کۊمەڵەو پارێزەراو تورکیای (تەتەبە) سەروو "خراپبەکارئارڎەی باوڕی"  داواکاریی گرڎینوو ئەنقەرەینە سکاڵاش  دژوو وەرپەرساو مانگۍ سوورۍ تورکیێوە تۊمارە کەرڎە.

ئەرەیاوناکەو تەتەبەی بارەو تۊمارکەرڎەی سکاڵۍ، سەروو وەرپەرساو مانگۍ سوورۍ تورکیێوە ئامان: "هەرمانەی سەرەکییەو مانگۍ سوورۍ ئانەن پەی مسڵەحەتی گرڎینی هەرمانە کەرۊ، وەختێوە کارەساتی سروشتی ڕووە بڎۊ، هەوڵۍ پەی پارێزنای ژیوای و تەندروسیی ئینسانی، هەوڵۍ دژوو ئاورایی، گەدایی و بێبەشبییەی بدۊنە و ئا خەیمۍ، کە ئینۍ ئەمانەتوو ئاڎینە، مشۊم بە پاو هەرمانە دیاریکریایەکاشا بیاوا یاگۍ کارەساتەکەی".

'دژوو یاسایەکا و مافەکاو ئینسانین'

جە درێژەو ئەرەیاوناکەینە ئامان: "جیای ئانەی هەرمانەو وێش کەرۊ، پەی حەلوو مشکیلەو سەرساو هاموەڵاتییا، ئا خەیمۍ ئەمانەتۍ ئاڎینۍ و مشۊم دەمودەس ڕوانەو یاگەکا کریا، ڕاو ئا کۊمپانیایۊ کە وەشێش کەرڎێنۍ، ورەتەی خەیما، چوارچووەو ئا یاسایانە، کە پەیوەندیشا پۊشۊ هەن، تاوانێوەن مشۊم وەرپەرساو مانگۍ سوورۍ سەرش سزا دریا. ئا هەرمان و ڕەفتارەو کەسە گوماناوی و تۊمەتبارەکا، جگە وەرپەرسبییەی و سزادایشا، هەرمانەکێشا دژوو یاسایەکا و مافەکاو ئینسانی و بنەما سەرەکییەکاو خاچی سووری میاننەتەوەیی و یاسا میاننەتەوەییەکاو مافەکاو ئینسانیچا".

دماو ئانەی ئاشکرا بی، کە مانگەی سوورەو تورکی دماو بوومەلەرزەکەیۊ  خەیمۍ و پێویسیێش بە  نزیکا "ئەحباب"ی ورەتێنۍ، دلۍ گلێرگەینە کارڎایۊیۍ فرە وەراوەروو مانگۍ سوورۍ تورکیێوە وەش بییەن.

س.ز