مېیانو ئەرەیاۋنای و چاپەمەنی هێزەکاو پارېزنای گەلی (هەپەگە) بە ئەرەیاۋنێوە ئامارەو جەنگەکا مانگۊو ئاداریش وەڵا کەردێوە.

ئەرەیاۋناکەو هەپەگەی پی جۊرەنە:

"پارتیما پەکەکە سەرو بنەماو پەیامە تاریخیەکەو ڕابەر ئاپۆی، جە ١و ئادارو ٢٠٢٥ینە ئایېربەسش ئەرەیاۋنا. فەرماندەیی قەرارگەو مېیانو پارېزنای گەلی جە هەمان ڕۊنە ئەمرەش کەرڎە گرڎو هێزە بنەڕەتییەکاما، ئا تیمە فیدایۍ کە بە تایبەت ئەرکدار کریێنۍ، یەکینە خۆسەر و ۋێپارېزنەکۍ جە تورکیا و سەرنیشتوو کوردەسانینە بە پاو قەرارو ئاېیربەسەکەی جماوە. گرڎو هێزەکاما بە پاو ئەمرەو پارتی و فەرماندەییما نزیکایەتیش نیشانە دا و پا جۆرە جماوە.

مانگۊو ئاداری کە مانگۊو ڕەمەزانیچش کۊتەنە و پەی جەهانی ئیسلامی مانگێوە مبارەکەنە. سەرەڕاو پێگەو ئاېێربەسو هێزەکاما و قەرارو پارېزنایما، دۊڵەتو تورکی قڕکەر-کۆڵۆنیالی و حکومەتو ئاکەپەی فاشیستی دلۍ ئا مانگېنە درێژە بە هرووژمەکاش دا سەرو سەرنیشتوو کوردەسانی و هەرێمەکاو پارېزنای مەدیای. سوپاو تورکی ئەرەگیری جە مانگۊو ئادارینە ١١ جارۍ بە چەکی کیمیاویی، ٩ جارۍ بە چەکی قەڎەغەکریا و ٩ جارۍ بە درۆنی بەبۆمبچنیای هرووژمش کەرڎ سەرو مەڕەکا جەنگیما جە هەرێمەکاو پارېزنای مەدیای. جە هەمان کاتەنە مېڎانەکۍ مڎرامانی ١٩٦ جارۍ بە فڕۆکەی جەنگی، ٩٨ جارۍ بە هەلیکۆپتەری جەنگی و ١١٢٨٩ جارۍ بە چەکی قورس، تۆپۍ و هاوەنۍ بۊمبوارانۍ کریۍ.

گەریلاکاو ئازادی کوردەسانی سەرو بنەماو پارېزنای ڕەوای جە دژو هرووژمە ئەرەگیریەکا ١٣ جارۍ دەسوەردایشا کەرڎ و هرووژمەکێشا پوچۍ کەردۍ. جە هەمان کاتەنە فڕۆکێوە بێفڕکەوانو جۆرو ئاکنجیی دۊڵەتو تورکی کە پەی هەرمانەو سیخوڕی و هرووژمی گێڵۍ، جە ١٦و ئادارو ٢٠٢٥ینە جە ئاسمانو قەندیلینە جە بەرزی ٩٦٤٥ مەتراوە جە لایەنو هێزو وەرگری ئاسمانی گەشمەرڎە دەلالیوە وزیارە واری.

کاتێ ئینسان تەماشەو هرووژمەکا سوپاو دۊڵەتو تورکی مکەرۆ کە جە پڕۆسەو ئایېربەسینە دلې مانگێوەنە کەردێنێش، بەڕۆشنی ئانە بەرگنۆ ئا هێزەی کە ئی هرووژما مکەرۆ گەرەکش نیا دمایی بە جەنگی بۍ و حەزش بە بەردەوامیداین بە جەنگی. ئەر پی جۊرە نەبیۍ، جە دژو هێزێوە کە ئینا پێگەو ئاېێربەسینە ئاڼنە هرووژمی ئاسمانی و زەمینی نەکریۍ. ئینەیچ ئانەی بەروزۆ کە ئاژە و جەختکەردەیۆیۍ هەن کە گەرەکش نیا دمایی بە جەنگی بۍ و گەرەکشا جەنگ بەردەوام بۆ.

ۋەرفراوانی ئامارەو جەنگو مانگۊو ئاداری پی جۊرەنە:

هرووژمەکۍ سوپاو تورکی

هرووژم بە فڕۊکەی جەنگی: ١٦٩ جارۍ

هرووژم بە هەلیکۆپتەری جەنگی: ٩٨ جارۍ

هرووژم بە چەکی کیمیاویی: ١١ جارۍ

هرووژم بە درۆنی بەبۆمچنیا: ٩ جارۍ

هرووژم بە تەقەمەنی قەڎەغەکریا: ٩ جارۍ

هرووژم بە چەکی قورس، تۆپۍ و هاوەنۍ: ١١٢٨٩ جارۍ

دەسوەردای و ۋەرپەرچدایۆ گەریلای جە دژو هرووژمەکا

دەسوەردای و ۋەرپەرچدایۆ ڕەواو گەریلای: ١٣ جارۍ."