هاوڕێ جەبار جە بارەو قڕکەرڎەی سەروو گەلوو کوردیۆ، قسېش پۍ ئاژانسوو فورات نیوز(ANF)ی کەرڎۍ و واتش: "گەلوو کوردی بە درێژایی تاریخی، چېروو ئەرەگیری هەرێمی و میان دەوڵەتینە بیەن، پەی ئینەیچ قوربانیۍ فرېش دېنۍ، وە ئا قڕکەردەیا زیاتەربیەن".

'قڕکەرڎەیەکا هەمەجۊرتەرۍ با'

جە درێژەو قسەکاشەنە واتش: "پاڵوو قڕکەرڎەی جەستەینە، قڕکەرڎەی کلتوریچ ملۊڕاوە، جە پانیشتوو کوردسانی ئا قڕکەرڎەیە بەشێوېوە فرە وەحشیانە ملۊڕاوە، جە ڕەهەندوو ئەخلاقی و چاند وشوناس و زۋانیوە، هجوم کریۆ سەروو تاکوو کوردی ، کە ئینەیچ ڕەنگش دانۆ جە زیهنیەت و ۋیرکەرڎەیۆ گلېرگەینە".

'دوژمن حۊڵوو دلېنەبەرڎەی ئا دەنگە ئازادا مڎۆ'

هاوڕێ جەبار، واتش: "موینمۍ ڕووانە تاکە ئازاڎیی وازەکۍ گەلوو کوردی، جە پانیشتەنە بە ئامانج گیریا، چ جە گەرمیان بۆ یا جە کوێسان، شارەنەبۆ یا دەگانە، دوژمن کەرۊشا ئامانج و حۊڵوو دلېنەبەرڎەی ئا دەنگە ئازاڎا مڎۆ. بەڵام سەلەمیان گەلوو کوردی پانیشا دلېنە مەشۆ، تەنیا دوژمن گەرەکشا چا ڕێوە ئیراڎەشا ماڕۆ، بەڵام ئا دەسکۊتۍ کە وەشۍ بیېنۍ، ئیسە هێز و ئیراڎېوە هەن کە پارېزنۊشا".

'ئیسە فکر و ئایدیێوە ڕابەرایەتی گەلوو کوردی کەرۆ'

هاوڕێ جەبار جە بەردەوامی قسەکاشەنە ئاماژەش پانەی کەرڎ کە جە ئیسەنە گەلوو کوردی پېسە سەڎەکاو ۋیەردەی نیا، کە گلېرگېوە بێ ئایدیا و بێ ڕابەر بۆ واتش: "ئیسە گەلوو کوردی جە ۋەرکەوتوو دلېڕاسەینە کارەکتەرێوە سەرەکییا، ئی هێز و ئیرادوەیچە، بە ڕابەرایەتی فکر و ئایدۆلۆجیاو ڕابەر ئۆجالانیا، حیچ هێز و وڵاتێوە بەبێ ئی فکر و ئایدۆلۆجیایە مەتاوۆ وەڵۍ گنۆ ".

'مۆدێلوو نەتەوەی دیموکراتی، جە واقیعەنە پراکتیزە کریۆ'

هاوڕێ جەبار، باسش جە سوریای و سیستموو ۋېڕاوەبەری ۋەرنیشتی کەردوو واتش: "وڵاتاو ئەوروپی و سیستموو سەرمایەداری کۆو ئا مۆدێل و سیستما کە گەرەکشانە جە ۋەرکەوتوو دلېڕاسەینە چەسپناش، تا ئیسە نەتاوانشا بە دەسش بارا. پۊکەی موینمۍ جە ۋەران ۋەروو ئانەینە مۆدێلوو نەتەوەی دیموکراتی (پارادایموو نەتەوەی دیموکرات)ی، کە گەلوو کوردی سەرمەشقایەتیش کەرۆ، وە ئانەیچ ئا مۆدێلەشە متەنەرە، ڕابەروو گەلوو کوردی عەبدوڵا ئۆجالانا، ئیسە ئا مۆدێلە جە عەرزوو واقعینە پراکتیزە کریۆ، وە سەرکۊتەیچ بیەن، موینمۍ گەلاو کورد و عەرەب و کلدان و ئاشوری دلۍ ئا مۆدێلەینە مژیوا و ئازاڎیی ۋېشا دلېشەنە مویناوە".