وێرەگاو ڕۊو شەممەی سەروو داواو گلېرگەو ژەناو ئازاڎیی ۋەرکەوتوو کوردسانی (کژار) دەیان کەسۍ ۋەروودەم و باڵیۆزخانەو دەوڵەتوو ئێرانینە جە لەندەن گلېرۍ بیۍ و دژوو بڕفانای و بێسەروشۊنکەرڎەی وریشە مورادیۍ (جوانا سنە)یۍ ئەندامەو کژاری و حەرپاسە پەی ئازاڎکەرڎەی تەماموو زینڎانیا سیاسی دروشمېشا واتېوە.

جە گلېرۆبیەکەینە کە سەعات ١٥:٠٠ دەسشپنەکەرڎ جگە جە کوردی ژمارېوە جە چالاکا بەلوچی و پێکئامایەکا تەروو ئێرانی و حەرپاسە کەسایەتیۍ سیاسیۍ ئینتەرناسیۆناڵی بەشداربێنۍ.

چالاکەکۍ داواو ئاشکراکەرڎەو چارەنویسوو وریشە مورادیۍ و حەرپاسە ئازاڎکەرڎەو زەینەب جەلالیانۍ و تەماموو زینڎانیا سیاسیشا کەرڎ.

دماو دووۍ سەعاتا بە دروشمەکاو "ژەنی، ژیای، ئازاڎیی"، "بژیۋۆ مدرامانوو زینڎانیا"، "ئێمە گرڎما وریشەنەنمۍ"، وڕۆ جمهوری ئیسلامی ئێرانی"، "ئازاڎیی پۍ گرڎوو گەلاو ئێرانی"، "بژیۋۆ رابەر ئاپۆ" چالاکیەکە دمایش ئاما.