ئازاڎیی گەلو ئێمە نمێنە دی حەتا ئازاڎیی گەلو کورڎی تەمامو جەھانینە بەدەس نۍ.

نەۋەو سەرکرڎەو ئازاڎییەکاو ئەفریقای پانېشتی "لېا ماندێلا"، یاۋا شارو ھەڵەبجەی و ۋاتش:

ئازاڎیی گەلو ئێمە نمێنە دی حەتا ئازاڎیی گەلو کورڎی تەمامو جەھانینە ۋەدەس نۍ.

ئارۊ نەۋەو نېڵسۊن ماندێلای یاۋا شارو ھەڵەبجەی جە مۊنۊمێنتو گەشمەرڎا شارەکەینە، جە تەرەفو قائېمقامەو ھەڵەبجەی و ۋەرپەرسا ڕاۋەبەری شارەکەیۊ خێرئامایش ۋنە کریا، دماتەر کۊنگرێۋە ڕۊنامە ۋانېش ئەنجامدا.

"نوخشە ناسېح"ە قائېمقامەو ناۋەنڎو ھەڵەبجەی جە سەرەتاو کۊنگرە ڕۊنامە ۋانیەکەینە ۋاتش:" خێرئامای یۊ جە ئەنڎاما خێزان و ماندێلای کەرمۍ پۍ شارەکەیما، ماندێلا ڕەمزۍ بیەن جە ئازایەتی، سەربەخۊیی نەتەۋەکەیش، مافەکا مرۊڤی، ئێمەیچ فەخرش پۊۋە مکەرمۍ، ئارۊ نەۋێوە ئا سەرکرڎەیە ئامان شارەکەما پۍ ئانەی جە نزیکۊ جە کێشەو گرفتو خانەواڎەو گەشمەرڎا بیاۋۊنە.

"دکتۊر سیا بۊلېلا ماندێلا" نەۋەو سەرکرڎەو ئازاڎییەکا "ماندێلا" جە ئەفریقای پانېشتەنە جە کۊنگرە ڕۊنامە ۋانیەکەنە ۋاتش:" ئا مەرگەساتەی جە ۋیەرڎەنە سەرو ھەڵەبجەیرە ئامان، ۋەڵېنگێۋە ھامبەشما ھەن پێۋەرە، مەردمو ئەفریقای پانېشتی ھەمان کارەساتەشا سەرەرە ئامان کە گەلو کورڎیچ سەرشەرە ئامان".

"سیا ماندێلا" ۋاتش؛ پۍ ۋەشکەرڎەو ئی پرڎەو پەیۋەنڎیا، زەرورا دڵنیۍ بیمۍ کە جە دماتەرەنە کارەساتی پا شکڵە ڕوۋە نەرۊۋە، ئێمەیچ پێسە مەردمو کورڎسانی چنی ڕژێمو صەدامی نېازش بۍ گەلو کورڎی دلێنە بەرۊ، بە ھەمان جۊر پۊس چەرمەکێچ کە کەمېنێۋە بێنۍ نېازشا بۍ پۊس سیاۋەکا جە ئەفریقای پانېشتەنە دلێنە بەرانۍ.

جە دما دمایی قسەکاشنە ۋاتش:" ماندێلا ساڵەو ١٩٩٢ۍ ئازاڎ بی ، یۊ جە قسەکاش ئانۍ بۍ کە ئازاڎیی گەلو ئەفریقای پانېشتی تەمام مەبۊنە حەتا ئازاڎیی گەلو کورڎی و نەتەوەکاتەری تەمامو جەھانېنە ۋەدەس نۍ".

ھ.ش