ڕۊنامەنویس خالید ئەرمیش، سەروو کەسایەتیی گەشمەرڎە کاروان هۊرامی واتش: "کەسایەتییێوە زەحمەتکێش بۍ ئامانجش ئانە بۍ گلێرگەی جە ڕاسییەکا هاگادار کەرۊوە. پێسە کەسێوە هەورامییچ گەرەکش بۍ دەنگوو گلێرگەکەیش بیاونۊ گرد یاگێوە".
خالید ئەرمیش پەی ماوێوە چەنی گەشمەرڎە کاروان هۊرامی هەرمانەش کەرڎێنە و یۊترینشا ئشناسان، سەروو کەسایەتییش کەسایەتی و خەباتیش هەرمانۍ ڕۊنامەوانێیاو گەشمەرڎە کاروانی پەیما دوا.
شمە کەی و چەنی یۊترینتا ئشناسا؟
ئێمە ساڵەو ٢٠١٥ینە یۊترینما ئشناسا. زیاتەر جە ٢ ساڵا پێوە هەرمانەما کەرڎە. من ئا وەختە پانیشتووکوردسانینە هەرمانە پەی ئاژانسوو هەواڵوو فورات (ANF) کەرێنا. هامڕا کاروانیچ جە بەشوو فارسیی ئاژانسەکەینە هەرمانە کەرۍ.
گەشمەرڎە کاروان کەسایەتییوە چەنینش بۍ هەرمان و کارنە؟
گەرەکما ئەوەلۊ ئانەی واچوو، کە گەشمەرڎە کاروان حەرگیز جە ژیوایمنە پێسە هامڕێوە ویرم مەشۊوە، کەسایەتیێوە خاکی وفرە پاکش بۍ، هەرمانەکاش بە بەرنامە و دیسپلین بەرۍ ڕاو.
بە پەیلواو من، گەشمەرڎە کاروان زەحمەتکێشێوە بۍ، کە حەرگیز باسوو ڕەنج و مانیی وێش نەکەرۍ، بە ڕەنج و مانیای وێش جە ئاژانسەکەنە وەڵۍ وەڵێوە بۍ. بە تەنیا وێش بەشیوە ئاژانسەکەی بەرۍ ڕاوە. هەوالەکا ورگێڵنۍ. هەواڵۍ وەش کەرۍ و سەرنویسەرییچ کەرۍ. بەرڎەوام چەمداریی بابەتەکاو ڕۊیچ کەرۍ، جگە ئانەیە وێچش بابەتۍ و هەواڵۍ و شیکاری و ڕاپۊرتۍ نویسۍ. ئامانجش ئانەبۍ گلێرگە بیاوۊ بە ڕاسییەکا، پێسە هەورامییوە گەرەکش بۍ دەنگوو گلێرگەکەیش بە گرد یاگیوە بیاونۊ.
گەشمەرڎە کاروان پێسە جەنگاوەرێوە، شۊڕشگێڵنێوە و ڕۊژنامەنویسێوە هەرمانە کەرۍ، ئینە چێشش بە کەسایەتییەکەیس زیاد کەرڎەبێ؟
گەشمەرڎە کاروان پیمەرۍ و ئامانجێش بێنۍ.ئامانجۍ کەسیێش نەبێنۍ. وەررو ئانەی من واتەنم داراو رينجیوە شاریاوەی و بێدەبنگی بۍ، شۊنەو نامۍ و شۊرەتیوە نەبۍ. گرنگتەرین چێو پەی ئادی پرەنسیپۍ و ئامانجەکیش بێنۍ. پەی یەک جاریچ نەدیم حسابی کەسی پەی وێش کەرۊ. هەر هەواڵی بیۍ زوو وانیشۊ و پانەیە دڵوەش بۍ، کە هەواڵ و زانیاریێوە تازە پەی گەلەکەیش وانۊوە، چون ئانەی بە هەرمانەو وێش زانۍ وەرانوەروو گەلەکەیشۊ.
هیچ حساباتێوە کەسی و تایبەتی لاو گەشمەرڎە کاروانیوە نەبۍ. سەرەڕاو خاسنەبییەی تەنیش، هیچ ڕوۍ ناستش تەندرووسییش بۊ بە قۊرت پەی هەرمانەکێش، فرەو جارا نیمەشەونە هەرمانە کەرۍ، گەرەکش بۍ هەرمانەش جە هینەو گرد کەسیوە خاستەرە بۊ، هەستوو وەڵیویناییش فرە خاس بۍ، ڕۊنامەنویس و هەم شۊڕشگێڵن بۍ، ڕۊنامەنویسی و شۊڕشگێلنییش کەرڎێبێنێوە بە یۊ تا فرەتەر هەرمانەش کەرڎۍ بە کەمش زانۍ، و حەوڵۍ زیدتەرۍ. ئامنجش ئازادیی گەلوو کورڎی بۍ، پەی ئانەیچ ئامانجە ڕۊنامەنویسییەکەیش وزۍ خزمەتوو ئامانجە شۊڕشگێڵنییەکەیشۊ بە مەراموو ئازادیی گەلوو کورڎی. . ئانۍ نزیکۊ ئشناسێنێش هەست بە ئامانج هەڵوێست و تایبەتمەندیی گەشمەرڎە کاروانی کەرێنۍ.
ئا تایبەتمەندیۍ، کە فرەتەر بەرگنێنۍ دلێشنە و هەستشا پەنە کریۍ چێشۍ بێنۍ، ؟
تایبەتمەندییە سەرەکییەکێش خاکیبییەی ڕێزگێرتەی تەوازوع بۍ. ئی پرسیارۍ حەرکەسی کریۊ کە هامڕا کاروانی ئشناسی هەمان جوابی مدۊوە .
دەورش ئەرەیاونای ئازادنە چەنین بۍ، وەختۍ پێوەرە بێندێ؟
گەشمەرڎە کاروان دوەرۍ فرەش ئەرەیاونای ئازادنە گێڵنا. بدیەیدۍ سەرنیشت، پانیشت، وەرنیشتنە چندین ڕۊنامەنویسۍ هەنۍ. ڕۊنامەنویسی ئازاد چاگە بییەن ساحیبوو ڕاو وێش، وەلۍ وەرکەوتنە هەڵای پێسە بەشەکای تەروو کوردسانی نییا، پەی ئینەیچە، گەشمەرڎە کاروان دەورۍ خاسش گێڵنا، بەتایبەتی پەی وەرکەوتوو کوردسانی. بێگومان نەمەنەیش هاڵیگاێۍ فرە وەش کەرۊ و بەئاسانی یاگەکێش پەڕە مەبۊوە.
س.ز
