ئیبراهیم عەلی پوور وێنەگرو کوردی خەڵکو شارو بانەو ۋەرکۊتوو کوردەسانی ئەرەیاۋناش، بە مەڵامەتو وێنەگېرتەی کۆڵبەرا کوردی سەرو ئاستو جەهانی سەوقاتی " وۆڵد پرێس فۆتۆ"یش پنە بەخشیا، ماچۆ، جە ڕاو وێنەکاشۆ گرنگیش بە کار و ژیۋای کۆڵبەرا جە ۋەرکۊتوو کوردەسانینە دان.

ئیبراهیم عەلی پوور وێنەگرو کوردو ۋەرکۊتوو کوردەسانی جە پێگەی ڕسمی ۋێشەنە جە پەلیانەو ئینستاگرامینە جە بارەو بەدەسئاوردەی سەوقاتیێوە جەهانیۆ پەیامێوەش وەڵاکەرڎۆ.

ئیبراهیم عەلی پوور ئەرەیاۋناش: "بە مەڵامەتو وێنەگېرتەی کۆڵبەرا کوردیوە سەرو ئاستو جەهانی جە شارو ئەمستەردامینە جە پایتەختو هۆڵەندای سەوقاتی" وۆڵد پرێس فۆتۆ"یش جە بەشو پرۆژە درێژمەوداكانە پنە بەخشیا. ژمارېوە جە وێنەکام بە نامونیشانو" گولەکۍ سنوورشا نییا" ، کە گرنگی بە کار و ژیۋای کۆڵبەرا جە ۋەرکۊتوو کوردەسانینە مڎۆ نمایش کریان.

یاگۍ ئاماژەیا، ئیبراهیم عەلی پووری تەمەن ٣٥ ساڵ خەڵکو شارو بانەو ۋەرکۊتوو کوردەسانیا و وێنەگرو بەڵگەفیلمین. هەرپاسە سەوقاتی " وۆڵد پرێس فۆتۆ"ی یۆ جە سەوقاتیەکا وێنەگېرتەیا جە جەهانەنە، کە گرنگی بە پرسەکا کۆمەڵایەتی، سیاسیی و مرۆیی مڎۆ.