باقرخان: گەلوو وانی ساحیبۍ ئێگەینۍ، شمە ملدۍ
هامسەرۆکو گرڎیی دەم پارتی تونجەر باقرخان جە چالاکی شەرمەزارکەردەی دەسسەرەرەگێرتەی ئیرادەو گەلوو وانینە، واتش: " گەلوو وانی ساحیبۍ ئێگەینۍ، شمە ملدۍ، قەیومی دز و گەندەڵ ملا".
ناڕەزایەتییەکۍ دژو دەسسەرەرەگېرتەی شارەوانی وانی و نیایرەو قەیومی، سەرەڕاو تنوتیژی و فشارو پۆلیسی جە وان بەردەواما.
ڕاپیماو ئارۊی ۋەردەمو بیناو دەبەپەینە دەسش پنە کەرڎ و تا جاڎەو جمهورییەتی بەردەوام بۍ.
هامسەرۆکاو گرڎیی دەم پارتی تونجەر باقرخان و تولای حاتەم ئۆغۆللاریە و هامسەرۆکۊو گرڎینەو دەبەپەی چیدەم کلیچگون ئوچارە، هەرپاسە ژمارێوە فرە جە سەرۆک و ئەنداما پارت و ڕێکوزیاکا بەشدارۍ بێنۍ.
مەردمی ئاماڎەبیۍ بە چەپڵۍ و درووشمۍ پەشتگیری چالاکاشا کەرڎ.
پۆلیس ڕاش نەڎا گەل و هامسەرۆکا بیاوا بەیۆی و کوۍ باوە، گەل دژو ئینەی ناڕەزایش نیشانەدا، پۆلیس هرووژمش کەرڎ سەرو چالاکا و چڼین کەسێشا باڵبەسۍ کەرڎۍ.
تونجەر باقرخان هرووژمو پۆلیسیش شەرمەزار کەرڎ و ئەرەیاۋناش جە فرەو شارەکاوە پۆلیسێشا ئارڎێنۍ پەی وانی، واتش: "مەگەر وان شارێوە تورکیای نییا؟ ئەر ئینە نامۍ ئەرەگیری نەبۆ، ئەی چێشا؟".
باقرخان ئەرەیاۋناش مشۊم دەسەڵات دەس چی سیاسەتەیە هۊرگېرۆ، بە نیایرەو قەیومی و دەسسەرەرەگێرتەی ئیرادەی نمەتاوا گەلوو کوردی مردنا، گەلوو وانی حەجگیز ڕا بە نادادی و ناهەقی نمەڎا، واتش: "وان شکس نمارۆ و نمەمردۆ و حەجگیز قەیومی دزی قبووڵ نمەکەرۆ. ئا قەیوم و پۆلیسۍ جە دیلۆک و گوموشانە و قەرس و ئەردەهانیوە ئامێنۍ پەی وۍ، چێوۍ کاتییا، ئاڎۍ مشۊم بلا. بەڵام گەلی شکۆمەندو وانی کە هەزاران ساڵۍ چۍ مژیوا، ساحیبۍ ئێگەینۍ. شمە ملدۍ، قەیومی دز و گەندەڵ ملا".
