رژێموو بەعسی عێراقی ١٦و ئاداروو ١٩٨٨ ینە سەعات ١١:٠٥ دەیەقۍ جە هەڵەبجەنە چەکی کیمیاۋییش بەکارئارد. جە هجوومەکەنە ٥ هەزار کەسۍ گەشمەرڎۍ بیۍ و نزیکەو ١٠ هەزار کەسایچ زامڎارۍ بیۍ.جە ئاکاموو هجوومەکەینە و بە مەڵامەتوو کاریگەری گازی کیمیاۋیوە بە پاو هۊرسەنگنایەکا تا ئیسە نزیکەو ٤٠ هەزار کەسا بە مەڵامەتوو ئا هجوومەیۆ گیانشا جە دەسدان. پا بۆنۆ جە شاروو لوزێرنی سویسراینە مەراسیمێوە یاڎکەردەیۆ لوواڕاوە.

مەراسیمەکە جە ناوەنڎوو دیموکراتیکی کوردی (جەدەکە-لە)ینە سازکریا. مەراسیمەکە بە دەیەقێوە بێدەنگی پۍ رێزگرتەی جە یاڎوو گەشمەرڎا دەسشپنە کەردوو  دماتەر بە نامۍ کۆمیتەو کولتوریی ناوەندەکەیۆ حەکیم ئەکینجی قسێش کەردۍ و گەشمەرڎۍ کۊکوشی هەڵەبجەیش ویر ئاوردۍ. ئەکینجی ئانەش وست ڕووە کە سەڎان ساڵێن ستەم جە گەلوو کوردی کریۆ و واتش، "ئا ستەمە وردە وردە سیستموو ۋێش فاڕا، بەڵام کۊشیای جە دژوو ستەمی جە سایەو رابەر ئاپۆی و پەکەکەیۆ وەڵۍ کۊت. کوردەکۍ هەجگیز سەرەشا ۋەرا ۋەر بە ستەمی نەنامنانەرە، گرڎ وەختێنە ۋێڕاگریشا کەردەن. پێسە گەلوو کوردی مشۊم ئێمە بە بێ ئانەی یاڎکەردەیۆ گەشمەرڎا فەرامۆش کەرمۍ، درێژە بە کۊشیای بڎەیمۍ. ئێمە فەلسەفەو رابەر ئاپۆی پەیڕەو کەرمۍ، کە ئارۆ ئینا گۆشەگیرینە و ئێمە سەرۍ گنمۍ".

سیاسەڎمەدار موسا فارسئۆغیولاریچ قسێش کەردۍ و گەشمەرڎۍ کۊکوشی هەڵەبجەیش ویرئاوردۍ.

جە مەراسیمەکەنە مامۆسا گەرناس شعرێوەش سەروو هەڵەبجەیرە ۋەناوە. مەراسیمەکە بە دروشمەو "گەشمەرڎۍ مەمرا" دمایش ئاما.