گلێرگەو ژنانی ئازاڎیی ۋەرکەوتوو کوردسانی (کژار) ئەرەیاۋناش، نەورۆزوو ئێساڵی پۍ پارێزناو دەسکۊتەکا کۊشیای ئازاڎیوازانەو گەلان و داوایچش کەردە، گرڎوو بەشەکاو گلێرگەی بە جۆش و خرۆشۆ بەشداری جە مەراسیمەکا پیرۆزکەردەو نەورۆزینە کەرا.
کژار بۆنەو نەورۆزیوە پەیامێوەش وەڵاکەردەنۆ و چنەشەنە بە ئاماژەدای بە چڕبیەیۆ کۊشیای و بەردەوامبیەی سەرهۊرداو ژەنی، ژیۋای، ئازاڎیی ئانەش وستەن ڕووە، کە نەورۆزوو ئێساڵی هۊرگیروو پەیاموو داوا و کۊشیای گەلان.
گلێرگەو ژەنا ئازاڎیی ۋەرکەوتوو کوردسانی سەرەڕاو پیرۆزبایی نەورۆزی جە رابەروو گەلوو کوردی عەبدوڵا ئۆجالانی، حەرپاسە ژەنا و گرڎوو بەشەکا گلێرگەی، داواش کەردێنە گرڎوو گەلا ئازاڎییوازی جە ۋەرکەوتوو کوردسانی و ئێرانی، بەهەمان گیانوو سەرهۊردای "ژەنی، ژیۋای، ئازاڎیی"وە ئیروو نەورۆزی گەشتەر کەرا و نەورۆزوو ئێساڵی کەرا بە ساڵەو پارێزنای دەسکۊتەکا کۊشیای ئازاڎیی گەلا.
دەقوو پەیامەکەو کەژاری:
نەورۆزوو ئێساڵی پارێزنای دەسکۊتەکا کۊشیای ئازاڎیوازانەو گەلان
جە وەختێنە بەرەوپیری نەورۆزوو ئێساڵی ملمۍ، کە دەنگوو مدرامانی و کۊشیای گەلا ئازاڎییوازی، بە سەرمەشقایەتی ژەنا جە کوردسان، ئێران و ۋەرکەوتوو دلێڕاسەینە کۊتەن ۋەروو گۆشا گەلا جەهانی. زیاتەر جە ساڵ و نیمێوەن کە ئاخێزوو "ژەنۍ، ژیۋای، ئازاڎیی" ئینا ئارانە، ئاخێزێوە کە سەرجەنۆ ئێروو دڵەکاش گەشکەردۆ و گڕش وەردا دامێنوو ستەمی، پۍ ئانەی جە ڕێخۆ سۊچنۊش، ئاخێزێوە کە ژیۋایش جە گرڎ وەختۍ ماناڎارتەرکەرد و تاواش گرڎ کەسۍ چی مانا بەخشاینە هامبەشی پنەکەرۆ. کۊشیای فراوان، سەرهۊردای یۆ دماو یۆی و ناڕەزایەتی ئامانجدار، بەروزوو ئی ماناڎاربیەینە. دروشمەو پڕزایەڵەو " ژەنی، ژیۋای، ئازاڎیی " جە کەشەکاو کوردسانیوە سەرشهۊردا و یاوا کۆڵانە، جاڎە، دەگا و شارەکا کوردسانی. دروشمێوە کە مانا و چەمکەکەش، رزگاری جە ستەمی و هەڕەشا و جە هەمان وەختەنە بنیاڎنیای ژیۋای ئازاڎ و دیموکراتیکا. هەر ئینەیچ بی بە مەڵامەتوو ئانەی کە ئا یەرە وشە وێژێوە ۋێڕاگری و کۊشیای خوڵقنۆ. دیما کە بە درێژایی یەک ساڵی ویەردەی، چالاکییەکۍ و ناڕەزایەتیەکۍ بە