جە پەیامێوە مبارەکباینە دیوانو هامسەرۆکایەتی کۆنگرەو گەلی ٤و نیسانی ٧٦‌مین ساڵڕۆو جە ئەڎابیەو ڕابەر ئاپۆیش پیرۆز کەرد و دەسنیشانش کەرڎ؛ ٤و نیسانی ڕۆو ژیۋایۆ گەلو کوردین جە دژو سیاسەتەکا قڕکاریی و تاونایۆ گەلو کوردی.

پەیامەکەو کۆنگرەو گەلی پی جۊرەنە:

"بە وەشەسیای و شکۆوە ٧٦ـەمین ساڵڕۆو جە ئەڎابیەی ڕابەر ئاپۆی پیرۆز مکەرمۍ. ٤و نیسانی ڕۊبیەو  کوردی ئازادی، ژیۋای ئازادی، ئینسانی ئازادین.

ۋەروئانەی گەلو کوردی بە سیاسەتەکا قڕکەردەی چاندی و بەڎەنی ڕووبەڕوو دلېنەبەردەی بیێبێنێوە، ٤و نیسانی بی بە ڕۊبیەو ژیۋایۆ ژیۋای ئازادی. پی مەڵامەتۆ گەلی وڵاتپارێزنما و بەتایبەت ژەنا ٤و نیسانی پېسە ڕۊبیەو ۋێما پیرۆز مکەرا. سەرو ئی بنەمایۍ جە دڵۆ ٤و نیسانی جە ژەنا و گەلەکەیما پیرۆز مکەرمۍ.

سڵام جە گرڎو وڵاتپارێزە بەشداربیەکا 'ڕاپیماو جە ئامەدیۆ تا ئامارا'ی مکەرمۍ، کە بە سەرمەشقایەتی جوانا بە هوتافەو "ڕۆو جە ئەڎابیەیت پیرۆز بۆ ڕابەر ئاپۆ"ی ئەنجام مڎریۆ.

نەورۆزو ٢٠٢٥ بی بە شکۆدارتەرین نەورۆز کە بە هوتافەو "ڕابەرایەتی ئازادی، گلېرگەی دیموکراتیک"ی پیرۆز کریا و پېسە ڕێفراندۆمو گەلو کوردی جە پەڕەکا تاریخینە تۆمار کریا، کە بە داواو ئازادی بەڎەنی ڕابەر ئاپۆی ئەنجام دریا.

جە ئیسە بە دماوە گرڎو ئا کار و ئەوەکۊشایا مکریا، بە مەرامو ئازادی بەڎەنی ڕابەر ئاپۆی ئەنجام بڎریۆ. ئازادی بەڎەنی ڕابەر ئاپۆی بە ماناو فاڕیای سەرو سیاسەتەکا نکۆڵی و دلېنەبەردەی سەڎساڵەو دۊڵەتی مۍ. نزیکایەتی دۊڵەتی جە ڕابەر ئاپۆی نیشانۍ نزیکایەتییا جە مژارو چارەسەری دیموکراتیکی.

بانگەوازو ٢٧و شوباتو ڕابەر ئاپۆی کە پېسە 'مانیفێستۆو سەدە'ی نامێش بریا، پەی گەلاو تورکیای دەرفەتێوە تاریخیش ڕەخسنا. پەکەکە و گەلو کوردیچ پەشتیوانی تەمامشا جە ڕابەر ئاپۆی کەرڎ.

کەچی بە ئیسەیچۆ حکومەتو ئاکەپەی جوابێوەش نەڎانۆ کە بە پاوە گرنگی و ستراتیجی ئی بانگەوازییە تاریخیە بۆ. تەڤگەرو ئازادی و گەلەکەما بە هەستیاریێوە گۊرۆ پرۆسەکەی هۊرسەنگنا. گرڎو هێزە دیموکراسییەکا کە لایەنگرۍ بانگەوازو 'ئاشتی و گلېرگەی دیموکراتیک'ـی ڕابەر ئاپۆینۍ، پەنەوازا سەرمەشقایەتی چی پرۆسەیە بکەرا و پەی ڕەخسنای ئی دەرفەتە تاریخیە سەرو بناغەو 'ئەرەمەرزنای گلېرگەی دیموکراتیکی' دەورو ۋێشا گێڵنا.

سڵام جە گرڎو ئا چالاکییا مکەرمۍ کە جە دلۍ و جبەرو کوردەسانینە پەی ڕۊبیەو ڕابەر ئاپۆی مکریا. بە جۆشوخرۆشو ۋۍ یاونایما بە ڕابەرایەتی ئازادی سەرو بناغەو بیروباوەڕێوە کە ساڵۊو ٢٠٢٥ مکەرۆ بە ساڵۊو ئازادیما، هیواو سەرکۊتەی پەی هەرمانەکا گەلی و دۆساما موازمۍ."