بە دروشمەکا 'بە ئەرەمەرزنای گلێرگێوە دیموکراتیک و وۍ پارێزنای ڕابەر ئاپۆی ئازاڎ کەرمۍ، دوژمنی ماڕمۍ کۆنگرەو ٣ەمینوو ئەنجومەنوو گەلی بە بەشداری ٤٢٠ ئەنداما دەنگ دەری، کە جە ٢١و شوباتوو ٢٠٢٤ی دەسشپنەکەردەبۍ، دماو شش ڕووا جە کەمپوو گەشمەرڎە ڕۆسەم جودی (مەخمور)ینە دمایش پنە ئاما.

جە کۆنگرەکەنە گوزارشتەو ساڵانەو ئەنجومەنوو گەلی، ئەنجومەنوو عەشتاری و ئەنجومەنوو گەنجا ونیێوە و هەرمانە و کەمکوڵیەکۍ دووە ساڵی ویەردەی هۊرسەنگیۍ و باس جە وەڵۍ وستەیشا کریا. حەرپاسە هامپەیمانی کۆمەڵایەتی و سیاونوویسوو قەرارنامەکا ونیێوە و دماو ڕازیبیەو ئەندامەکا پەسەنڎکریا. دماتەر هۊرچنیەو هامسەرۆکوو ئەنجومەنی و هامسەرۆکی دیوانی کریا

جە هۊرچنیەکەینە فیلز بوداک و ئەحمەڎ شەباز پێسە هامسەرۆکا ئەنجومەنی، عەلی بلێهی و نۆدەم یەمانە پۍ دیوانوو ئەنجومەنی هۊرچنیۍ.

هامسەرۆکوو ئەنجومەنوو گەلوو مەخموری فیلز بوداک قسۍ دماینەش کەردە. فیلیز بوداک هۊرچنیەو ئەنجومەنوو گەلی دیموکراتیکی مەخموری پێرۆز بە ڕابەروو گەلوو کوردی عەبدوڵا ئۆجالانی و تەماموو ئەنداما کەرد و باسش جە هەرمانەکا شش ڕووەو کۆنگرەکەی کەرد و واتش: "چی شش ڕووەنە هۊرسەنگنای پەڕمانا و گەلێ پێشنیار کریۍ. بە قۆناغێوە پەڕ زەحمەتەرە ویەرمۍ، یووەمین ئاژەو ۋەرپرسیاریما ئاژەو ڕابەرایەتیا. بیمۍ بە جواب دەرەوەو سیاسەتوو قڕکەردەی و نکۆڵیکەردەی، حەرپاسە جە ئایندەنە ئا سیاسەتەیە پوچ کەرمێوە کە سەروو کامپەکەی ئەنجام مڎریا. حەر هەرمانێوە پێوس کەرۆ چنی حکومەتوو عێراقی و نەتەوەیۊگێرتەکا و هەرێمیوە پۍ وەڵۍ وستەی ئی خەباتەیما کەرمێش. گرڎ هەرمانۍ کەرمۍ پۍ ئانەی سیستموو کەمپەکەی بەقوەتتەر بۆ. ئایدیاو ژیۋایۍ یاگەگیری، ژیۋایۍ نمونەیی پۍ کامپەکەی ئەرەمەرزنمۍ و گرڎ نمونێوە سیستموو کامپەکەی فاڕمێوە پۍ سەرنیشت، پانیشت ۋەرکەوت و ۋەرنیشتی. ئا سیستمەی کە مەرزنمێشەرە چن بتاومۍ ۋەرپرسیارۍ بیمۍ، حەرچیما دەسەنە بۍ پۍ ئازاڎیی جەسڎەیی ڕابەر ئاپۆی کەرمێش و سیستموو دەسەڵاڎداری هۊرشێونمۍ. پێسە کامپوو مەخموری جە ئاستی جەهانینە سیاسەتوو چۆڵکەردەی دەگاکا و گلێرگێوە بێ بنەڕەتما پوچ کەردۆ و دڵنیایی ۋێما هەتا دما ئاست پارێزنان."

دما بە دماو قسەکا، ئەندامە تازەکۍ ئەنجومەنی کە جە ٩٥ ئەنداما پێکئامێنۍ، قەسەمی یاساییشا وارد و جە دمادمایینە کۆنگرەکە بە وەنایۆ دەرنجامەکا کۆنگرەی دمایش ئاما.