چن سەعاتېش مەنەن پۍ دەنگدای تایبەتوو هۊرچنیەی ئەنجومەنوو پارێزگاکا، کەرکوکەنە تا ئی وەختە ڕێژەو بەشداریکەرڎەی ٥٠٪ش ۋیەرنان و گومانەو ئانەیچ کریۆ پەی کەمکەرڎەیۆ دەنگوو کوردی ئامێرەکۍ جە چن بنکېوە مەنتیقە کوردنشینەکانە جە هەرمانە وزیۍ با.
دەنگدای تایبەتوو هۊرچنیەو ئەنجومەنوو پارێزگاو کەرکوکی کە سەرسەعبوو ئارۆی دەسشپنەکەرڎەن بەردەواما و بە واچەو سەرچەمېوە تایبەتی تا ئی وەختە رێژەو بەشداری سەڎەبە ٥٠ش ۋیەرنان و چەمەڕاکریۆ چا چن سەعاتەی کە مەنەن رێژەکە زیاتەر بەرزبۊوە.
هەر بە پاو قسۍ ئا سەرچەمەیە ژمارېوە فرە جە دەنگدەراو سەر بە پێکئاماو عەرەبی جە حەویجە، ریاز و عەباسیەنە بەمەڵامەتوو نیگەرانیشا جە لایەنە سیاسیەکاشا بەشدارییشا نەکەرڎەن و بەشێوەیچشا دەنگەکۍ ۋېشا سۊچنېنۍ.
جە لېوەتەرۆ شێرزاد سەمەد وەرپەرسوو بەشوو هۊرچنیەو یۊبیەی نیشتمانیی کوردسانی (یەنەکە) بە ئاژانسەکەیماش ئەرەیاۋنا، "جە مەنتیقە کوردنشینەکاو کەرکوکینە بەشێوە جە ئامێرەکاو دلۍ وێستگەکاو دەنگدای جە هەرمانە کۊتېنۍ و پانەیچ گومانەو ئانەی وەشەبیېنە کە ئینە حۊڵۍ بۆ پۍ کەمکەرڎەیۆ رێژەو دەنگوو کوردی چا پاڕێزگانە".
واتیچش، سەرەڕاو گرڎوو وەبەس و لەمپەرەکا کە بەشێوە جە تورکمانی و عەرەبە شۆڤێنییەکا وەششا کەرڎەن، تا ئی وەختە ژمارېوە وەرچەم جە کوردی بەشداریشا جە دەنگدای تایبەتینە کەرڎەن.
قەرارا ڕۊو ١٨و ئی مانگۍ دەنگدای گرڎیی هۊرچنیەو ئەنجومەنوو پارێزگاکا عێراقی بلۊڕاوە و لایەنە کوردیەکۍ بە چن لیستێوە حۊڵوو بەدەسئارڎەی بەشێوە جە کورسیەکا ئەنجومەنوو پارێزگاکا نەینەوا، کەرکوک، سەڵاحەدینی و دیالەی مڎا.
جە پارێزگاو کەرکوکینە کورد بە چن لیستێوە بەشدارا چا هۊرچنیەینە و وەڵتەر تەڤگەروو ئازاڎیی گلېرگەو کوردسانی داواش جە دەنگدەرا و لایەنگراش کەرڎەبۍ دەنگ بە کاندیدەکاو هامپەیمانی 'کەرکوک هێز و ئیرادەیمانە'ی بڎا، کە جە هامپەیمانی بەینوو یۊبیەی نیشتیمانی و پارتوو شیوعی پێکمۍ.
