رۆنامەوان و هەواڵسازوو بەشوو عەرەبی رۆژنیوزی سلێمان ئەحمەڎ جە ١و تشرینوو یووەم و ٢٠٢٣ پەی ۋینای بنەیانەکەیش جە گەڕەکەو شێخ مەقسودوو حەڵەبی سەردای ئا شارەیشە کەرد. سلێمان جە ٢٥و تشرینی یووەمینە گەرەکش بۍ جە ڕاو دەروازەو سنووری پیش خابوری (سێمالکا)یۆ گێڵۆوە پەی هەرێموو پانیشتوو کوردستانی. بەڵام هێزەکاو پەدەکەی بڕفاناشا و ماوەو ٢٠٠ ڕووان هیچ هەواڵێوە جە بارەشۆ ۋەردەس نییا.

سلێمان ئەحمەڎ جە مەنتیقەو جندرێس و عەفرینی جە ئەڎۍ بیەن و چا گەورەبیەن. سلێمان ئەحمەڎ کە ساڵەو ١٩٩٢ جە ئەڎۍ بیەن، دلۍ ٩ واڵە و برایانە گولانەتەرینشانە. سلێمان بەشوو کشتوکاڵی زانشتگەو ئەلبەعسی حومسیش تەمام کەردەن، چنی دسپنەکەردەو پشێویەکا سوریای گێڵاوە پەی عەفرین و ماواو ۋێش. رۆنامەوان سلێمان ئەحمەڎ کە جە ساڵەو ٢٠١٢یۆ ئینا دلۍ خەباتوو ئەرەیاۋنای ئازاڎینە، هامشێوەو دلۍ بنەیانەکەیش دلۍ ئەرەیاۋنای ئازاڎیچەنە بە رەنجدەری و جە ۋۍ وییەردەی ۋێشۆ ئشناسیۍ. سلێمان ئەحمەڎ جە نزیکۆ شایەتوو مدرامانوو گەلی دژ بە هجوموو ئەرەگیری دەوڵەتوو تورکی بۍ کە جە ٢٠ کانوونوو دووەموو ٢٠١٨ دژوو خاکەکەیش دەسشپنەکەرد. جە لېوە خاوەن قەرار بۍ کە دژوو هجوومە ئەرەگیریەکا دەوڵەتوو تورکی ۋێڕاگری بکەرۆ و ئا مدرامانەیە سات بە سات پەی جەهانی فاڕۆوە. سلێمان جە مېڎانوو مدرامانینە پەی ساتێوەیچ جە فاڕایۆ دیمەنەکا نەمردا. گرڎ وەختۍ شۊنەو حەقەتینەکاوە بۍ و بی بە دەنگوو گەلوو عەفرینی. سلێمان ئەحمەڎ کە بە بێ تەرس شۊنیرە لووای پەی کۆمکوشیەکا دەوڵەتوو تورکی ئەرەگیری کەرۍ، دڕندایەتی ئا ئەرەگیراشە ئاشکرا کەرد. جە لێوە هجوومەکا دەوڵەتوو تورکی و جە لېوەتەرۆ راسی گەلا کۊششکاری پەی ئەرەیاۋنای فاڕێوە. هاواروو گەلەکەیش یاۋنۍ بە جەهانی و ئێشوو گەلەکەیش تا سەروو ئێسقانی هەست پنەکەرۍ.

ئا خاکەی چنەشەنە جە ئەڎۍ بی و گەورەبی، ئەرەگیر کریۍ؛ سەرەڕاو ئانەی گەل و بنەیانەکەش رووبەڕوو کۆمکوشی بیێبێنێوە، بێ دوودڵی دژوو دەوڵەتوو تورکی ۋێڕاگریش کەرد. شایەتوو مدرامانوو ٥٨ ڕووەو عەفرینی بۍ و تا دما سات پېسە رۆنامەوانێوە دەسبەرداروو گەلەکەیش نەبی. ئاڎ ئیساتۍ ۋێڕاگرێوە قارەمانا کە دژوو هجوومە ئەرەگیریەکا دەووڵەتوو تورکی ۋێڕاگری مکەرۆ و پەیامنێروو جەنگیا و گەرمتەرین ساتەکاو جەنگی فاڕۆوە. کوردێوە عەفرینیا کە ئا خاکەی چنەشەنە جە ئەڎۍ بیەن و چا گەورەبیەن تاڵان مکریۆ، کۆچبەرێوە بۍ کە بە زۆرەملێ جە شۊنەو ۋێشەنە بەرکریابۍ و رۆنامەوانێوەن کە مدرامانوو گەلوو کوردیش بە جەهانی یاونان. سلێمان ئەحمەڎ کە شۊنەو حەقەتینیوە بۍ، دماو ٥٨ ڕووا ناچار بی کە چنی خەڵکوو عەفرینی کۆچبەر بۆ. رۆنامەوان سلێمان ئەحمەڎ کە یانە، دار زەیتون و زەمینەکێشا ئەرەگیرگریۍ، سات بە سات ستەم، تاڵانی و کاولکاری عفرینیش رووماڵ کەرد.

