کفری شارە دێرینەکە ڕوو بە چۆڵ بییەیەن

کفری کە یۆن جە شارە دێرینەکانو کوردستانی جە ئارۆنە ڕوو بە چۆڵ بییەیەن و تەنها ساڵێ ویەردێ ١٢٤ خانەوادێ شارەکەشان جیائاستەن.

کفری شارێ دێرین و پەڕەن جە ئاسەوارێ تاریخیێ و جە یاگێوە ستراتیژیەنە هۆرکەوتەن. سەردەمانی کفری شار  بییەن، فرە شارێ کە ئارۆ دەوروبەرشەنە ئاوەداننێنێ نامێشان نەبیێنە یان ڕاستەر نەک شار دەگاچ نەبیێنێ، بەڵام ئارۆ جە ئاوەدانی و خزمەتگوزاری و بنەماکێ شاریەنە دانشان وەڵێ کفری و کفریچ نەک وەڵێ نەکەوتەن بەڵکۆ قەفایەرە گێڵانەوە و سات بەسات سیماکێ شارێوی سەردەمیانەی جە دەست مڎۆنە و ڕوو بە چۆڵ بییەیەن. 
هۆکار و نونگەو ئانەیە پەشتگۆش وستەی شاریەن جە لاو دەسەڵاتدارەکانو هەرێمو کوردستانی و نەبییەی خزمەتگوزارییەکان.
جە ئی بارەوە ئاژنسو ڕۆژنیوزی، قادر فاتيح، سەرۆکو شارەوانی کفری دۆنان و نامبریا واتەنش: "جە ٢٠٢٠ حکومەت هیچ پڕۆژێوش جە کفری ئەنجام نەڎان و سەرجەم پڕۆژەکێ کە پلانەشان پەی کریێنێ مدریێنێ کە گرنگتەرینشان شاڕا (دووە ساید)و (کفری- کەلار)یەن".

چەندین هاموڵاتیێ شارەکەی بە هەمان ئاژانسیشان واتەن: "حکومەت گرنگی بە شار و ناوچەکەیشان نمڎۆنە و کاتێو کە خزمەتگوزاری نەبۆنە، خەڵکی ناچارەن کۆچ بکەرۆنە و شارەکەی بئازۆنە جیا".

کفریەکێ باس جە نەبییەی ئاوێ و سیستەمو چێر ئاوێ (ئاوەڕۆ)، کارەبا، نەوەشخانە، پڕۆژێ گەشتیارێ و پیشەسازیێ و قیرتاونەکەردەی جادێ و کوجیەکان جە شارەکەشانە مەکرانێ و ئانەیچە بە هۆکار پەی ئاستەجیای شارەکەی نیشانە مڎانێ و مەواچانێ: "جە ساڵانێ ویەردێنە سەدان خانەوادێ کفریشان جیائاستەن و تەنیا جە ٢٠٢٠نە، ١٢٤ خانەوادێ شارەکەشان جیائاستەن و خەڵکی جە سلێمانییە و هەولێر یانێشان ئەسێنێ و ڕووە منیان ئا دووە شارەیە".

هاموڵاتیێ کفری وازیارێنێ: "حکومەت فریاو کفری بگنۆنە و بە پێشکەشکەردەی خزمەتگوزاریەکان، ڕاگیری جە چۆڵ بییەی شارەکەی بگێرۆنە".

کفری مێژوو و دێرینەی هەزاران ساڵەش هەن و ئاسەوارێ مێژوویێ گرنگێ جە شارەکە و دەوروبەرشەنە هەنێ و سەردەمانێ کفری ناوەندێوی گرنگو زەردەشتی و یارسانی بییەن و بە هۆکارو یاگە سترایژیەکێش جە ویەردەن هەمیشە ئاوەدان بییەن و شارێوی چالاک و نامی بییەن جە کوردستان و هەرێمەکەنە. جە شار و ناوچەکەنە دەیان ئاسەوارێ گرنگێ مێژوویێ هەنێ کە ئاڕاستییە سەلمنان، بەڵام بەهۆکار پەشتگۆش وستەیشان وێڕانێ بیێنێ و ڕوو بە دلێنەشیەیەنێ و ئانەیچ خەڵکیش نیگەرانو توڕە کەردەن.