یوۋەمین کۊنگرەو ئەنجومەنو خانەواڎەو گەشمەرڎا سەرنیشتوو ۋەرکەوتوو سوریای بە دروشمو ' بە رۊحو گەشمەرڎاوە ئێمە جەنگو گەلی شۊڕشگێڵی بەرمۍ وەڵېوە و ئازاڎی رابەر ئاپۊی مسۊگەر کەرمۍ" دەسش پنەکەرڎ.

هەزار ئەنڎامۍ دەزگاکا ۋېڕاوەبەری سەرنیشتوو ۋەرکەوتوو سوریای بە کورڎو عەرەب و سریانیۊ بەشڎاریشا جە کۊنگرەکەنە کەرڎ. حەریۊ جە "نەورۊز ئەحمەڎ ئەنڎامو فەرماندەیی گرڎی هێزەکا سوریای دیموکراتی (هەسەدە)ی، ئاسیا عەبدوڵلا هامسەرۊکەو پارتو یۊبیەی دیموکراتی (پەیەدە)ی و 'روکەن ئەحمەد'ە و خەریب حەسۊ هامسەرۊکا تەڤدەمی بەشڎاریشا کەرڎ.

جە کۊنگرەکەنە ئاسیا عەبدوڵلا هامسەرۊکەو پەیەدەی سەرەتا باسش جە گۊشەگیری سەرو عەبدوڵلا ئۊجالانی رابەرو گەلوو کورڎی کەرڎ و ۋاتش، " گۊشەگیری سەرو گرڎو ئا گەلا ھەن کە بانگەشەو ئازاڎیی و دوژمنایەتی سیاسەتی ئەرەگیری کەرا. ئامانجو گۊشەگیری قڕكەرڎەو گەلوو کورڎیا و تاونایۊ کەلتورەکەیش و گرڎو پێکئاماکا هەرێمەکەین."

ئاسیا عەبدوڵلا؛ مدرامانو گەلوو سەرنیشتو و ۋەرکەوتوو سوریای بە مدرامانی تاریخی وەسف کەرڎ و ۋاتش، " جە سەرەتاو ئاخېزو سەرنیشتو و ۋەرکەوتوو سوریایۊ، جە سایەو فیداکاری گەشمەرڎا و مدرامانو هەڤاڵاماوە ئی ئاخېزە بی بە ئاخېزۍ تاریخی."

ئاسیا عەبدوڵلا، باسو ھجومو دۊڵەتو ئەرەگیری تورکی جە دژوو هەرێمەکەی کەرڎ و پی جۊرە دمایش بە قسەکاش ئارڎ، " دۊڵەتو ئەرەگیری تورکی و چەتەکېش بە ھجومەکاشا گەرەکشانە ئیراڎەو پێکئاماکا سەرنیشتی و وەرکەوتوو سوریای زەعیف کەراو خاکەکەیما ئەرەگیر کەرا."

کۊنگرەکە وەردەواما و دماتەر باسو پەیڕەو دلېینەی کریۊ و هامسەرۊکۍ ئەنجومەنەکەی ھۆرچنیا.

ھ . ش