کەجەکە جە بارەو عەزیمە ئارسونۍ، کە نەۋەشی قورسش هەن و جە فڕگەخانەو هۊلێری گیریېنە ئەرەیاۋناش، "پارتی (پەدەکە) جە چارەنۋیسو ھامڕېما عەزیمە ئارسونۍ وەرپەرسا". کەجەکە داوا کەرۊ، ڕادەسو دۊڵەتو تورکی نەکریۊ.

ئەرەیاۋناکەو کۊمیتەو پەیوەنڎییەکا جبەرو کەجەکەی چا بارۊ:

"ئێمە ئینایمۍ سەردەمێوە تاریخی گرنگەنە، کە فاشیزمی ئەردۊغانی ئینا لێوارو شکسی و وڕاینە. ڕژێمی فاشیستیی ئاکەپە – مەهەپەی، کە تاوانەی کۊکوژیش دژ بە گەلەکەیما ئەنجام دان، چنی دوژمنا کورڎی و گرڎو نۊکەرەکا ۋېش حەتا دما نەفەس ھجوم کەرۊ. مدارمانو ڕابەر ئاپۊی، گەلەکەما و گەریلاکۍ ئازاڎیی ڕژێمی فاشیستییش یاۋنان بە لێوارو وڕنای.

دلۍ گېچەڵۍ و قەیرانۍ چا جۊرەینە، ئەنڎامێوە کۊشیۍ پۍ ئازاڎیی گەلەکەیما، هەڤاڵە عەزیمە ئارسونە، کە نەۋەشی قورسش ھەن، جە فڕگەخانەو هۊلێرینە گیریا. هەڤاڵە عەزیمە، کە حۊلش دا پۍ چارەسەری بلۊنە جبەرو ۋڵاتی، جە فڕگەخانەو هۊلێرینە مرڎناشا و گېرتەشا. بە خێرایی جە لایەنو (پەدەکە)ی و دەزگاو بەنامۍ پارېزنایۊ ئەڕفاشا و فاڕاشاوە پۍ شۊنېوە نادیاری. زانیاریی ئانەی  ۋەڵا کریۊوە، کە وچیۊ، ئا هەڤاڵېما، کە گیریېنە جە تەرەفو دەزگاو بەنامۍ پارېزنایۊ ئەڕفېنەشا و ڕادەسو دەزگاو میتو دۊڵەتو تورکیشا کەرڎېنە. چا بارۊ حیچ زانیاریېوە پەشڕاسکریاما نییا، بەڵام زانیاریی پەشڕاسکریا ئانەن، کە ھاڤاڵە عەزیمە جە لایەنو دەزگاو بەنامۍ پارېزنایۊ ئەڕفیېنە، بۍ ئانەی حیچ تۊمارێوەش پۍ وەشکریابۊ. پۊکەی تەرسەو ئانەی ھەنە، کە ئا هەڤاڵېما، کە نەۋەشیۍ قورسو دڵیش هەن ڕادەسو دۊڵەتو تورکی کریۊ.

شەرمەساریېوە گۊرەن، کە پارتی (پەدەکە) پی جۊرە ژەنېوە شۊڕشگێڵەو کورڎی بڕفانۊ و حۊل مڎۊ پۍ پەیوەنڎییە پیسەکا ۋېش چنی دۊڵەتو تورکی بەکارش بارۊ. پارتی (پەدەکە) و دەزگاو بەنامۍ پارېزنایش جە چارەنۋیسو هەڤاڵە عەزیمە ئارسونۍ وه رپەرسېنۍ.

سەرو ئی بنەمۍ داوا جە ڕای گرڎی کورڎسانی و گرڎو ڕێکوزیاکا ژەنا کەرمۍ، پۍ ئاگاڎاربیەی جە چارەنۋیسو هەڤاڵە عەزیمە ئارسونۍ دەستبەکارۍ با و دەس بە جموجوڵی کەرا و ڕا نەڎا ڕادەسو دۊڵەتو تورکی کریۊ، کە ئانە بۊ بە پەشتیوانیی پارتی (پەدەکە)ی پۍ هەڵمەتەو ھورچنیەی ئەردۊغانی فاشیستی."

ھ . ش