بۊنەو ٨و ئاداری ڕۊو جەهانی ژەنا ڕەنجدەریوە، گەریلاکۍ یەژا ستاری و هەپەگەی پۍ ئاژانسوو هەواڵوو فوراتی (ANF)ی قسێشا کەردۍ.

گەریلۍ یەژا ستاری ڕۆژدە زاگرۆسە ئەرەیاۋناش؛ پێسە گەریلاکاو یەژا ستاری بە ئیراڎە و مۆراڵێوە بەرزۆ جە کەشە ئازاڎەکا کوردسانینە ٨وو ئاداریشا پیرۆزکەرد و واتش: "٨و ئاداری ڕووێوە بە مانا و پەڕ بایەخا پۍ ئێمە، حەرپێسە ڕابەر ئاپۆ ماچۆ 'نەک تەنیا ٨و ئاداری، بەڵکم گرڎ ڕووۍ ڕۊو ژەنان'. ڕابەر ئاپۆ خەبات و حۊڵی فرەش پۍ کێشتیمۍ، ڕاو بڕوا و ئیراڎەیش نیشانە دایمۍ. جە ئیسەنە جە کەشە ئازاڎەکا کوردسانینە بە ئیراڎەی بەرزوو ۋێماوە مدرامان کەرمۍ."

'گرڎ جە سایەو ڕابەر ئاپۆیۆن'

ڕۆژدا زاگرۆسە ماچۆ پیرۆزکەردەی ٨و ئاداری جە کەشە ئازاڎەکا کوردسانینە هۊرگیروو مەعنێوە تایبەتیا، باوەڕداری جەسارەت جە ئینسانەنە خوڵقنۊ و واتش: "ئینۍ گرڎ جە سایەو ڕابەر ئاپۆیۆ بەرهەم ئامێنۍ. خاوەنداریکەردەی جە فکروو ڕابەر ئاپۆی، هەستوو ژیۋای جە ئینسانەنە وەڵۍ وزۆ. عەشقێوە گۊرەما چنە وەش کەرۆ. پۊکەی پیرۆزبای ٨و ئاداری بەتایبەت کەرمۍ بە دیاری پۍ ڕابەر ئاپۆی و هەڤاڵە گەشمەرڎەکاما."

'ئا دەسکۊتۍ بە دەسئامێنۍ، پۍ دوژمنیشا جیانمازمۍ'

گەریلۍ یەژا ستاری پەلین ئەحمەڎە واتش: "پێسە گەریلایا ژەنۍ، یاوایما بە ئارۊی جە سایەو ڕابەر ئاپۆیۆن. ڕابەر ئاپۆ هەرمانۍ ئێژاش پۍ کەردێنمۍ. پێسە هێزەکاو ئازاڎیی ژەنا کوردسانی بیمۍ بە شایسەو خەباتوو ڕابەر ئاپۆی. ئی قۆناغیچە هەر ئاناما چنە داوا کەرۆ. دوژمن بە گرڎوو دژواری ۋێشۆ جە دژوو ڕابەر ئاپۆی سیاسەتوو جەنگی تایبەتی ڕاوەبەر کەرۆ. هەرچی بۆ با بۆ، ئا بەهایۍ کە ڕابەر ئاپۆی پۍ خوڵقنێنمۍ، پۍ دوژمنیشا جیانمازمۍ. پێسە هەڤاڵاش هەڤاڵ سارا و هەڤاڵ زیلانۍ کۊشیای ژەناما جە کەشەکانە یاونا بە ئاستێوە بەرز. بە هەزاران هامڕۍ ژەنیما بە فیداییوە جەنگ کەرا و جە مێڎانەکا مدرامانینە. پێسە هامڕایا ئاڎیشا گرڎ هەرمانێوە کەرمۍ."

'کەش پۍ ئێمەی ژەنا بەرەو ئازاڎییا'

گەریلۍ جانفەدا تۆلهەلدانە باسش چانەی کەرد پێسە هێزەکاو گەریلای هەست بە ئەرکوو ۋێما کەرمۍ، باوەڕما پاسەن کە گرڎیی جابەجێ کەرمۍ و واتش: "ڕابەر ئاپۆ جە گلێرگەنە ژەنیش کەردە بە سەرمەشقە، کە وەڵتەر نەشناسیۍ. ژەنا دڵسۆزۍ ڕابەر ئاپۆی جە کەشەکانە مدرامان کەرا. بیمۍ بە شۊنکۊتۍ هەڤاڵ دۆغای و هامڕایا ژەنۍ، کە جە مەڕەکانە مدرامانی فیدایی ئازاڎیشا ئەنجامدا. مەبۆ ژەنی کۆیلایەتی قبوڵکەرۆ، ڕووەکەردۍ کەش. کەش پۍ ژەنا بەرەو ئازاڎیین."

'پێگەو ئازاڎیی ژەنۍ نمونەییا'

گەریلاو هەپەگەی دڵسۆز ئاڤزەم ئاماژەش پانەی دا؛ ئا کۆیلایەتییەی کە سیستموو سەرمایەداری سەروو ژەنێشەرە سەپنۆ قبوڵش مەکەرا و جە دژش کۊشیانە و واتش: "جە کەسایەتی هەڤاڵ بێریتانۍ، سارۍ و زیلانێنە پێگەو ئازاڎیی ژەنۍ موینمۍ. گەر نمونێوە هۊرگیریۆ، ئانە ئاڎێنۍ. ئینێچ گرڎ جە سایەو خەباتوو ڕابەر ئاپۆیۆنۍ. جە ئیسەنە هامڕایا ژەناما جە مەڕەکا جەنگینە ڕابەرایەتی مدرامانی کەرا، پیمەروو ئازاڎینۍ پۍ ئێمە. جە کەسایەتی ئاڤزەم، باگەر، مزگین، ڕۆژدا، کارکەر، بەرچەمی و ڕۆستەمینە ۋێشا نیشانەدان. پێسە هامڕایا ئاڎیشا، وەعد مڎەیمۍ هەتا دمایی سەروو ڕاو ئازاڎیی هەنگامە بنیەیمۍ."