کۊمیتەو پەیوەنڎییەکا جبەرو کەجەکەی جەبارەو ئاژاوەگێڵیەکا دژ بە ئێزدییەکا ئەرەیاۋناش، "داوا جە لایەنە سیاسییەکا عێراقی کەرمۍ، کە جە دژوو ئا سیاسەت و هەڵۋێسە غەڵەتا، هەڵۋێسشا بۊ و کێشەکا سەرو بنەماو گفتوگۊی چارەسەر کەرا".
کۊمیتەو پەیوەنڎییەکا جبەرو کەجەکەی ئەرەیاۋنېوەش سەبارەڎ بە ووروژنا و ئاژاوەگېڵیەکا دژ بە ئێزیدییەکا ۋەڵاکەرڎۊ، کە بەتایبەتی جە عێراق و پانیشتوو کورڎسانینە جە مەنتیقە جیاجیاکانە ئا وروژنا و ئاژاوەگێڵیۍ ئەنجام دریا و ۋەڵاکریاوە.
جە بەیاننامەکەنە ئاماژە پانەی کریان، ئێزیدییەکۍ گلېرگېوەنۍ، کە ڕێز جە گرڎ باوەڕیەکا و ئاشتیی بەینو باوەڕیەکان پۍ ۋېشا کەرڎەن بە بنەمېوە ئەساسی و کۊنتەرین کولتوور و باوەڕینۍ جە جەهانەنە و ئەرەیاۋناشا، "ۋەرو ئانەی کورڎێنۍ و کۊنتەرین گلېرگەی کولتوور و باوەڕینۍ، فرەو جارا ھجومشا کریان سەر و کۊکوژ کریېنۍ، کە دمایتەرین کۊکوژی کەرڎەیشا، کۊکوژیی مانگەو ئابو ٢٠١٤ ی بۍ جە لایەنو داعشیۊ ۋەرو چەماو گرڎو جەهانیۊ. ھەڵای دیمەنەکۍ کۊکوژکەرڎەو هەزارەھا ژەنا و جوۋانا ئێزدی، کە بە شێۋېوە وەحشیانە و نا ئینسانانە کۊکوژکریۍ، ئینا یاڎەوەری جەهانینە. حەرچنڎە ئێزیدییەکۍ جە تاریخەنە ۋەرەن ڕوو گرڎ ھجومۍ بیېنۍ، بەڵام بیە و ژیای وېشا سەرو خاکەکەیشاوە پارېزنان و ھجومشا نەکەرڎەن سەرو حیچ گەل و باوەڕیۍ، چنی مرۊڤەکا باوەڕیەکا تەری بە ئاشتی و دۊسانە و پەیوەنڎیی ھامسایانە ژیۋېنۍ."
جە بەیاننامەکەو کۊمیتەکەینە جەبارەو کەمپەینو پەلاماردا و ھجوم پۍ سەرو ئێزدییەکا ئاماژە پانەیچ کریان:
هەڵۋێسو بە ئامانجگېرتەو ئێزدییەکا مەترسیڎارا و مەبۊ قبوڵ کریۊ
جە ڕوۋانی ۋیەرڎەنە، بەتایبەتی جە عێراق و پانیشتوو کورڎسانینە ئانە پیویۊ، کە جە مەنتیقە جیاجیاکانە ھەرمانەی ئاژاوەگێڵیۍ جۊراوجۊرۍ دژ بە ئێزیدییەکا و باوەڕەکەیشا ئەنجام دریۊ. سەروو بڕێوە بنەیاناو عێراقی، کە گەرەکشانە شەنگالنە ئەرەنیشتۍ با و وەروو ئانەی زانیاری هەن، کە بڕێوە داعشۍ و ئانۍ کە هامکاریی داعشیشا کەرڎەن و ئێزدییەکێشا ڕادەسوو داعشی کەرڎێنۍ، کارڎایۊ ڕەواو خەڵکوو ئێزیدییش چەنە کەوتۊ، ئا کەسۍ کە جە لاو هێزە عێراقییەکاوە گیریێنۍ و حەرچندە مشکیلەکە حەل کریان ، وەلێم چندین ڕوێن کەمپینوو گەلەکۊمەکی پەی ناشیرینکەرڎەی جە دژوو ئێزیدییەکا ملۊ ڕاوە. بە وەڵاکەرڎەیۊ هەواڵا و دروا و غەڵەتی چانەی پێسە 'ئێزدییەکۍ مزگییشا سۊچنان و هجوومشا کەرڎەن سەروو سوننەکا' خەڵکوو شەنگالی کریێنۍ ئامانج و چا هەڵمەتە ژڵێونەرانێنە جە دژوو ئێزدییەکا داوا کریان هجووم کریۊ سەروو ئا کەمپاو ئێزدییا. ئا هەڵوێسۍ، کە خەڵکوو ئێزدی ۷۳ جارۍ فەرمانەشا دژ بەرکریێنە و بە ئامانجگێرتەی ئێزدییەکا مەترسیدارا و مەبۊ قبووڵ کریۊ.
