لە ٣٥مین ساڵیاڎوو شاڵاوو ئەنفالینە، جە مۊنۊمێنتوو ئەنفالوو قەزاو چەمچەماڵینە، کەسوکاروو قوربانییا داواکارێنۍ، ڕوفاتوو کەسوکاریشا گێڵیۊوە و جاشۍ و مستەشارەکێچ داڎگایی کریا.
هجووموو ئەنفالوو مەنتێقەو گەرمیانی جە ٧ تا ٢٠ نیسانوو ١٩٨٨ی لاو ڕژێمی وەڵینووعێراقیوە کریان، کە یۊ بۍ جە گەورەتەرین و وەرفراوانتەرین هجووم و پەلامارەکاو ئا ڕژێمەیە پەی سەروو کوردسانی، کە مەنتێقەکاو (دوز، قادرکەرەم، کەلار، کفری، چەمچەماڵ، تێلەکۊ، پێباز، سەنگاو، تەکیە، و بەشێک لە ناوچەی ئاغجەلەر)ییش گێرتۊ.
زەرەرۍ گەورەی گیانی و یانەیی بە ئەرەنیشتاو نزیکەو (٥٠٠) پەنج سەد دەگایا ئا یاگا یاونا، کە زیاڎتەر جە ٣٠ هەزار ژەنی و زارۊڵۍ و پیرۍ و گەنجێش بێسەروشۊنۍ کەرڎۍ و یانە و سامانشا بەتاڵان بریا، جە (١٤ نیسانوو ١٩٨٨)ینە، چوار شارۊچکۍ گەرمیانی بە یەک ڕۊ بەتەمامەتی وێرانۍ کریۍ و نزیکەو ویس هەزار ژەنی و زارۊڵۍ و پیۍ ئا مەنتێقا بەزۊر پەی سەروازگەو قۊڕەتوو-ی فاڕیێوە، پەوکای ئی ڕوە گرڎ ساڵێوەنە کریان بە ڕۊو یاڎکەرڎەیۊ تاوانوو ئەنفالی جە کوردساننە.
هیزی جومعە ١٤و نیسانی جە ساڵیاڎوو کارەساتوو بەڎناموو ئەنفالینە، جە مۊنۊمێنتوو ئەنفالوو قەزاو چەمچەماڵینە جە سنووروو پارێزگاو سلێمانینە، کەسوکاروو قوربانییاو ئانفالکریایا، کوۍ بیۍ و بەیاننامێوەشا پەی دەزگاکاو ئەرەیاونای واناوە و کە دلیشنە چند داوێوەشا ئاڕاسەو لایەنە پەیوەندیدارەکا کەرڎەبۍ، کە سەرەکیتەرینشا ئارڎەیۊ ڕوفاتوو ئەنفالکریایەکا و داڎگاییکەرڎەی جاشا و مستەشارەکا بۍ.
یاگۍ باسینە کە ئا جاشۍ و مستەشارۍ دەسشا بۍ جە جینۊساید(کۊکوشی)ی گەلوو کورڎینە جە هجوومی بەڎناموو ئەنفالینە، ئیسە چێروو سەیەو دەسەڵاتی کورڎینە پارێزیێنۍ بەتایبەتی لاو پارتی (پەدەکە)یۊ.
جە کۊبییەیۊکەینە، "ئامینە یەحیا" کناچە قوربانیۍ ئەنفالی، بە نامۍ ئامادەبییاوە بەیاننامێوەش واناوە و واتش: "ئێمە ئارۊ چێگە جە ٣٥مین ساڵیاڎوو هجوومی بەڎناموو ئەنفالینە، یاڎوو قوربانییاو ئەنفالی کەرمێوە، کە هەڵای فرەو ڕوفاتوو قوربانییا نەگێڵانۊ پەی ماواو وێشا و تەنانەت قەبرەبەکۊمەڵەکێچ ورۍ نەدریێنێوە، ئینە جە وەختێوەنە کەسوکاروو قوربانییەکا، چەمەڕوانۍ ڕوفات(پێشەوپەڵان)وو ئازیزاشا کەرا، دماو ٢٠ ساڵا جە وڕیای ڕژێموو دیکتاتۊروو بەعسی تا ئیساتۍ کەسوکاروو قوربانییا ئەنفالی جە سادەتەرین مافەکاشا بێبەشۍ کریێنی.
"ئامینە یەحیا" سەبارەت بە داواکارییەکاو کەسوکاروو قوربانییاو ئەنفالی واتش: "ئێمە چی ساڵیاڎەو مەرگەساتوو ئەنفالینە داواکارییەکاما چی خاڵانە وزمۍ ڕووە:-
یووەم/ گێڵنایۊ ڕوفات(پێشەوپەڵان)وو ئازیزاما پەی ماواو وێشا.
دووەم/ قەرەبووکەرڎەیۊ کەسوکاروو ئەنفالکریایا جە لاو حوکمەتوو عێراقیوە.
یەرەم/ داڎگاییکەرڎەی جاش و مشتەشارەکا.
چوارەم/ مەرزنایرەی کناچا و کوڕاو ئەنفالکریایا، کە بەرشیۍ زانکۊ و پەیمانگەکانۍ.
پەنجەم/ داواکارێنمۍ حوکمەتوو هەرێموو کوردسانی هەرمانە کەرۊ پەی ئشناسای مەرگەساتوو پڕسەو بەڎناموو ئەنفالی و ئشناسایش بە جینۊساید جە وەڵاتا و جە میانگە میاندەوڵەتییەکانە.
ششەم/ پەشتگۊشنەوستەی قەزاو چەمچەماڵی و ناحیەو شۊڕشی جە ڕووەو خزمەتگوزاریوە، کە ئی یاگۍ فرەتەرین قوربانیشا دان جە هجوومی بەڎناموو ئەنفالینە.
حەوتەم/ کەرڎەیۊ تاقیگێوە وشکنای (دی ئێن ئەی) پەی ورگێرتەی نموونە و سامپڵی جە کەسوکاروو قوربانییا پەی ئشناسایۊ قوربانییا.
س.ز