سلێمان ئەحمەڎ ٥ ساڵۍ هەواڵسازوو بەشوو عەرەبی رۆژنیوزی بۍ، جە ١و تشرینی یووەم و ٢٠٢٣ ێنە بەسەردای لووابێوە پەی لاو بنەیانەکەیش جە حەڵەب. جە ٢٥ و تشرینوو یووەم و ٢٠٢٣ وەختۍ جە ۋەرنیشتۆ گێڵێوە پەی پانیشتوو کوردسانی جە دەروازە سنووری پیشخابورینە جە تەرەفوو هێزەکاو پەدەکەیۆ بڕفانیا.

پەدەکە دڎانش بە ئەڕفاکەیشەرە نیا

دماو ۋییەردەی شش ڕووا سەروو بۍ سەروو شۊنبیەی سلێمان ئەحمەڎیرە، ئاسایشوو پەدەکەی جە دهۆک ئەرەیاۋنێوە پەڕ جە بانگەشە و تۆمەتی بێ بنەما و دوور جە راسیش وەڵاکەردۆ و بانگەشەو ئانەیش کەرد کە سلێمان ئەحمەڎ پەیوەندیش بە هەرمانەو رۆنامەوانیوە نییا. جە ئەرەیاۋناکەینە دڎانش پانەیرە نیا کە سلێمان ئەحمەڎشا بڕفانان و هەڕەشۍ سزادایش کەردە.

هەرمانە بە یاسای نمەکەرا

دماو ئانەی زانیاری ئانەی بەدەسئامابۍ کە سلێمان ئەحمەڎ فاڕیانۆ پەی دهۆکی، پارێزنەراش سەردای ڕاوەبەرایەتی ئاسایشوو گرڎیی دهۆکیشا کەرد. سەرەڕاو ئانەی، کە بە شێوەی نا ڕسمی قبوڵکریابۍ کە سلێمان ئەحمەڎ ئینا دەسوو ئاڎیشانە، ڕا بە پارێزنەرا نەدریا چەمشا پنەش گنۆ. سەروو ئانەیچ دادگاو دهۆکی قەرارشدا کە مشۊم پاڕێزنەرا چەمشا بە سلێمان ئەحمەڎی گنۆ. ئی قەراریچە بە ڕسمی سەلەمناش کە سلێمان ئەحمەڎ ئینا زینڎانەنە. پاڕێزنەرا پا قەرارەو دادگایۆ کە هۊرشا گێرتەبۍ سەردای ڕاوەبەرایەتی ئاسایشوو گرڎیی دهۆکیشا کەرد، بەڵام ڕاشا پنە نەڎریا چەمشا بە سلێمان ئەحمەڎی گنۆ. پارێزنەرا زانیاریشا بە دەسئارد کە سلێمان ئەحمەڎ ئینا یۆ جە زینڎانە نا ڕسمیە هەواڵگریەکا پەدەکە (پارێزنای)نە زینڎانی کریان.

پارێزنەرا دمایین جار جە ٢٩و نیسانینە بە مەبەسوو دیڎاری چنی موەکیلەکەیشا لووۍ زینڎانوو ئاسایشوو گرڎیی دهۆکی، بەڵام ڕاشا ۋنەگیریا. تیموو پارێزنەرا تا ئیساتۍ ١٠ کەرەتۍ سەردایشا بە مەبەسوو ئەنجامدای دیڎاری ئەنجامدان، بەڵام هیج جوابێشا نەڎریانۆ پنە.

