کەجەکە بە بۆنۆ ساڵڕۆو کۆمکوژی پاریسیوە ئەرەیاونێوەش وەڵاکەردۆ و ئەرەیاوناش، "ئەرەکۆشایما کە سەرو هێڵو گەشمەرڏاما ملۆڕاوە، ونەپەرسایۆ جە کۆمکوژییەکا مکەرۆ، ژیوایێ ئازادو، یەکسان و دیموکراتیک کە ئامانجو گەشمەرڏا بێ، بنیاڎ منیۆ".
هامسەرۆکایەتی دەسەو ڕاوەبەری کەجەکەی بە بۆنۆ ساڵڕۆو کۆمکوژی پاریسیوە ئەرەیاونێوەش وەڵاکەردۆ.
کەجەکە ئەرەیاوناش: "٩و کانونو دووەمی ٢٠١٣ جە پاریس ٣ مرۆڤێ هورچنێ ئەرەکۆشای ئازادیی کوردەسانی جە کۆمکوژییێ ناپاکانەنە گەشمەرڏێ کریێ. چا کاتەنە کە ڕابەر ئاپۆ پەی چارەسەریی پرسو کورد و دیموکراتیکبییەی تورکیاینە هەوڵەکێش وستێبێنێ وەگەڕ و جە ئەنجامو ئانەینە هیواکێ گەشێبیێبێنێوە، هێزی قڕکەر، تاریکەکا بە نیازو چەپەڵی پەی ئانەی تاوانە فشار وسا سەرو ڕابەرایەتی و جمیەرەکەیما و ئیرادەو گەلی ماڕا، ٧ا کۆمکوژیەشا کەرد. وێش جە وێشەنە جە ماوێوە کوڵەنە ئاشکرابی کە کۆمکوژییەکە جەلایەن میتیۆ ئەنجامدریان. جارێوە تەر ئا کۆمکوژییە شەرمەزار مکەرمێ کە بە شێوێوە نامەردانە ئەنجامدریا، جە کەسایەتی سارا، رۆژبین و رۆناهینە گەشمەرڏا دیموکراسی و گرڏو گەشمەرڏا شۆڕشی بە پنەزانایۆ یاڏمکەرمێوە و سەرەوێما وەراوەرو ئاریشانە منامنێرە. ئەرەکۆشایما کە سەرو هێڵو گەشمەرڏاما ملۆڕاوە، بە دڵنیاییۆ ونەپەرسای و حیسابپەرسایۆ جە گرڏو کۆمکوژییەکا مکەرۆ و پەی یاڏکەردەیۆ گەشمەرڏا ژیوای ئازاد، دیموکراتیک و یەکسانی بنیاد منیەیمێ".
ئەرەیاوناکەینە ئامان: "جە پاریسەنە بە مەبەسو زانابییەی هرووژم کریا سەرو هەر یەرە هەمڕێکێما" و ئەرەیاوناکەی بی جۆرە بەردەواما: "هرووژم جە دژو هەریەرە ژەنە کۆشش کەرا و شۆڕشگێڵێ بە ئامانجو لاوازکەردەی ئەرەکۆشای ئازادیی کوردەسانی و هێڵو ئازادیی ژەنا ئەنجامدریا. هەمڕا سارا یوەبێ جە کادرە ئەرەمەزنێرەکا پەکەکەی. جە دژو ستەم و ئەشکەنجەو دوژمنی بەشداریش جە مڏرامانو زینانی ئامەدی کەردەبێ کە یۆ بێ جە مڏرامانە شکۆمەندەکا و گۆرەکا تاریخی بێ. بە هەڵوێسوە هقم و جەبن ناما وێش تاریکی سەرو گەلو کوردەسانی دلێ زینانینە بڕییەرە و بیی بەڕۆشنای پەی گەلەکەیما. بە ئەرەکۆشای شۆڕشگێڵی ٤٠ ساڵەوۆ وێش و بە رەنجدای گۆرە هەم جە وەڵوستەو ئەرەکۆشای ئازادی کوردەسانی و هەمیچ جە بەهێزکەردەو هێڵو ئازادیی ژەنانە دەورێ گۆرەش گێڵنا و سەرمەشقایەتیش پەی کەرد. ئەرەکۆشای ئازادیی ژەنا کوردەسانەنە سەرو هێڵەو مڏرامانو هەمڕێ سارا لوا وەڵێ و بە جەهانی بی. هەمڕا سارا نەک هەر پەی ژەنا کوردی، هەرپاسە جە ئاستو جەهانیشەنە بی بە هێماو ئازادیی ژەنا. ڕابەر ئاپۆ ئەرەکۆشای ئازادیی ژەناش بە ئەرەکۆشای سارێ پێناسە کەرد.