هەڵای حیچ وەرپرس و دەسەڵاتدارێوە پانیشتی حیچش سەروو ئی بابەتی نەواتەن، تەنانەت بە هەڵوێسوو وێشا بیێنۍ پەشتیوانش چانەی، کە ئێزیدییەکۍ بە ئامانج گیریا. خەڵکوو ئێزیدیما بە هجوومەکاو داعشی کۊچشا کەرڎەن و پانیشتنە مرڎێنێوە و چاگە جە کەمپەکانە بەندۍ کریێنۍ و ڕاشا پەنە مەدریۊ بەیاوە سەروو خاک و نیشتمانوو وێشا، پانەیچ ڕاشا وەرڎەموو گرڎ فشارۍ و هجوومێوەنە پەی سەروو خەڵکوو ئێزیدیما کەرڎەنۊ.
وێپارێزنای زامنوو بییەین
وەراوەروو هەڵوێست و مدرامانوو گەلوو کورڎینە، کە ڕێککەوتەی ۹و تشرینوو یووەموو شەنگالیشا قبووڵ نەکەرڎەن، دیارا ئی جارە گەرەکشانە بە شێواز و ڕێبازی قیزەون گەل ڕادەس بۊ و پەی ئانەیجە ئاژاوەگێڵنای و ورووژنای و تێکدەرییشا وستەن هەرمانە، وەلیم با ئانەیە بزانا، کە خەڵکوو شەنگالی و ڕای گرڎینی دیموکراتیک و کورڎی ئانەیە قبووڵ مەکەرا. بە ئاژاوەگێڵنی و هجوومەکاو ئی دماییە جارێوە تەر ڕۊشن بییۊ، کە زامنکەرڎەی مافدارانە و بییەی ئێزدییەکا تەنیا لاو وێشاوە و بە وێپارێزنایشا مۍ دی.
بانگەوازما پەی دیاریکەرڎەی هەڵوێستین جە دژوو هەرمانۍ تێکدەرانۍ و ئاژاوەگێڵنای
بانگەوازمان پەی گرڎوو هێزە سیاسییەکا، ڕۊشنویرا، ڕێکوزیایەکا و ئەرەمەرزیایەکا دیموکراتەکا، گرڎوو ئا لایەنا ڕێز لە باوەڕەکا گێرا و ئاشتیوازی ئانەنە، جە دژوو ئی حەوڵە ژڵێونەرا و ئاژاوەگێڵنا هەڵوێس ور گێرا. حەرپاسە ئێمە داوا جە سەرۊککۊماروو عێراقی و حوکمەتی و لایەنە سیاسییەکا کەرمۍ، کە جە دژوو ئا سیاسەت و هەڵوێستە غەڵەتا، هەڵوێست ورگێرا و کێشەکا سەروو بنەماو دیالۊگی چارەسەر کەرا. وەڵۍ گرڎیوە داوا جە نەتەوە یۊگێرتەکا، گرڎوو ڕێکوزیای و ڕێکوزیا میاننەتەوەییەکا کەرمۍ، کە هەڵوێستێوە جە دژوو ئا جۊرە هاندای و ئاژاوەگێڵنایا گێرانە وەر و وەراوەرنە هەستیارۍ با. ئێمە داواو مرڎنای گرڎوو ئا هجووما کەرمۍ، کە بە ئامانجوو نکۊڵیکەرڎەی و بێبەشکەرڎەی و بێئیرادەکەرڎەی و سەروو بنەماو وێپارێزنای بییەی و ئشناسنامەی سیاسی – کولتوری و باوڕوو ئیزدییەکا، پەشتیوانی جە مدرامانی و کۊشیای خەڵکوو شەنگالی کریۊ".
ھ . ش / س . ز
