دەسەی ۋېڕاوەبەری کەژەکەی ناڕەزایش وەران ۋەرو حۊلو تەلبەنکەرڎەو کامپو مەخموری بەربڕی و ئەرەیاۋناش: "مشۊ گەلوو کورڎسانی و جەمەو ژەنا پارێزگاری جە مدارامانو خەڵکو مەخموری کەرا و جە گرڎ مەنتیقېوەنە پەشتیوانیشا ۋنە کەرا و بازنەو مدرامانی گۊرەتەر کەرا."
دەسەی ۋېڕاوەبەری کەژەکەی سەبارەڎ بە ھجومو هێزەکا عێراقی پۍ سەرو کامپو مەخموری یاۋنەریېش ۋەڵاکەرڎۊ.
کەژەکە ئەرەیاۋناش: "مەردمو مەخموری جە ساڵەکا نەۋەڎیۊ جە لایەنو دۊڵەتو تورکیۊ زوڵمی فرەشا جە دژ ئەنجامدریان و جە ئاکامەنە کۊچشا پۍ پانیشتوو کورڎسانی کەرڎەن، دماو فاڕاو چنڎین یاگا جە دماینە مەخمورنە ئەرەنیشتۍ بیۍ و چا ژیایۍ تازەشا بنیاڎ نیا. جە دژوو گرڎو ھجومەکا فاشیزمی و ئەرەگیری بەدەر جە مرۊڤایەتی، سۊچنا و کاولکەرڎەو دەگایەکاشا و یانەکاشا و ژیایشا مرڎېوە و ۋېشا نەڎا دەسۊ و تا دما نەفەس وەرگیریشا کەرڎ و شکۊمەنڎیی مرۊڤایەتی و کورڎبیەیشا یاۋنا بەرزتەرین ئاست. نوێنەرۍ غیرەتیۍ و ئازۍ مەردمو بۊتانی، بیابانو مەخموریشا سەرجە نۊ سەوز کەرڎۊ، تا دمایی پارېزگاریشا جە ھەیمەنە و ئشناسنامەو ۋېشا کەرڎەن و تا ڕۊزگارو ئارۊیچ درێژەشا پنە دان. ژەنی، ئەڎۍ و جوۋانۍ مەخموری هەمیشە جە ریزو ۋەڵېوە خەباتینە بەشڎارۍ بیېنۍ و کۊشیایشا بە قوەت کەرڎەن و سەرمەشقبیەیشا پۍ کەرڎەن".
جە بەیاننامەکەو کەژەکەینە ئامان:
"گەلو کامپو مەخموری ئازایانە جە دژوو گرڎو ھجومەکا داعش، دۊڵەتو تورکی و پارتی (پەدەکە) مرڎېوە و ئا ھجومېشا ماڕۍ و پووچېشا کەرڎۍ. دماو ماڕا و پووچکەرڎەیۊ ھجومەکا داعشی، بەتایبەتی دۊڵەتو تورکی و پارتی (پەدەکە) پېۋەرە فشارشا وست سەرو کامپەکەی و جە گەمارۊڎای ئابوورییۊ حەتا گەمارۊڎای تەندروسیشا جە دژوو کامپەکەی ڕاوەبەرکەرڎ و بە فڕۊکەی بێفڕۊکەوان سەرمەشقەکۍ گەلیشا تیرۊر کەرڎۍ و حەتا ئی قۆناغەو ئیسەیچ بە وەردەوامی درێژەشا بە ھجومەکاشا دان. وەختۍ پا گرڎ فشار و ھجوما ئەنجامشا وەدەس نارڎ، ئیجارە بە دۊڵەتو عێراقی جوڵېوە تازەو ھجومکەرڎەی سەرو کامپەکەیشا وستەن ھەرمانە.
کامپو مەخموری کامپێوەن پۍ ژیای ئازاڎی و کامپو مدرامانین. ئیسە دۊڵەتو عێراقی بە هەماهەنگی چنی پارتی (پەدەکە)، چەمکێوە تازەشا پۍ فشار وستەی سەرو ئی ژیانە ئازاڎەیە دەسپنەکەرڎەن و گەرەکشانە دۊرووبەرو کامپەکەی تەلبەن کەرا و بورجی سەروازی دروسکەرا و پانەیچ گەرەکشانە کامپەکەی وزانە چېرو فشاری سەروازیۊ. کامپو مەخموری، کە بە رەنجو گەلەکەیما و ئەڎایاما و جوۋانەکاما فاڕیان پۍ مېڎانۍ ژیای ئازاڎیی، گەرەکشانە چا ڕېوە کامپەکەی کەرانە یاگۍ دیلکەرڎەی. بە دڵنیایوە گەلەکەما ئینەش قەبوڵ نەکەرڎەن و قەبوڵیچش مەکەرۊ.
ئێمە سڵام جە مدرامانو گەلەکەیما جە مەخمور، ئەڎایا و جوۋانەکاما مکەرمۍ، کە دژوو ئا سەپنا زۆرداریە مرڎېنېوە. جە ماوەو دوۋۍ ڕوۋا ۋیەرڎەینە گەلەکەما ئیسپاتش کەرڎ، کە سەپنای و زۊرداری قەبوڵ مەکەرا. دۊڵەتو عێراقی مەتاۋۊ ئینەی سەرو ئیراڎە و ویست و گەلینە سەپنۊ، کە کۆکوشیی گۊرە، زوڵم و ستەم و دووروستەیۊش ۋیەرنا بۊ. حەجگیز قەبوڵ مەکریۊ، کە ئا یاگۍ، کە گەلش چنە مژیۋۊ بۊ بە کامپو دیلی. مەردمو مەخموری حەتا ئیسە زەرەرشا بە حیچ کەسۍ نەیاۋنان، بە پێچەوانۊ جە دژو ئا هێزانە کۊششا کەرڎەن، کە دوژمنو گەلی و – خاکو عێراقی و دوژمنۍ گەلوو کورڎی بیېنۍ، ئا خاکەی، کە سەرشۊ مژیۋا بە فیداکاری پارېزنانشا و قوربانیشا پەی دان. پێۋیسا دۊڵەتو عێراقی سەرجەنۊ لوایۊپۊرە بە سیاسەت و پلانەکا ۋېشەرە کەرۊ، بێگومان گرنگا نزیکایەتیۍ گېرۊنە وەر، کە دیموکراتیک بۊ، ئیراڎە و داواو گەلی قەبوڵ کەرۊ.
پێۋیسا گەلوو کورڎسانی و ژەنا پارێزگاری چی مدرامانەو مەخموری کەرا و جە گرڎو مەنتیقەکانە پەشتیوانیش ۋنە کەرا و بازنەو مدرامانی زیاتەر و بەقوەتتەر کەرا."
ھ . ش