هەمڕا رۆناهیەو رۆژبینەیچ وێش بە تەمامەتی پەی ئی دۆزەیە تەرخان کەرد،دلێ دڵیشانە ئازادی گەلی و ژەنا کوردەسانیشا هورگێرت و پەی ئانەی ئەرەکۆشێ.
پەی ڕۆشنکەردەیۆ و بەروستەو لایەنەکا کۆمکوژییەکەی هەنگامێوە نەنریا
گەلو کوردەسانی پەی ڕۆشنکەردەیۆ کۆمکوژی پاریسی چنین ساڵا بانگەواز ئاراستەو دۆڵەتو فەرەنسای و گرڏو دۆڵەتا ئەوروپای مکەرۆ. پێسەو جمیەرەی ئێمەچ چنین جارێ بانگەوازما کەرد. ئەر دۆڵەتو فەرەنسای گەرەکشا چێرو بارو تۆمەتبارینە بێ چبەر، مشۆم کۆمکوژی پاریسی ڕۆشن کەرۆوە. بەڵام تائیسە پەی ڕۆشنکەردەیۆ کۆمکوژیەکەی حیچ هەنگانێوەش نەنیان. ئینەیچ چنین ساڵێن ئێمە و گەلەیما نیگەرانێ بیێنمێ. بێگومان ئانەی ئا کۆمکوژیەش کەرد دۆڵەتو تورکی بێ. گەلەکەما و جمیەرەکەما ئا حەقیقەتەیە مزانا. بەڵام زانایش کە دۆڵەتو تورکی وێش بە تەنیا ئا کۆمکوژیەش نەکەردەن. بەبێ پەشتیوانی دەزگو هەواڵگرییەکا و دۆلەتا ئەوروپای تۆڕو تیرۆرو میتی و دۆلەتو تورکی یاگێ پێسەو پاریسی مەتاوا کۆمکوژیێ جا جۆرە بە تەنیا ئەنجام دانە. وێش جە وێشەنە سەربارو ویەردە ١٢ ساڵا تائیسە نە فەرەنسا و نە دۆڵەتا ئەوروپای پەی ڕۆشنکەردەیۆ کۆمکوژیەکەی حیچ هەنگامێوەش نەنیان و ئانەیچ بەرش وسۆ کە کۆمکوژی پاریسی ئۆپراسیۆنێوە ناتۆ-گلادیۆین. وەرو ئانەی مشۆم کۆمکوژی پاریسی بە گرڏ جۆرێ بۆ ڕۆشن کریۆوە. کێ هامکاری دۆڵەتو تورکیش کەرد و بە چ ئامانجێ بی هامکارو کۆمکوژیەکەی، مشۆم بەگرڏ رەهەندەکاشۆ ڕۆشنکریۆوە.
گەشمەرڏا سلۆپی بە رێز و پنەزانایۆ یاڏۍ مکەرمێ
کۆمکوژیێ هامشێوە جە ٣و کانونو دووەمی ٢٠١٦ جە سلۆپی ئەنجامدریا. چا یەرێ ژەنێ کۆششێ و سەرمەشقێ هەمڕا سێڤێ دەمیرەو، پاکیزە نایرەو فاتمە ئویارە گەشمەرڏێ کریێ. ئێمە ئا گەشمەرڏا بە رێز و پنەزانای یاڏمکەرمێوە. فرە مانادارا کە گەلەکەما جە ساڵیادو کۆمکوژینە گەشمەرڏا سلۆپیشا جارێوە تەر ویرئاردیمێ. تەنیا بە یاواینە جە یاڏو گەشمەرڏا و خاوەنداری جە یاڏو ئاریشا تاومێ وێما بە ئازادی یاونمێ و بە شێوێوە دروس ژیومێ. تا ئانە نەبۆ نە متاومێ بە شێوێ راست و ئازاد ژیومێ و نە سەرو راسی و ئازادیچ متاومێ باس جە حیچ چێوێ بکەرمێ.
ڕابەر ئاپۆ گرڏ کاتێ دڵسۆزی وێش پەی گەشمەرڏا وزۆ ڕووە و باس چانەیەکەرێ کە ئەرەکۆشای ئازادی ئەرەکۆشاین جە یاڏکەردەیۆ دڵسۆزی و وەفاداری بە گەشمەرڏا. مشۆم بزانیۆ کە کوردەسانەنە گرڏ چێوێ سەرو ئا بنەمێ خوڵقیان و بە مامەڵێوە راس چنی راسی گەشمەرڏا بۆنە ئێمە سەرو هێڵۆو ئاڎیشاوە پەرە بە ئەرەکۆشای ئازادی مڎەیمێ".
