کۆمیتەو پەیوەندییەکا جبەرو کەجەکەی: بانگەوازما پەی دەوڵەتی و حکومەتو عێراقی ئانەن، وەرانوەرو تاوانە جەنگیەکا تورکیاینە مردێوە و رێککەوتێوە کە چەنی ئەردۆغانی پەی پشتیوانی داعشی ئیمزاکریان دەمودەس هۆرشنریۆوە.
جە ئەرەیاوناو کۆمیتەو پەیوەندییەکا بەرو کەجەکەینە ئامان، " خەڵکەکەما جە کەمپو گەشمەردە رۆستەم جودی مەخمورینە کە سیاسەتو قڕکەردەی، تاونایۆ، ئەسڕیەیۆ و نکۆڵی دەوڵەتو تورکیایشا ڕەڎکەردەنۆ، وەرا وەر بە فشارەکا نۆکرایەتی و خیانەتو پەدەکەی مردێوە، سەرەڕاو تەنگوچەڵەمەی و دژوارییەکا پاگیری سەرو ژیوای ئازادی مکەرۆ و وەرو ئانەی جە وڵاتەکەو وێشانە بیێنۍ بە پەنابەرۍ، جە ڕوانی وییەرڎەینە جارێوە تەر کریا ئامانجو هێرشو تیرۆریستی درۆنەکا دەوڵەتو تورکی. ئا هجومێ وەر چەما هێزەکا دەوڵەتو عێراقیۆ ئەنجامدریێ کە چێرو نامۍ پاررێزگاری کەردەینە کەمپەکەشا تەوقەدان و ٢٤ سەعاتێ وزاشا چێرو چەمداریۆ. ئا گەلەی هجومش کریان سەر، سەربارو تەنگوچەڵەمەی و دژوارییەکا و بێ دەرفەتیو، جە دژو چەتەکا داعشی کە بە پەشتیوانی دەوڵەتو تورکی گەرەکش بێ عێراقی و پانیشتوو کوردسانی ئەرەگیر بکەرۆ سەرو بنەماو وێپارزنای و وێڕاگیریش کەرد، بە مدرامای رەسەنو ۋێش جە وەرانوەرو تیرۆرێنە بە مەژگوو پەشتیوانی ئەردۆغانی جە پارێزنای گەلاو عێراقی و پانیشتوو کوردسانی دەورێ سەرەمەشقشا گێڵنا. ئا مدرامانە ئەفسانەییەو خەڵکو مەخموری پەی پەدەکەی و مەسعود بارزانیچ کە دوژمنایەتی ئا خەڵکەیە مکەرۆ و تەوقەشا سەرەرە سەپنا، بی بە مایۍ سوپاسگوزاریشا کە ناستشا هەولێر گنۆ چێرو دەسا داعشی. دەوڵەتو تورکی ئەرەگیری کاتێ داعش جە عێراق و تەمامو ۋەرکۆتوو مېیامینینە خەریکو تیرۆری بێ دەسش بە حیچ جوڵێوە نەکەرد، بەڵام جە وەرانوەرو ئا هێزانە کە شەنگال و مەخمورەنە داعششا شکس پنە ئارڎ و ناوەندو مدرامانین، دەسش بە هجومی کەرد. پەی ئانەی هەقەو شکسو داعشی جە وێڕاگیرا دژ بە داعشی بکەرۆوە، هجوم مکەرۆ سەرشا و چا هجومانە چەتەکۍ داعشیش رێکێوستێنۍ و چێرو چەترەو سوپاو ئەرەگیرینە ئاردێنێش پانیشتوو کوردسانی. دەوڵەتو تورکی بییەو گەریلاکا ئازادیی کوردسانی چا پێسەو بەهانۍ هجومەکاش نیشان مڎۆ، ئینەیش جە وەختێنە گەریلا پەشتگیری خەڵکو مەخموریش کەرد و داعشش جە دەروازەو هەولێرینە مردنا. دەوڵەتو عێراقی دلێ دیدارەکاشەنە چەنی خەڵکو مەخموری قەولش دا کەمپەکەی پارێزنا، هێزەکا گەریلای کە ژمارەشا کەم بێ، بەرەو هەرێمەکا پاراستنو مەدیای کێشیێوە و دەوڵەتو عێراقی قەولشدا جە وەرانوەرو گرد جۆرە هجومێنە کەمپەکەی پارێزنۆ. ئا دیدار و هەنگامێ گرد جە چوارچێوەو داواکاری نەتەوەیۆگێرتەکانە و نوێنەرایەتیەکەیسەنە جە عێراق (یونامی)و بە چەمڎاری و ئاگاڎاری ئاڎیشا ئەنجام دریان. جە پارێزگاریکەردەی جە کەمپەکەی و پارێزناو ئەمنیەتینە، دەوڵەتو عێراقی و نەتەوەیۆگێرتەکۍ جە روو یاسایی و ئەخلاقییۆ ۋەرپەرسێنۍ".
