یۊ جە کەمئەنداماو سەرەورڎای ژەنی، ژیوای، ئازاڎی لاو دادگاو شۊڕشیوە مەهابادنە بە تۊمەتەو "هەوڵدای دژو ئاسایشی نیشتمانی جە ڕاو ئەندامبییەی جە حزبێوە ئۊپۊزسیۊنینە" و "بانگەشە دژو دەوڵەتی" بەگردی سزاو ٥ ساڵا و شش مانگا زیندانییش سەرۊ سەپیا.
تۊڕەو مافەکاو ئینسانو کوردستانی، سادق مەحمود نەژاد کە جە وێنیشانەدایەکاو سەرەورڎای ژەنی، ژیوای، ئازاڎیینە پیرانشارنە بۊنەو وەرکەوتەی گولـلە ساچمەیۊ چەمش تواناو وینایش کەم بیەنۊ، دادگاو شۊڕشو دەوڵەتو ئێرانیوە مەهابادنە سزاو پەنج ساڵا و شش مانگا زیندانیش ملەرە سەپیێنە.
ئانەیچە وزیان ڕووە، کە مەحموود نەژادلاو ئا دادگایۊ تۊمەتەو "هەوڵدای دژو ئاسایشی نیشتمانی" جە ڕاو ئەندامبییەیش جە حزبێوە ئۊپۊزسیۊنی کوردییوە "بانگەشە دژوو دەوڵەت"یش وزیان پاڵ.
جە مانگەو ئاب/ ئۊگۊستو ئێساڵیچەنە لقو دووۍ دادگاو پیرانشاریچ بە تۊمەتەو "تێکدای ئارامی و ئاسایشی گردینی جە ڕاو بەشداریی جە وێنیشاندایەکانە " و "هاندای خەڵکی پەی تندوتیژی جە ڕاو وەڵاکەرڎەیۊ بابەتینە تۊڕەکۊمەڵایەتییەکانە" سزاو یەرۍ مانگا زیندانی و دایوەنەی ٣٠ قامچییا سەروو ئا وێنیشاندەرە گیریایرە، سەپنێبۍ، کە سزێکێش بە وجارای بڕو ٨ ملوێن تمەنا فاڕیێبێوە.
سادق مەحموود نەژادی ٢٣ ساڵە ٢١و ئەیلول/سێپتەمبرو ٢٠٢٢ میانەو وێنیشاندایەکاو پیرانشارینە بە گولـلۍ ساچمەییەو هێزەکاو دەوڵەتو ئێرانی چەمش بریندار بی و سەدەنە ٨٠و تواناو وینای چەمی چەپیش نەمەنێنە.
ئا هاموەڵاتە جە ٣ تەمووز/ جولای ٢٠٢٣ لاو هێزە ئەمنییەکاوە گیریا و فاڕیاوە پەی بۊ زیندانو ئیتلاعاتی جە پیرانشارنە و جە ١٥ئا مانگێنە بە نیایرەی بارمتەی ٤ ملیار تمەنی بە کاتی زینداننە ئازاڎ کریابۍ.
شۊنەو کوشیای ژینا ئەمینیێرە لاو پۊلیسو ئەخلاقیوە تاراننە، جە ١٦و ئەیلولو ٢٠٢٢وە شەپۊلێوە بەرینەو وێنیشانەدای و ناڕەزایەتیی وەرکەوتو کوردستانی و ئێرانش گێرتۊ، کە زیاتەر جە ٥٠٠ کەسا کوشیۍ و بە هەزارانێتەرۍ بریندارۍ بیۍ و بەشێوە چا بریندارا بۊنەووەرکەوتەی گولـلۍ ساچمەییێوە چەمۍ، یان هەردووی چەمێشا جەدەس دێنۍ.
