مەحموڎ عوسمان: دەوڵەتوو تورکیای باوەڕیش بە چارەسەرکەردەی پرسوو کوردی نیا و دەوڵەتێوە تیرۆرستا
دمابەدماو زیاڎبیەی هجوومە ئەرەگیریەکا دەوڵەتوو تورکی سەروو پانیشتوو کوردسانی، کاروەدایەکۍ جە دژوو ئا هجووما، سەروو ئاستوو کەسایەتی سیاسی فرەتەر بیەن.
دەربار بە هجوومە ئەرەگیریەکا دەوڵەتوو ئەرەگیروو تورکی سەروو پانیشتوو کوردسانی، سەروو ئاستوو گلێرگەی و سیاسی هەڵوێس و کاروەدایش چنە کۊتۆ و گەل بە تەمامی دژوو ئا ئەرەگیریانە. هەر چا بارۆ سیاسەتمەداروو کوردی جە پانیشتوو کوردسانینە د.مەحمود عوسمان جە دیڎارێنە چنی ئاژانسوو ڕۆژ نیوزی ئاماژە پانەی کەرۆ؛ هجووم و ئەرەگیریەکۍ دەوڵەتوو تورکی پۍ سەروو خاکوو پانیشتوو کوردسانی دژوو یاسا میان دەوڵەتییەکان و ماچۆ: "هجوومە بەردەوامەکۍ دەوڵەتوو تورکیای ئانەی بەروزا کە ئی دەوڵەتە باوەڕیش بە چارەسەرکەردەی پرسوو گەلوو کوردی نییا، گۊش جە داواکا کوردی مەگێرا، پۊکاتی ڕووانە کورد بە ئامانج گیریۆ و کوشیۆ، جە وەختێنە گەلوو کوردی ۋەرگیری جە ۋێشا کەرا بە تیرۆست نامۍ بریا، بەڵام جە ڕاسینە دەوڵەتوو تورکیای تیرۆرستا، چونکی ڕووانە بە فڕۆکە بۆردومانوو گەلوو کوردی کەرۆ."
هجوومە ئەرەگیریەکۍ دەوڵەتوو تورکی یاگۍ قبوڵکەردەی نیەنۍ
مەحمود عوسمان جە درێژەو قسەکاشەنە باس چانەی کەرۆ پەرتەوازەیی و نەبیەی یەکڕیزی نەتەوەی نیا مەسڵەحەتوو گەلوو کوردینە، پەی دمایی ئاردەی پا هجوومە ئەرەگیریا دەوڵەتوو تورکی، داواو یەکڕیزی نەتەوەی کەرۆ و ماچۆ: "دەوڵەتوو تورکیای بە بەهانۍ بیەو پەکەکەی جە خاکوو کوردسانینە، ڕووانە کەسانی مەدەنی و دەگا و ڕەز و باخوو هامووڵاتییا بە ئامانج گێرۆ، ئینەیچ یاگۍ قبوڵکەردەی نییا، حەرپاسە نەبیەی یەکدەنگی لایەنە کوردییەکا زەرەرەش بە دۆسیە و گەلوو کوردی یاونان، چونکی نەبیەی یەکڕیزی ئینا مەسڵەحەتوو دووژمنانە."
