نۆدشەیەکێ جە نامێوەنە داواکارێنێ، "تا شارەداری واز جە ئا باج و خەراجە قورسەیە باوەرۆنە کە وستەنش سەرو هامشارییەکان کە وازیارێنێ سود جە لولەکێشی گازی سروشتی هۆربگێرانێ، بەڵام نونگەو باج و خەراجەکەی جە گازەکەی بێبەشێ بیێنێ.
شارو نۆدشە-ی سەر بە هەرێمو هەورامانی ناوچێوی کویسانی و سەردسێرەن و بە تایبەتی جە وەرزەکێ پایزی و زمسانیەنە هاموڵاتیەکێش پەنەوازی فرەشان بە سۆتەمەنی هەن. هەر پۆکەی پەی دەستەبەرکەدەی سۆتەمەنیەکەی داواشان جە کاربەدەستانو ئێانی کەردەبێ تا چوون شارێ و ناوچەکێ تەرێ ئێرانی جەڕاو لولێوە گازی سروشتی بیاونیۆنە شارەکەشان. دەرەنام جە دمای چەمەڕایێوی فرەی، جە دیسەمبەرو ساڵە 2020یەنە لولەکێشی گازی سروشتی یاوابێ شارەکە و ئانەیچە نۆدشەیەکێش شادمانێ کەردێ بێنێ. بەڵام ئا شادمانییە فرەش نەخاینا و شارەداری شاری باج و خەراجی فرە و قورش وست سەرو ئا هاموڵاتیا کە وازیارێ یاوای گازی سروشتی جەڕاو لولێوە پەی یانێ و دوکانەکانشان بێنێ.
ئانەیچە پاسەش کەردەن، تا فرەتەرین هاموڵاتیێ بە تایبەتی ئانێشان کە کەم دەرامەتێ و هەژارێنێ نەتاوانە هامبەشی لولەکێشی گازی بکەرانێ و بە ئی زمسانە سەخت و سەردە جە گازی بێبەشێ ببانێ.
جە ئی چوارچوەنە، ژمارێوی فرێ هامشاریێ نۆدشەی نامێوەشان پەی کاربەدەستانو شاەردای و بەخشداری نۆدشەی، فەرمانداری و شارەوانی شارستانو پاوەی، ئوستانداری و شارەوانیەکێ کرماشانی، نمایندەو هەوراماناتی جە پارلەمان و هەرمانگەو گازی کیاستێنە. جە نامەکێنە گلەیی جە شارەداری نۆدشەی و کاربەدەستێ ئێرانی مەکەرانێ؛ وەرو ئا باج و خەراجە قورسەیە کە وستەنشان سەرو بەشداری و سودمەندبییەی جە لولەکێشی گازی سروشتی. چونکە بەهۆکارو ئا باج و خەراجەیە ژمارێوی فرێ جە نودشیەکان توانایی بەشداریکەردەی جە لولەکێشی گازەکەیشان نییەن. بە وەرچەمگێرتەی کەمی دەرامەتی و هەژاری جە شارەکەشانە، نۆدشەیەکێ وازیارێنێ شارەداری واز جە ئا باج و خەراجە قورسەیە باوەرۆنە و ئاسانکاریشان پەی بکەرۆنە تا جە ئی سەردا و سهۆڵبەندانەنە جە گازی سروشتی سودمەندێ ببانێ.
