریۆنە. عەفرین پەی ماوەو دووێ مانگا وەرەنگارو هرووژمەکا بیۆ، دۆڵەتو تورکی بەهێزو وێشۆو بە پاڵپەشتی ناتۆی هرووژمش کەرد سەرو عەفرینی. مڏرامانێ شکۆمەندانە، جە حەقەتینینە مڏرامانێ قارەمانانە لوا ڕاوە. عەفرین هێزو ڕزگاریوازی وێش بنیات نیا و تا ئیسەیچ ئی هێزە بەردەواما جە ئەوەکۆشای ئازادکەردەی عەفرینی.
پۆکەی جارێوە تەر جە ٧ـەمین ساڵەو ئەرەگیرکەردەو عەفرینینە سڵام جە مڏرامنو گۆرەو گەلی مکەر و بە ڕێزدارییۆ گەشمەرڏێ ئا مڏرامانە گۆرەیە یاڏ مکەرمێوە. هەرپاسە سڵام ئاراسەو گرڏو ئانیشا مکەرونە جە ئەوەکۆشای ئازادی عەفرینینە ئەوەکۆشانە و هیواو سەرکەوتەیشا پەی وازونە.
عەفرین شارو کوردەسانین، بەڵام عەفرین بە تایبەتمەندییەکاش، هەرێمێوەن کە متاوۆنە هەر هەرمانێوەش پەی کریۆنە و بە هەر جۆرە ئازایەتی و فیداکاریی متاوۆنە پەی ڕزگاری ئەوەکۆشای بکەرۆنە. پۆکەی ئەوەکۆشای عەفرینی مەمڏرۆنە و بەردەوام بۆنە.
دماو عەفرینی دۆڵەتو تورکی گرێسپی و سەرێکانیش ئەرەگیر کەرد. بە هێزو چەتەکاش و بەکرێگیرییکێ و ئا هێزێ کە نامێ سوپاو نیشتیمانی سوریایش چنە نریان، هەوڵو ئەرەگیر کەردەو بڕێ ناوچێ تەرێ پێسەو، منبج، شەهبا و ناوچەکا تەرێ مڏۆنە. ئاڏێ چنی تەحریرو شام (هەتەشە) هامپەیمانێنێ. بەڵام جە حەقەتەنە ئەرەگیری ڕاستەقینە خودو تورکیاین. پەی نموونەی باس جە چنین بنیاتنیاو سوریای کریۆنە. بەڵام بەردەوام ئی باسە سەرو هێزەکا سوریای دیموکراتیکرە مارانە. جە کاتێنە هێزێوە ئەرەگیر جە سوریانە هەن. ئاڏش دۆڵەتو تورکین، یانی پارتی ئاکەپە ئاڏێ سەرقاڵو ئەرەگیرکەردەینێ. عەفرینی ئەرەگیر مکەرانە. ئاڵاو تورکیای چاکە هورکەرا، وەنەنگەی تورکی چاکە کریانۆ. پێشەو شارێوە جە تورکیانە ملۆڕاوە. گرێسپی بەهەمان جۆر، هەوڵ مڏرانە سەرێکانیش پی جۆرە بەرا ڕاوە. ناوچە ئەرەگیرەکا تەرێچ پاسە پنە مکەرانە. ئینە ماناو ئەرەگیر کەردەین. ئانێ باس جە ئایندەو سوریا مکەرا، پەنەوازا سەرەتا جە دژو ئەرەگیر کەردەو تورکیای هەڵوێسشا بۆنە.
