هامسەرۊکایەتیی دەسەو ڕاوبەریی کەجەکەی بۊنەو گەشمەرڎاو مانگەو ئایاریوە ئەرەیاوناێوەش وەڵا کەرڎۊ. جە ئەرەیاوناکەینە ئامان:

"فرەو شۊڕشگێڵن و وەڵاتپارێزنا، کە دەوری تاریخییشا جە دەسپەنەکەرڎەی و وەڵیوەلوای کۊشیای ئازادیی کوردسانینە بییەن، جەلاو گەلوو وەڵاتپارێزنوو کورڎیوە نزیکۊ مشناسیا، جە مانگەو ئایارینە گەشمەرڎۍ بیێنۍ. جمیەروو ئێمە، بۊنەو تایبەتمەندییەکاشۊ، مانگەو ئایاریش کەرڎێنە مانگەو گەشمەرڎا. ئێمە جە کەسایەتیی گەشمەرڎاو ئایارینە بە ڕێز و پەنەزانایۊ یادوو گەشمەرڎاو شۊڕشی و دیموکراسی کەرمێوە و سەرەو ڕێزی پەی یادەوەرییەکاشا کۊمنمێرە، جارێوە تەر قەرار مدەیمۍ، کە کۊشیای ئادیشا بە سەرکەوتەی تاجدار کەرمۍ.

یاگۍ ئایاری جە شۊڕشوو کوردسانینە فرە گرنگەنە. حەر چا وەختۊ، کە قۊناغوو دەسپەنەکرڎەی کۊشیای ئازادیی کوردسانی دەسش پەنە کەرڎەن، ئازاتەرین و فیداکارتەرین ڕۊڵەکێش هامڕایی ڕابەر ئاپۊیشا کەرڎەن، دەسشا جە گرد چێوۍ وێشا ور گێرت و چەنی ڕابەر ئاپۊی بەشدارییشا جە ڕاپیمای مەبارەکنە کەرد، جە مانگەو ئایارینە گەشمەرڎۍ بیۍ. حەقی قەرار، کە یووەم گەشمەرڎەو پڕۊسەو بەپارتیکەرڎەی جمیەرەکەیمانە، خەلیل چاڤگون سەرمەشقوو مدرامانی حیلوان و سێوەرەگە، هەڤاڵێما فەرهاد کورتای، نەجمی ئۊنەر،  مەحمود زەنگین و ئەشرەف ئانیک، کە جە زیندانوو ئامەدینە دژوو سیستموو فاشیستوو ئەشکەنجەگەروو نەیاروو کورڎی مدرامانشا کەرد و گەشمەرڎۍ بیۍ، محەمەد قەرەسونگور، کە فەرماندێوە سەروازیی شۊڕشوو کوردسانی و چندین پاڵەوانی نەمرۍ تەرۍ،  جە مانگەو ئایارینە گەشمەرڎۍ بیۍ. جە وەڵێوەبەرڎەی و گەشەپەنەدای کولتووروو ئازایەتی و یارای، فیداکاری و قوربانیدای و قارەمانی پەی ئازادیی گەلی و وەڵاتی  کوردساننە، سەرمەشقبییەی هامڕا گەشمەرڎەکاو مانگەو ئایاری دەوری کاریگەر و تاریخییشا هەن. پا بۊنەوە، یادوو مانگەو ئایاری و ئا هامڕایا، کە جە مانگەو ئایارینە گەشمەرڎۍ بیۍ، پەی قەراردای  و پاگێرتەیرەیما سەروو ڕاکێشاوە فرە گرنگا. گەلەکەما جە حەرشۊنێوەنە با، پا هۊشیاری و وریایی و ورئێستەیۊوە، مشۊم جە گرد وەختیوە زیادتەر یادوو گەشمەرڎاو مانگەو ئایاری کەرۊوە و وێش بە ساعیبوو یادی و ویرەوەرییەکاشا بزانۊ.

ڕووەداێوە جە ڕووەدایەکاو مانگەو ئایارینە، کە گەلی وەڵاتپارێزنوو کوردسانی، کە دایمە بە یادکەرڎەیۊش تووڕە بۊ، کۊکوشیی هەولێری و گەشمەرڎەکاشا. پەدەکە جە ساڵەو ۱۹۹۷ ینە دەیان هەڤاڵۍ بریندارێما، کە جە خەسەخانەنە چارەسەرشا پەی کریۍ، کۊکۊشۍ کەرڎۍ. حەرگیز گەلەکەما ئەو کۊکوشی و خیانەتەو پارتوو (پەدەکە) ویر مەبەرۊوە. بەداخۊ پارتی (پەدەکە) بەرڎەواما چی هەڵوێستە خیانەتکارانەیشە، شانبەشانوو دەوڵەتوو تورکی بەشدارا جە ئەرەگیرکەرڎەی کوردسانی و کۊکوشکەرڎەی کوردانە، دژوو ئا گەریلایا، کە کوردسانی پارێزنا، یارڎەی سوپاو تورکی ئەرەگیری مدۊ. پەدەکە جگە جە هەرێمەکاو پارێزنای مەدیای، جە وەرنیشتنە و شەنگال و مەخمورنە بەرڎەواما جە هەڵوێسی خیانەتکارانەش. پارتوو (پەدەکە)ی بەتەمامی وێش  بەستەنۊ بە دەوڵەتوو تورکی ئەرگیروو ئاکەپە – مەهەپەو دوژمنوو کورداوە.

مانگەو ئایاری پەی جمیەروو سۊسیالیستیی تورکیایچ گرنگا. وەڵی گرد لاێوە ئیبراهیم کایپاک کایا، دەنیز گەزمیش و هامڕێکێش جە جمیەری سۊسیالیستیی تورکیاینە، فرەو شۊڕشگێڵنایچ جە مانگەو ئایارینە گەشمەرڎۍ بیێنۍ. ئێمە بە ڕێز و پەنەزانایۊ یادوو ئا گەشمەرڎە گەوراو جمیەری سۊسیالیستیی تورکیای کەرمێوە و جارێوە تەر ئەرەیاونمێش، کە ئێمە درێژە بە کۊشیاکەیشا مدەیمۍ.

ڕابەر ئاپۊ دایمە گرنگیی بە جمیەروو سۊسیالیستیی تورکیای و کۊشیای خەتەو ئا شۊڕشگێڵنە گەورا دان و جە پراکتیکنە بەکرڎەوە ئانەش سەلەمنان، کە درێژەپەنەدەروو ڕێکێشانە. جە پرۊسێوە ئاندە قەیراناوینە، کە فاشیزم جە کوردساننە و تورکیانە کەوتەن حەوڵۍ بەقووەتکەرڎەی وێش، کورد جە گرد وەختێوە زیادتەر پێویسشا بە وەڵیوەبەرڎەی و پەرەپەنەدای بە پەشتیوانیی یۊگێرتانەی چەنی جمیەروو سۊسیالیستی، دیموکراتیکوو تورکیای و گەشەپەنەدای بە کۊشیای دژوو فاشیزمی هەن.

ئانە هومێدوو گەشمەرڎان جە ئێمە، پەنەوازا جوابوو ئینەیە دەیمێوە و بەدڵنیاییوە وەشش کەرمۍ. سەروو ئی بنەمێوە پەنەوازا گرد کەسێوە خاستەر جە ڕاسیی گەشمەرڎا بیاوۊنە، بژیوۊ و کۊشیای گەش کەرۊ."

س.ز