هامسەرۆکۊو گرڎی پارتو یەکسانی و دیموکراسی گەلا (دەم پارتی) تولای حاتەم ئۆغوللاریە بە شداری چالاکی شەرمەزارکەردەی دەسسەرەرەگېرتەی شارەوانی گەورە شارو وانیش کەرڎ، تولای حاتەم ئۆغوللاریە جە چالاکییەکەنە قسێش کەردۍ و ئاماژەش پانەی دا سزادای شارەوانییەکاشا حەقکەردەیۊن جە ئیرادەو گەلوو وانی، جە دژو ویستو دەسەڵاتداری شان بە شانو گەلوو وانی مرداوە و ئەوەکۊشایشا بەردەوام مکەرا.

جە بەردەوامیینە تولای حاتەم ئۆغوللاریە واتش: "جە ١٥و شوباتینە کە ئېژا ئۆجالانشا بە پیلانگێڵنیێوە ئارڎۊ پەی تورکیای، قەیومشا سەپنا سەرو ئیرادەو گەلوو وانیرە. پەی دیموکراسی حەرچی قوربانیێوە پەنەواز بۆ مڎاش، جە ئەوەکۊشایمانە بەردەوامۍ بیمۍ و پاڵپەشتی جە هامسەرۆکا شارەوانییەکاما مکەرمۍ. ئەوەکۊشای دیموکراسییما ۋەرفراوانتەر مکەرمۍ. جە دژو ڕژێمو پاوانوازی و کۆڵۆنیالی کە گەرەکشا چی وڵاتەنە سەپیۆنە، ئەوەکۊشای دیموکراسیانەما جە چوارچێوێوە ۋەرفراوانەنە نیشانە مڎەیمۍ."

تولای حاتەم ئۆغوللاریە: سەپنای قەیومی یاگۍ قبوڵکەردەی نییا

جە دما دمایی قسەکاشەنە تولای حاتەم ئۆغوللاریە ئاماژەش پانەی دا جە قۆناغێوەنە کە پرۆسەو دیالۆگی دەسش پنەکریان، بەحیچ جۊرۍ سەپنای قەیومی قبوڵ کریا نییا و بە تنی شەرمەزارش کەرڎ و واتش: "سەپنای قەیومی سەرو شارەوانی وانیرە هەرمانێوە ئەنقەس و بە زانابیەین، چونکی جە ڕۆو پیلانگێڵنی مېیاننەتەوەیی سەرو ئێژا ئۆجالانیرە ئەنجام دریان."

بەدەپە: بە مەڵامەتو ئانەی هۊرچنیێنۍ، وزیا دلۍ گێرتەخانەکا

هەر جە چالاکییەکەنە هامسەرۆکۊو گرڎی پارتو هەرێمە دیموکراتیکەکا (دەبەپە)ی چیدەم کلچگون ئوچارە قسێش کەردۍ و ئاماژەش پانەی دا مەڵامەتو گېرتەی هامسەرۆکا شارەوانییەکاشا تەنیا ۋەرو ئانەین هۊرچنیۍ ئیرادەو گەلینۍ و پا مەڵامەتۆ وزیا زینان. ئوچارە ئاماژەش پانەی دا تاریخ سەلەمنانش حەجگیز ئیرادەو گەلوو وانی ۋەردەمو ستەمو دەسەڵاتدارینە چۆکش نەڎانەرە.

ئوچارە جە دێژەو قسەکاشەنە دەسنیشانش کەرڎ سەپنای قەیومی هرووژما سەرو ئا پرۆسەیەیی کە ڕابەر ئاپۆ دەسشپنەکەرڎەن.

مڎرامانەکە سات بە سات ۋەرفراوانتەر بۆ. پۆلیس جە دژو گەلی چەک بەکارمارۆ. بە پاو زانیارییە بە دەسئامایەکا؛ نزیکەو ١٠ هەزار پۆلیسا تەوقەو شارەکەیشا دان.