خەڵکوو شەنگالی ئامادێنۍ خێرامای جە سوودانیی کەرا'
خەڵکوو شەنگالی جە کۊنفڕانسێوە ڕۊنامەنویسینە واتشا، کە ئاڎۍ ئامادێنۍ خێرامای جە محەمەد شیاع سودانیی سەرۊکوەزیروو عێراقی کەرا.
ئەبو سەقیر هامسەرۊکوو ئەنجوومەنوو عەرەبی و خوەدێدا ئیلیاس هامسەرۊکوو دەسەو ڕاوەبەریی شەنگالی کۊنفڕانسێوە ڕۊنامەنویسیشا گێرت و بە زوانی کوردی و عەرەبی قسێشا کەرڎە و واتشا ئامادێنی خێرامای جە محەمەد شیاع سودانی کەرا. حەرپاسە ئەرەیاوناشا، کە گرڎوو قۊرتەکاو شەنگالی یاونا بە سودانیی.
جە قسەکاشانە ئاماژەشا پانەیە کەرد، "گردوو پێکئامایەکاو شەنگالی کە جە ئێزدی، عەرەب، شەبەک و شیعە پێکۍ مەیا ئارۊ پەی خێرامایکەرڎەی محەمەد شیاع سودانی کوۍ بیێنێوە. وەروو ئانەی ئی سەردایە، سەرداێوە تاریخین. خەڵکوو شەنگالی ساعیبوو ئی مافەینە کە سەرۊکوەزیر سەرش بدۊ، کە ڕووبەڕووۍ کۊکوشی بیێنێوە.
بە پاو زانیارییەکا، بە سەرۊکوەزیروو عێراقی وچیێنێوە، کە شەنگالنە وێنیشاندای دژوو ئاڎی کریان، حەرپاسە چالاکیی سەروازی هەن. ئی قسۍ دوورێنۍ جە ڕاسییوە، ئی کۊبییەیۊو ئێمە پەی خێرامایکەرڎەین جە سەرۊکوەزیر محەمەد شیاع سودانی."
چەمەڕوان کریۍ محەمەد شیاع سودانی سەرۍ شەنگالی بڎۊ و چەنی ڕاوەبەروو وێڕاوەبەریی شەنگالی و پێکئامایەکا کۊ بیێوە، وەلۍ سەردایەکە ورشنیاو‌ە.
س.ز