دووەم: سەرەمڕە هرووژمی تازە مکەرا. سوپاو نیشتیمانی سوریای ڕازێوە وەشکریێنە. گرڎ بڕەمێنۍ و نەمەنێنۍ. مەگەر جە ئەرەیاۋناکانە نەدیما؟ هێزەکاو قەسەدەی و جەنگەوانا یەکینەکاو پارېزنای گەلی (یەپەگە) و یەکینەکاو پارېزنای ژەنا (یەپەژە) چن هرووژمێوەشا کریا سەرو؛ هەر بەزوویی ماڕێشا. سوپاو تورکی دەمودەس دەسوەردایش کەرد. سەرەمڕە هرووژمی ئاسمانی ئەنجام مڎۆ. بە هێلیکۆپتەر هرووژم مکەرۆ، بە گرڎو هێزی تەکنیکی ۋێش بەکار بەرۆ. پېسە واچی سوپاو نیشتمانی سوریای جەنگ بکەرۆ. ئینە ڕازێوەنە، لەشکرێوە چامنە نمەتاوۆ جەنگ بکەرۊ. ئا هێزەی جەنگ مکەرۆ خودو دۊڵەتو تورکین. ما باقی ڕازێوەنە. واتە خودو دۊڵەتو تورکی کە هرووژم مکەرۆ سەرو تشرین. هرووژم مکەرۆ سەرو ڕەقە، تەبقای. ئیساتۍ جە ۋەرنیشتەنە زیاتەر گەرەکشا سوریای ئەرەگیر بکەرۆ. یانی جە حەقەتینەنە دۆڵەتو تورکی سەرکردایەتی وڕای ڕژێمو ئەسەدیش کەرد و ئیساتێچ گەرەکشا بەتەمامی ئەرەگیرش بکەرۆ. رابەر ئاپۆ سەبارەت بە دەورو تورکیەی جە پیلانگێڵنینە، ماچۆ تورکیا پېسەنوە پاسەوانێوە. جە وڕای ڕژێمو بەعسو سوریایچەنە، دەورو دەسەڵاتو ئاکەپەی پاسەوانی بۍ. داواو داعشی مکەرا، گەرەکشا ڕزگارشا بکەرۊ یانی گەرەکشا جە شۊنەکا تەرینە بەکارشا بارۆنە. جە حەقەتینەنە ئاڎۍ هەمیشە سیاسەتو باج هۆرگێرتەی پەیڕەو مکەرا. بیەو گەریلایشا پېسە هەڕەشۍ بەکارئارڎ. هەڕەشۍ پەنابەراشا بەکار ئاورد. حکومەتو ئاکەپەی عەیامێوەن پی هەرەشاوە تەمەنو ۋێش درێژ مکەرۆوە. ئەر کوچۍ بتاوا دەسشا بە داعشە دیلەکا بیاوۆ ئانە متاوا جە شۊنەکا تەرینە بەکارشا بارا. تەیب ئەردۆغان بە فریودای ڕای گرڎی گەرەکشا هەرمانێوە چامنۍ بکەرۆ، پاسە ۋێش نیشانە دا کە چا بارۆ سەرکۊتەیش بەدەسئاوردەن. بەڵام کەس هۊرسەنگنای پەی ئانەی نمەکەرۆ کە ئینە چن شیەیشەنە هەن پەی تورکیای و سەرش گنۆ.
پی زووانە موینیۆ کە تورکیا باجو سیاسەتەکا تەیب ئەردۆغانی بەقورسی مڎۊوە. ئاژەکە ئینا چی چوارچێوەنە. پی مەعنۍ هەم ئەرەگیرا و هەم جە ئاژەو ئیساتێنە هێزی هرووژمبەرا. گەرەکشا چنی سوپاو بەنام نیشتیمانی تشرینی ئەرەگیر بکەرۆ. چی؟ ۋەرو ئانەی چا وێستگێوە کارەبۍ هەن. ئاڎۍ شۊنەو سەرچەمەی ئابووریرە گێڵانە. پۊکەی گەرەکشانە گێراش یان دلێشەنە بەرا. هرووژمشا کەرڎ سەرو گرڎو سەرچەمەکا ژیۋای گلېرگەی و چېرخانو ناوچەکەیشا کەردەن ئامانج و فرەو یاگاشا دلێنەبەرڎ. هامکات خەڵکی مەدەنیچ کۆمەکوژ مکەرا. خەڵکی مەدەنی لوێنۍ و ئازایانە وەرگری جە بەنداوو تشرینی مکەرا. دۆڵەتو تورکی هرووژم مکەرۆ سەرشا، پۊکەی گرڎو ئی ئەرەگیری و هرووژمۍ پەیوەندییشا بە عەفرینیوە هەن. یانی ئەرەگیرکەردەو عەفرینی ڕاش پەی ئاکەپەی کەردۆ. ئیساتێچ خجڵۍ کۆمکوژی خەڵکی مەدەنینۍ، تاوانەو جەنگی ئەنجام مڎا. بەڵام رای گرڎی هیچ دەنگێوە نمەکەرۆ. ئەجۊشەنە سەر گنۆ جەنگو تەشرینی یاوان بە ئاژێوە پی جۊرە، بەدڵنیاییوە ئینە کاریگەری سیاسی فرە ۋەرفراوانتەرش چنە گنۆوە
ڕەنگە ملەملانێوە بۆ جە ناوچێوە سنووردارەنە، بەڵام چڕی جەنگەکەی فرەن و کاریگەرییە سیاسییەکەش فرە بۆنە. ڕەنگە هامسەنگی هێزی جە گفتوگۆیەکا بنیاڎنیایۆ سوریاینە دیاری بکەرۆ.