شێوێوە جیاجیا بەردەوامۍ بیۍ و جە ڕۊو جەهانی هەشتوو مارس و ئێساڵینە، شێوەو چالاکیەکا بووە و رەنگێوە تایبەتیش پی کۊشیایە بەخشابۍ. جە ۋەرکەوتوو کوردسانی و ئێرانینە، ژەنی سەرەڕاو گرڎ فرت و فێڵۍ و ڕاو جاکا رژێمی پۍ سەرکوتکەردەی، یاڎوو گەشمەرڎا ئاخێزوو ساڵەی ویەردێشا بەرزڕاگێرت. ئەڎایا گەشمەرڎا سەرمەشقۍ ئی چالاکیا بێنۍ. متاویۆ واچیۆ بایکۆتوو هۊرچنیەو ئەنجومەنوو شوراو ئیسلامی و بەرزڕاگرتەی ڕۊو جەهانی ژەنا، مژدەو وەهارێوە سەوز و ساڵەی ئایندۍ بۍ. جە درێژەو ئی پارێزنای و داکۆکیەینە، گەلوو کوردی جە بەشە جیاجیاکا کوردسانینە بە جۆش و خرۆش و گەرموگوڕی تایبەتۆ ئینا پێشوازی نەورۆزینە. گەلوو کوردی جە گلێرۊبیە جیاجیاکانە، پا گیری سەروو ئازاڎیی جەسڎەیی رابەر ئاپۆی کەرۆ و ئانەی وزۆ ڕووە کە ئێروو نەورۆزوو ئێساڵی ، یۊبیەی و چالاکی هامبەشوو گەلا ئازاڎیوازی بە تینتەر کەرۆ. جە ۋەرکەوتوو کوردسانی و ئێرانیچەنە ماوەو چن ڕووێوەن کە جەژنەو نەورۆزی، بە دروشمەو " ژەنی، ژیۋای، ئازاڎیی " دەسش پنەکەردەن و ئەڎایا گەشمەرڎا، سەرچۆپی کێشێنۍ و ویست و ئاواتوو رۆڵەکاشا باس کەر. ئاڎۍ ئی جارە دەسوو رۆڵەکا تەروو نیشتمانی گێرا و شان بە شان و یۊترینی بەشێوێوە بەقوەتتەر جە گرڎ وەختۍ پایێ کوا و داوا چەویشای تەریچ کەرا بەشدارۍ با چی بازنە جوانەو هۊرپڕاینە. جە بنەڕەتەنە متاویۆ وچیۆ، نەورۆزوو ئێساڵی هۊرگیروو پەیاموو داوا و کۊشیای گەلا ئازاڎییوازین. گەلێوە کە پەیوەسا و پابەنڎا بە نیشتمان و کولتورەکەیشۆ و لاپەڕە ئاڵتونیەکا مدرامانی تۆمار کەرۆ.
چی روانگۆ، کژار سەرەڕاو پیرۆزبایی نەورۆزی جە رابەروو گەلوو کوردی عەبدوڵا ئۆجالانی، حەرپاسە ژەنا و گرڎوو بەشەکا گلێرگەی، گرڎوو گەلا ئازاڎییوازی جە ۋەرکەوتوو کوردسانی و ئێرانی، بەهەمان گیانوو سەرهۊردای "ژەنی، ژیۋای، ئازاڎیی"وە ئیروو نەورۆزی گەشتەر کەرا و نەورۆزوو ئێساڵی کەرا بە ساڵەو پارێزنای دەسکۊتەکا کۊشیای ئازاڎیی گەلا، جە کۆڵانەکانە تا جاڎە و دەگا و شارەکا، ئا ئێرەیە گیسنانە و کولتور و ماناو نەورۆزی بە جەهانی نیشانە بڎا.
گلێرگەو ژەنا ئازاڎیی ۋەرکەوتوو کوردسانی – کژار".
