کتێبخانەو گردی کەلاری جە مېیانو ئیدارەو گەرمیانی، ساڵەو ١٩٨٣ بە کۆششو کەسایەتی مەنتیقەو گەرمیانی شێخ سەعید شاکەلیی ئەرەمەرزیان. ڕاوەبەرایەتی کتێب یانەو گردییەکا گەرمیانی، پێسەو ڕاوەبەرایەتییەکا کتێب یانەکا سنورو گەرمیانی سەرپەرشتی و ئیدارەو ١٠کتێب یانا مەنتیقەکەی مکەرۆ. سەبارەت بە هەرمانە و چالاکی کتێب یانەکا جیهان محەمەد ڕاوەبەرو ڕاوەبەرایەتی کتێبخانە گردینیەکا گەرمیانی جە واچێوەنە پەی ئاژانسوو هەواڵوو فوراتی (ANF)ی باسش جە گرنگی کتێب یانەی کەرد پێسەو مېیانێوە پەی وەڵابییەیۆ هۆشیاری دلێ گلێرکەینە.

سەرەتاو قسەکاشەنە جیهان محەمەد ئاماژەش پانەیەدا کە گردو بوارەکانە سەرچەمێشا هەنێ، کە بییەن بە سەرچەمێ پەی وانەرا مەنتیقەکەی و واتش: "سەرەڕاو وەڵێکۆتەی تەکنەلۆجیای، بەڵام هەڵای کتێب ئا موبارەکی و قیمەتەو وێش پارێزنان پانەی کە گرد وەختێنە متاویۆ پەیش گێڵۆوە. پێسەو ڕاوەبەرایەتی کتێب یانە گردییەکا گەرمیانی هەر یۆ جە کتێب یانەکا، کەلار، کفری، دووزخورماتوو، خانەقین، سەرقەڵا، باوەنوور، ڕزگاری، شێخ تەویل، سەعداوە و مەیدان پێسەو مېیانو کتێب یانەو ئا شارا و یاگێشا جە چوارچێوەو ڕاوەبەرایەتییەکانە ئینا خزمەتو وانەرانە."

'ژمارەو ئەسپارای مڎەیمێ بە نویسەرا ناوچەکەی'

 بەردەوامی قسەکاشەنە جیهان محمەد ئاماژەش پانەیەدا کە پێسەو ڕاوەبەرایەتییەکەیشا جە ئیسەنە ژمارەو ئەسپارای مڎریۆ بە بەرکەردەی کتێبا و واتش: "پێسەو ڕاوەبەرایەتی متاومێ ژمارەو ئەسپارای بڎەیمۍ، هەڵبەتە لاو وێماوە ملمێوە پۆرەو ئا نویسیایارە پەی ئانەی دڵنیۍ بیمۍ ئا نویستەیۍ حیچ کەموکوڵیێوەشا چنە نەبۆ."

' مقارنە بە جەنجاڵی سەردەمەکەی ڕێژەو وانەرا ئەرێنیا'

جە دماینو قسەکاشەنە جیهان محەمەد ئاشکراشکەرد کە جە زوانەکا کوردی، عەرەبی، فارسی و زوانەکا تەری سەرچەمێشا هەنێ ئینەیچ مەڵامەتێوەن پەی فرەی وانەری و کتێبوازا و پی جۆرە دمایش بە قسەکاش ئارد: "بەپاو ئامارەکا ڕاوەبەرایەتییەکەیما مانگانە زیاتەر جە ٦٠٠ کەسا پێسەو کتێبوازی سەردای کتێب یانەکا سەر بە ڕاوەبەرایەتییەکەیما مکەرا. ئی ژمارەیچە مقارنە بە جەنجاڵی سەردەمەکەیما یاگۍ دڵوەشین و مەڵامەتێوەن پەی هۆشیارکەردەیۆ خێزانەکا جە ڕاو ئا کتێبوازاوە."