گەنجان کە بەبۆنەی ڕۆژبوونی ڕێبەر ئاپۆوە لە ئامەدەوە بەرەو ئامارا ڕێپێوان دەکەن، لە جورنە ڕەش بەجۆشێکی مەزن پێشوازییان لێ کرا. گەنجان سەردانی گۆڕستانی کادرە پێشەنگەکانی پەکەکەیان کرد.
ڕێپێوانی ئەنجوومەنی گەنجانی پارتی یەکسانی و دیموکراسیی گەلان (دەم پارتی) لە ئامەدەوە بەرەو گوندی ئامارای ناوچەی خەلفەتی ڕحا بەبۆنەی ٧٦ هەمین ڕۆژبوونی ڕێبەر ئاپۆ لە ڕۆژی دووەمدا بەردەوامە. ڕێپێوانکەرانی ئامارا لە دەروازەی سێورەگی ڕحاوە دەستیان بە ڕێپێوان کرد و گەیشتنە جورنە ڕەش. لەوێ بە گوڵ و هەلهەلە و درووشم و پانکارتی "خۆر لە ئاماراوە هەڵات، لە ئیمراڵی بڵند دەبێت" پێشوازییان لێ کرا.
ڕێپێوانی گەنجان بە درووشمی "بە کۆمەڵگەی دیموکراتیک بەرەو ئازادی ڕێپێوان دەکەین" دەستی پێ کرد، گەیشتە ناوچەی جورنە ڕەشی ڕحا. دانیشتووانی ناوچەکە بە درووشمی "بژی سەرۆک ئاپۆ" و چەپڵە و هەلهەلە پێشوازییان لە گەنجان کرد. هاوسەرۆکانی شارەوانی جورنە ڕەش و پەرلەمانتاری ڕحا دیلان کونت ئایان و هاوڵاتیان بە گوڵ پێشوازیان لە گەنجان کرد. گەنجان لە سەرانسەری شەقامی ئیزۆلو بۆزان بەی ڕێپێوانیان کرد. پانکارتی "خۆر لە ئاماراوە هەڵات، لە ئیمراڵی بڵند دەبێت" هەڵگیرا و گەنجان سروودی شۆڕشگێڕییان گوتەوە.
سەردانی گۆڕستان کرا
گەنجان، لە پاش ڕێپێوانەکە لە گۆڕستانی ئاسری جورنە ڕەش سەردانی گۆڕی کادرانی پێشەنگی پەکەکەیان کرد کە لەنێوان ١٩٧٠-١٩٨٠ شەهیدبوون، لەوانە: جومعە تاک، ساڵح کانداڵ، ئەمین یازار، خەلیل چاڤگون، سوڵتان یاڤوز، هانم کایا، فیدان کایا، بەرفین یەتکین. خوشکی ساڵح کانداڵ، ئاینور کانداڵ و پەرلەمانتاری دەم پارتی بێریتان گونەش بەشداربوون. لە سەردانەکەدا خولەکێک ڕێزگرتن بۆ یادی شەهیدان نیشاندرا.
بەشداربووان گوڵیان لەسەر گۆڕەکان دانا.
گەنجان ئەمڕۆ بەرنامەی خۆیان تەواو کرد، سبەی دەگەنە گەڕەکی ئالیگۆری ناوچەی پیرسوسی ڕحا.
