ۋەرنیشتوو زاپیەنە جەنگېوە پا جۆرە ئینا ئارانە، پېسە ئانەی پوختەو گرڎوو جەنگ و سەرهۊرداکا کوردسانی بۆ. ئا جەنگەی گەریلا کەرۊش، چۍ دژوو ئەرەگیری ڕاوەبەرش کەرۆ، هەنگامېوە قەراردارانەن پەی ئازاڎیی و پەشتێ بە میراتێوە بەسۆ. گرڎ هەنگامېوەش چانۍ وەڵتەریش بەقوەتتەر و پاگیرانەتەرەنە.                                                                 

سوپاو تورکی وەختۍ دیمەنوو هجومەکاش وەڵاکەرۊوە، بە فڕۆکەی جەنگی و فڕۆکەی سیخوڕی، بە تانک و گرڎوو تەکنەلۆجیاو ۋېشۆ پڕوپاگەندە کەرۆ. پا دیمەنا پاسە وێناش کەرۆ کە گوایە 'کەس مەتاوۆ ۋەران ۋەر بە من مرڎۆ'. ئینەیچ جە وەختېنە کە جە هجومە ئاسمانییەکا و هجومەکاش بە گازی کیمیاۋیی و تەقەمەنی قەڎەغەکریا جە حەفتەی ۋیەرڎەنە، زەرە ۋەروو تەنیا گەریلێوەیچ نەکەوت. بەپێچەوانۆ، گەریلا چېروو بۆردومانینە چالاکی و هەڵمەتێوە هجومکەرانەش ئەنجامدا. دەسشا گېرت سەروو چەکوو ئەرەگیرارە و دیمەنی جەنازەو ئەرەگیراشا تۆمارکەرڎ.

خاسا گەریلاکۍ پەکەکەی بە چېش جەنگ کەرا؟ ئێمە ئا پرسیارېما ئاراسەو یۆ چا گەریلایا کەرڎە کە بەشداریش جە هەڵمەتەو شۆڕشگێڵنینە جە هەرێموو ۋەرنیشتوو زاپی کەرڎەبۍ، ئاڎیچ وەڵۍ ئانەینە جوبما بڎۊوە کەلوپەل و دلۍ هەگبەکەیش نیشانەدایمۍ. کەلوپەلەکېش یۆیۆ نیشانەدانی و بە خوۆ واتش، "تفەنگېوە، مەخزەنێوە، ٥ نارنجۆکۍ، دەسکێشێوە، جە گرڎیچ گرنگتەر کامێرېوە کە سەروو تفەنگیۊ بەسیۆ. پۍ دلېنەبەرڎەو یەکینېوە سوپاو تورکی ئی کەلوپەلۍ زیاڎېچەنۍ، بەڵام جەنگ پینیشا مەکریۆ. پۍ دایوەنەو دوژمنی تەنیا چېوۍ کە پێویسمانە قەناعەتا. بەڵۍ فڕۆکەی سیخوڕی، فڕۆکەی جەنگی، تانک و سیستموو چەمڎاریشا هەنۍ. ژمارەیچشا فرە جە ئێمە زیاتەرا، بەڵام چېوی گرنگما هەن کە ئاڎۍ نیاشا. ئاڎېچ ئیراڎە، گیانبازی، پاگیری سەرو ئامانجەکاما. ئینېچ بە ماناو گیانبازی مەیا. تا ئا رۆحە فیداییەما بۆ، بە تفەنگېوە و چن نارنجۆکېوە ئێمە سەرکۊتەی بە دەس مارمۍ".

ئا چالاکیۍ دماو ئا قسا ئەنجام دریۍ، ئاماژەبېنۍ پۍ بەکردەوەیی کەرڎەو قسەکا. سەروازە تورکەکۍ سەرەڕاو قەڵغانەکاو ۋېپارېزنای و زرێکاشا پۍ دەیەقېوەیچ نەتاواشا سەنگەرەکاشا پارېزنا. وەختۍ یوۋەم گولۍ تەقا، پۍ ئانەی ۋېشا نەجات بڎا، پایۍ نیېنۍ یۊترینیرە، پایېشا نیۍ سەروو جەنازەکاشارە و بڕەمۍ. ئا دیمەنۍ کە جە لایەنوو گەریلاکاوە تۆمار کریېنۍ ئی حەقیقەتەو جەنگی وزا ڕووە، ئاڎیچ بریتیا چانەی کە پڕوپاگەندەو سوپاو تورکی پووچ و بۍ بنەمان. گەریلا بە ئیراڎە و توڕەیی تۆڵەئەسایۆ قەڵاکاو ئەرەگیری تەختوو زەمینی کەرا. پېسە ئا گەریلایە واتش، پۍ دلېنەبەرڎەو دوژمنی جە کەشەکاو کوردسانینە تەنیا چېوۍ کە پەنەوازش پنەشا، جە دڵ و جە مەژگەنە پراکتیکوو گەریلاینە نەخشیان.