واتشا ئەرەگیرما کەرڎەن، بەڵام درووەکێشا جە لایەنو ڕۆنامەنوویساوە ئاشکرا کریا. نازم داشتان و جیهانە گەشمەرڎۍ کریۍ. ئاڎێشا گەشمەرڎۍ کەردۍ وەرو ئانەی کەس حەقەتینەکا نە فاڕۆوە هەرمانێوە چامنۍ نەکەرۊوە. هەرپاسە جە تورکیانە ٦ ڕۆنامەنوویسێشا باڵبەسۍ کەردۍ، چونکی سیاسەتو جەنگی ئاشکرا مکەرا.
هەرپاسە هرووژم پەی سەرو هەرێمەکاو پارێزنای مەدیایچ بەردەواما. جە سەرنیشتوو ۋەرکۊتوو سوریای، واتە جە تشرینەنە، هرووژمەکێشا سەرو بنەماو ئەنجامدای تاوانەو جەنگی دژو خەڵکی مەدەنی بەردەواما. هرووژمەکۍ پەی نیایرەو قەیومی درێژەشا هەن. گێرتەی بەردەواما. ئاڎۍ مزانا کە ئیتر بە هۊرچنیەی سەرۍ نمەگنا پۊکەی سیاسەتو قەیومی بەکار مارا. دەسوەڵێوستەی و ئەوەکۊشای ڕابەر ئاپۆی ئینا ئارانە، بەڵام هیچ فاڕیایۍ نمەوینیۆ. مرۆڤ پاسە میاوۆنە، ڕەنگە ئێمە بە دروسی چانەی کە گوزەریۆنە ئاگادارێ نەبیمێ!لێوە باسو ئاشتی مکەرا، لێوەتەرۆ جەنگ بەردەواما، تەنانەت گوشار وسانە سەرو ڕابەر ئاپۆی پەی ئانەی بە خێرایی ئاشتی خوڵقنۆنە. جە هەمان کاتەنە گرڏ یاگێنە، جە دلێ و جبەرۆ، جەنگش چڕ کەردەنۆ. هرووژمەکا پەرە پنە مڏرۆنەو و بەردەوام بۆنە، ئایا چێوی چانە بۆنە؟ ئایا حیچ فاڕیایێ با جۆرە رووەمڏرۆنە؟ واتە پی جۆرە حیچ متمانێوە مەنۆوە؟ هەر وەرو ئانەی ڕاو گرڏی بە گومان و نیگەرانییۆ تەماشەو دۆخەکەی مکەرانە. جە کوردەسانیشەنە هەر پاسەن، جە گرڏو جەهانی و تورکیایچەنە بەهەمان جۆرا، جە مییانگەکاو دیموکراسیچ گومانەشا جە پروسەکەی هەنە. جە حەقەتەنە ئێمە بەردەوام ئینایمێ هەوڵو ئانەینە ئی نیگەرانی و گومانا کەمێ کەرمێوە. چونکە ئێمە بە گومانۆ حیچ ئەنجامێوە بەدەس نمارمێنە. بێگومان نیگەرانی هەن. بەڵام گرنگ ئانەن ئەوەکۆشای بەردەواما. بە ئەوەکۆشای پەرە بە وەڵێ کەوتەیەکا مرەیمێ. تەنیا بە تەماشەکەردەی حیچ ئەنجامێوە بەدەس نمارمێنە. هەرپاسە بە بەردەوام کەردەی ئەوەکۆشای تاومێنە ڕا پەی فاڕیایەکا کەرمێوە. بە فشار وستەی سەرو حکومەتی، ڕا پەی فاڕیای کریۆوە. تورکیا لوان دلێ پرۆسەو فاڕییایۆ. فاڕییای مشۆم سەرو بنەماو دیموکراتیزەکەردەی بۆنە.
