ئەحمەد کایا هامسەرۆکو پارتی مرۆڤایەتی و ئازادی، قسەکاشەنە پەی ئاژانسو هەواڵو فوراتی (ANF) قسێش کەردە وئەرەیاوناش ، گرڏ سەرنجێ کوردی ئینا سەرو وەرنیشتینە و واتش: "١٠٠ ساڵێ چێوەڵتەر جە جەنگی جەهانی یوەمینە، کورد دەرفەتش پەی دروس بی کە دۆڵەتو وێش ئەرەمەزنۆرە و پێگەو وێس بارۆنە. ئی دەرفەتە جە پەیمانو لۆزانینە دەسەنە شی. کوردەسان دابەش بی سەرو چوار وڵاتارە. دماو ١٠٠ ساڵا دوو چا دۆڵەتا؛ عێراق و سوریا ئیتر نمەتاوا پێسەو وڵاتێوە یەک پارچە بەردەوامێ با. پۆکەی بەردەوامی سیستەمو ئیسەی ئەستەما. ئا هەلومەرجە تازە ئیسە جە وەرنیشتەنە ئامان ئاراوە، دەرفەتێوەن  پەی کوردی پەی ئانەی دماو ١٠٠ ساڵا ئیدارەو وێش و پێگەو وێس بە فەرمی بکەرۆ."

پەی دەستکەوتەکاش قوربانی فرەش دان

کایا جەخش چانەیە کەردۆ کە پەنەوازا کورد جی پرۆسەنە فرە وریا بۆنە و گرڏ هەوڵێ وێش دۆنە پەی ئانەی سوود چی دەرفەتە هۆرگێرۆنە، و جە درێژەو قسەکاشەنە واتش: "پەنەوازا پەیوەندی چنی دۆڵەتە کاریگەرەکا جە سیاسەتو مییاننەتەوەیی و جەهانینە پتەوتەر کریۆ و دیپلۆماسی وەڵێ گنۆ. ئا پەیوەندیێ تا ئیسە لوێ ڕاوە، مشۆم پەرەشا پنە دریۆ، بەتایبەتی چنی زلهێزەکا. بەهەمان شێوە مشۆم پەیوەندی چنی هێزە دلینەکا وگەلا ئەرەنیشتەو هەرێمەکەی پتەوتەر کریۆ. ئا نوێنەرایەتییە مشۆم کوردا وەرنیشتی و پارچەکا تەریچ گێرۆوە و سەرو بنەماو ڕێککەوتێوە بنیات بنریۆ. ئەر پێکئامێوە چا شێوە جابەجێکریۆنە، حیچ هێزێوە نمەتاو دژش مڏرۆ. نەتەوەو کوردی نەتەوێوە فرەڕەنگا کە جە ویروڕاو و سیاسەتی جیاواز پێکئامان. نوێنەرایەتیێ کە سەرو ئا فرەچەشنییە بنیات بنریۆ، پێگەو کوردی بەهێزتەر مکەرۆ."

کایا جەختش چانەیەکەردۆ کە پەی دەسکەوتەکا قوربانی گۆرە دریان و واتش: "دەسکەوتەکێ وەرنیشتی دەرئەنجامو خەباتی و مڏرامانێوە گۆرەینێ. بە حیچ شێوێوە جە وێڕا و جە ڕاو کەسێوە بەتەنیا بەدەس نامێنێ. کورد پەی یاوای بی دەسکەوتا هەلومەرجی فرە قورسشا بڕییەن. بەهەمان شێوە پەنەوا پەی پارێزناو و خاوەنداری جە دەسکەوتەکا مشۆم هەوڵ و ئەرەکۆشێوە گۆرە کریۆ. پۆکەی مشۆم جە سەروو گرڏ چێوێوە دەسکەوتەکا گەلی پەی بەرژەوەندی گرڏ با. ویرکەردەو ئی دەسکەوتا کە بە قوربانیێ گۆرە بەدەس ئامێنێ، خەڵەتێ گۆرەن."