هجومەکێ جە چوارچێوەو ڕێککۆتەکەینە ئەنجام مڎریا
جە درێژەو ئەرەیاوناکەو کەجەکەینە ئاماژە پانەی کریان: "دماو دیڎارەکا بەینو دەوڵەتو ئەرەگیرو تورکی و دەوڵەتو عێراقی و ئیمزاکەردەو ڕێککۆتننامەو بەینیشا، هجومەکۍ پەی سەرو کەمپی وگەلو مەخمووری دەسشا پنەکەردۆ. گەلو مەخمووری کە کۆیلایەتی مۆدێرن سەرشارە سەپیۆ قبووڵش مەکەرا و بە هەوڵەکاو وێشا ژیوایێ ئازاڎ بنیاڎ منیا، جارێوە تەر بی بە ئامانجو هجومە تیرۆریستییەکا ئەردۆغانی-باخچەلی، کە خاوەن عەقڵیەتو کۆمکوژینۍ. ئی هجومە جەدماو هجومەکا سەیسایەق، دووکان، برادۆستی و ماوەتی ئەنجامدریا کە ٧ کەسێ چنەشەنە گەشمەردێ کریێ. ۋەرپەرسو ئی هجوما دەوڵەتو عێراقی و نەتەوە یۆگێرتەکانۍ، فڕۆکەو بێفڕۆکەوانو دەوڵەتو ئەرەگیرو تورکی دەمودەس جە ئاسمانو کەرکوکینە وزیۆرە واری، بەڵام گرڎ ڕوۍ بە ئازادی سەرو مەخمورینە سوڕیۆوە تاوۆ هجوم بکەرۆ کەچی دەوڵەتو عێراقی دەنگ نمەکەرۆ، ئینەیچ ئانەی بەروزۆ کە حکومەتو عێراقی بەینو کەرکوکی و مەخموورینە جیاکاریی مکەرۆ، سەرەڕاو ئانەی ئاگاڎارو هجومەکان و ئی هجومێ جە چوارچێوەو ڕێککۆتەو بەینیشانە ئەنجام مڎریانە.
دەوڵەتو عێراقی پەنەوازا دەمودەس ڕێککۆتەکەیش هۆرشیونۆوە
ئەگەر دەوڵەتو عێراقی گەرەکش نیا پێسەو دەوڵەتێوە کە تاوانەو کۆمکوژیش ئەنجامدێنە و ڕێکەوتەیش پەی ئەرەگیرکەردەو وڵاتەکەیش کەردەن، نامێش بلۆ دلێ تاریخیۆ، پەنەوازا دەمودەس ڕێککۆتەکەیش چنی تورکیای هۆرشېونۆوە. چونکی ئی ڕێکۆتەیە و قسۍ وەزیرو وەرگیری عێراقی جە چن ڕۆی ۋییەرڎەنە دەربارە بە جمیەرەکەیما، جگە جە پاساو ئاردەیۆ پەی ئەرەگیرکەردەی و ئەرەبڕیەی خاکو پانیشتی و عێراقی بە تورکیای هیچ مەعنێوەشا نییەنە. وەزیرو وەرگیری جیای ئانەی وەرگیری جە عێراقی بکەرۆ جە وەرانوەرو هجومە ئەرەگیریەکانە، وەرگیری جە ئەجندا تایبەتەکا جەنگو سوپاو ئەرەگیرەو تورکی پەی سەرو گەلو عێراقی مکەرۆ.
پی جۆرە جە وەرانوەرو ئانەینە بەهانۍ پەی هجومە ئەرەگیریەکا مارۊوە. هجومەکەو سەرو مەخمووری دماو ئا قساو وەزیرو وەرگیری ڕووەش دێنە کە بەهەمان شێوە یاگۍ سەرنجینۍ.
ئا ڕێککەوتەی هامپەیمانیەی کە چنی دەوڵەتو تورکی مکریۆ، جیا جە کۆمکوژی و وێرانکاری وەڵێ کەوتەیش نمەبۆ، نەک هەر ئەمنیەت نمارۆ بەڵکم جەنگو و کاولکاریش چنەگنۆوە. ئانێ بانگەشەی پێچەوانە مکەرا، پەنەوازا تەماشەو دۆخو سوریای بکەرا، ئەردۆغان وەرانوەرو بەشار ئەسەدی چێشش کەرد، جەکاتێنە پنەش واچێ 'براکەم'؟ جە سەختتەرین ڕووەکا عێراقینە، کونسوڵخانەکەش بە کراوەی جە ناوەندو عێراقینە جە سەروبەڼو داعشینە جیا ئاست و حیچ هامکاریێوە عێراقیش نەکەرد. ئارۆ ئەردۆغان و تورکیا چنین متاوا پەی ئاسایش و ئەمنیەتو عێراقی دڵسۆزێ با؟
داوا جە دەوڵەتی و حکومەتو عێراقی مکەرمێ کە وەرانوەر بە هجومەکا دەوڵەتو ئەرەگیرو تورکیای پەی سەرو خەلکی مەدەنی، بەتایبەتی هجومەکا سەرو ئاوارەکا کەمپو مەخمووری و تاوانە جەنگییەکاش، هەڵوێس نیشانە بڎا و دەمودەس ڕێککەوتەی چنی لایەنگرو فاشیستو داعشی، ئەردۆغانی هۆرشێوناوە. هەرپاسە داوا جە نەتەوە یۊگێرتەکاو و نوێنەرا یوئێنی جە عێراقەنە مکەرمێ کە بە پاو قەولو و یاساکا مافو ئینسانی مامەڵە بکەرا و بە چەمو پەدەکەی و ئەردۆغانی فاشیستی تەماشەو ڕووەدایەکا نەکەرا، ئا ڕێبازەی کە جە مەنتیقەکا تەرو جەهانینە پەی ئاسایش و ئەمنیەتو ئاوارەکا بەکار بریۆ هامکات پەی ئاوارەکا مەخمووریچ بەکار بارا و پەی پارێزناو ژیوای گەلەکەیما جە کەمپەکەنە ۋەرپرسیاری وێشا جابەجۍ بکەرا."
