ناوەندو چاندو وەرکەوتو کوردستانی (نەچەرە) و تەڤ-چاند دژو بڕیەوە سزاو قەنارەدایی ئێراننە سەرو  هونەرمەند تۆماج ساڵحیرە ئەرەیاوناێوی هامبەششا وەڵا کەردۆ.  

دلێشنە ئامان؛ پێسە تەڤ-چاندی و نەچەرەی سزاو قەنارەدایی هونەرمەند توماج ساڵحی، کە ماوێوا زیندانی کریان شەرمەزارە مکەرمێ، داوا جە ڕێکوزیایە میاننەتەوەییەکا و گلێرگەی میاننەتەوەیی مکەرمێ دەنگو ناڕازیبییەی بەرز بکەرانێوە.

دەوڵەتو ئێرانی جە بێدەنگیی گلێرگەی میاننەتەوەیی و ڕێکوزیایەکاو مافو ئینسانیوە ئیسفادە مکەرۆ

درێژەو ئەرەیاونایەکەیەنە ئامان: "خەیلێ هونەرمەند، ڕۆشنویر، چالاکێ و کەسێ نامدارێ دەوڵەتو ئێرانی گێرتێنێ و کوشتێنێش. دژوو ئی هەرمانا بەرۆ و دلێ ئێرانینە گەل  وەراوەرو زۆرداری و ئی فشارانە مدرانۆ. تۆماج ساڵحی هونەرمەندی گەنجو بەختیاری، پێسەو سیمبوڵو ناڕازیبییەی بەرکەوت و بی بە هێز پەی گەنجا. دەوڵەتو ئێرانی گێرت و ئیسەتێ سزاو قەنارەدایش پەی بڕیێنۆ. پێسە تەڤ-چاندی و نەچەرەی داوا جە گرد لایەنێو، ئەرەمەرزیای سیاسی، چڤاکی و چاندی مکەرمێ با دەنگشا بیاونا بە گرد یاگێو تا سزاو قەنارەدای تۆماج ساڵحی بەتاڵە بکریۆوە. چونکوم  گەر ئی سزێ بیاونیۆ یاگێ، ئیتر هونەرمەند سامان یاسین و چندێ تەرێ مدریانێ قەنارە. ڕۆشنا کە دەوڵەتو ئێرانی جە بێدەنگیی گلێرگەی میاننەتەوەیی و ڕێکوزیایەکاو مافو ئینسانی ئیسفادە مکەرا."