داواکریا دەموودەس ئازاڎ بکریۆ

ئیدارەو ۋێڕاوەبەری جە ٢٩و کانونوو دووەمینە ئەرەیاۋنێوەش وەڵاکەردۆ و چنەشەنە ئەرەیاۋناش کە مشۊم دەموودەس سلێمان ئەحمەڎ ئازاڎ بکریۆ و جە ئەرەیاۋناکەینە ئامابۍ؛ "سلێمان ئەحمەڎ هاموڵاتی ئێمەن، بە بێ مەڵامەت زینڎانی کریان. ئێمە ئەرەیاۋنمێش کە شێوازی پی جۆرە پێچەوانە و دژوو گرڎ بەها ئەخلاقی و یاساییەکان و بە تنی ئا کردەوا شەرمەزار مکەرمۍ. مامەڵەی خراپ و پەدەکەی ئاژەکەی دژوارتەر مکەرۆ. داوا جە حکومەتەکەو پەدەکەی مکەرمۍ کە جە بارەو ئاژەو سلێمان ئەحمەڎیوە بنەیانەکەیش ئاگاڎار بکەراوە و دەموودەس ئازاڎش بکەرۆ. داوا جە گرڎوو دەزگاکا ئەرەیاۋنای و ناوەندە یاساییەکا مکەرمۍ کە ئەرکوو ۋێشا جا بەجۍ بکەرا و چارەنوویسوو ئا رۆنامەنوویسەو سەرنیشت و ۋەرکەوتوو سوریای ئاشکرا بکەرا، کە بە بێ مەڵامەت زینڎانی کریان".

ۋەرپرسیاریی ژیۋای و سڵامەتی ئا رۆنامەنوویسەیە ئینا ئەستۆو پەدەکەینە

ئاژانسوو رۆژنیوزیچ جە ئەرەیاۋنێوەنە باسش چانەی کەرد، "ئێمە بانگەشە بێ بنەماکاو ئاسایشوو پەدەکەی جە دهۆکەنە ڕەڎ مکەرمێوە، کە حۊڵ مڎۆ رەوایەتی بە بڕفانای سلێمان ئەحمەڎیی بڎۊ و ئێمە ئا تۆمەتا ڕەڎۍ مکەرمێوە. مزانمۍ کە پەدەکە چنی جە ئەرەیاۋنای ئازاڎیی و رۆنامەوانا ئازاڎیی متەرسۆ. پەدەکە گەرەکشا چی ئاژەنە پېسە دۆسیەو زینڎانیا بادینانی راو گرڎیی هۊرخەڵەتنۆ و سزای قورسوو زینڎانی سەروو رۆنامەوان سلێمان ئەحمەڎیرە سەپنۆ. مشۊم پەدەکە دەموودەس جە بارەو چارەنوویس و سلێمان ئەحمەڎیوە ئەرەیاۋنای بڎۆ و دەموودەس هامڕا و هامپیشەما ئازاڎ بکەرۆ. ۋەرپرسیاریی ژیۋای و سڵامەتی سلێمان ئەحمەڎی وزمێنە ئەستۆو پەدەکەی".

سەرکەردەیۆ نەتەوە یۆگێرتەکا

رۆژنیوز جە ٢٨و کانونوو یووەم و ٢٠٢٣ ێنە سەبارەڎ بە برفانای سلێمان ئەحمەڎیی سەردای نوێنەرایەتی نەتەوەیۊگێرتەکاش کەرد. جە داواکارییەکەنە ئامان کە پەیامنێروو رۆژنیوزی وەدات حسێن کە جە تەرەفوو پەدەکەیۆ بڕفانیابۍ، ٧ ساڵۍ چێوەڵتەر بە ئەشکەنجە کوشیا. سەرەڕاو ئانەی ٧ ساڵۍ سەروو کوشتەی و تیرۆرکەردەی رۆنامەوان وەدات حسێنیرە ۋییەردەن، بکوشەکۍ نەگیریێنۍ و نەلێنۍ ۋەروودەم و دادگای.

١٢و نیسانی کۆمیتەو ۋەرگیریی جە رۆنامەوانا (سی پی جەی) و کۆمیتەو مینای جە بارەو چارەنوویسوو سلێمان ئەحمەڎی کە جە تەرەفوو پەدەکەیۆ بڕفانیان، کۆمیتەو بێسەروشوێنکریایا نەتەوەیۊگێرتەکاشا سەرکەردۆ.

خەڵاتوو رەنجیشا پنەبەخشا

جەمەو ئەرەیاۋنای ئازاڎیی (یەرەئا) جە چوارچێوەو خەڵاتەکا گەشمەرڎە مەزڵوم باگۆکی پەی زەحمەتکێشای رۆنامەوانی کە ساڵانە بەش کریۆ، خەڵاتوو رەنج و زەحمەتکێشایش پێشکەش بە سلێمان ئەحمەڎیی کەرد کە ماوەو ٢٠٠ ڕووان جە تەرەفوو پەدەکەیۆ بڕفانیان. خەڵاتوو رەنجوو ئێساڵی بە بۆنەو ١٢٦ەمین ساڵیاڎوو رۆنامەگەری کوردیوە جە شاروو قامیشلۆو ۋەرنیشتی بە مەراسیمێوە بەشکریا و خەڵاتەکە یاوییا بە بنەیانەو سلێمان ئەحمەڎیی جە گەڕەکەو شێخ مەقسودی حەڵەبی.