فەرماندەیی قەرارگەو ناوەندوو پارێزنای گەلی (نەپەگە) ئەرەیاوناێنە ئاماروو جەنگوو ساڵێوەش جە هەرێمەکاو پارێزنای میدیاینە، یانۍ جە ١٤وو نیسانوو ٢٠٢٢ تا ١٤و نیسانوو ٢٠٢٣ ئاشکرا کەرد.

ئەرەیاوناکەو نەپەگەی پێسنەن:

" ئاماروو جەنگوو ساڵێوە هەرێمەکاو پارێزنای میدیای

پەی گەلەکەیما و  ڕای گرڎینی!

ڕژێموو فاشیستوو ئاکەپە و مەهەپەی، کە جە ساڵەو ٢٠١٥ینە، زاناش جە لایەنی سیاسیوە شکسش ئارڎەن و مەتاوۊ دەسەڵاتنە مەنۊوە، قەرارش دا بە جەنگکەرڎەی مەنۊوە. سەروو ئا بناغەیۊ ئەوەڵۊ گەلوو کوردی تەڤگەروو ئازاڎیی کورڎسانی و گرڎوو بەشەکاو تورکیای، کە لایەنگیرۍ فاشیزمی نیەنۍ، بیۍ بە ئامانجوو ڕژێموو فاشیستوو ئاکەپە و مەهەپەی، هجوومی گەورە وەراوەرشا کریا. ئی جەنگە کە بە ئەشکەنجەی دەروونی و گۊشەگیری ڕەهاو سەروو ڕابەر ئاپۊی جە ئیمڕالینە دەسش پەنە کەرد، هەنگام بەهەنگام وەراوەرو گرڎوو بەشەکاو گلێرگەیۊ بریۍ ڕاوە. وەلۍ ڕژێمی فاشیست حەرچند هجوومش کەرڎەبۊ، مەتاوۊ هەڵوێسوو مڎرامانوو ڕابەر ئاپۊی، گەلوو کوردی، دۊسا و تەڤگەروو ئازاڎیی کورڎسانی ماڕۊ و مەتاوۊ بیاوۊ بە ئامانجەکاش.

ڕژێموو فاشیستوو ئاکەپە و مەهەپەی، گرڎوو قووە و وێش بەکار مارۊ و بە پەشتگیریی هێزە هەژموونوازە میاندەوڵەتییەکا و خەتەو هامکاریی کوردی، بە هەنگامێوە تازۍ جە دژوو هەرێمەکاو پارێزنای میدیای دەسشا بە هجوومێوە ئەرەگیری کەرد. جە وەراوەروو ئا هجوومانە، کە ٢٤وو نیسانوو ٢٠٢١ بەقورسی جە ئاڤاشین، زاپ و مەتینانە کریۍ، گەریلاکاو ئازاڎیی کورڎسانی بە مڎرامانێوە تاریخی جەنگشا کەرد، ناستشا ڕژێموو ئاکەپە و مەهەپەی بیاوۊ بە ئامانجەکەیش. ڕژێمی فاشیست گەرەکش بۍ بە داگیرکەرڎەی هەرێمەکاو پارێزنای میدیای، تەڤگەروو ئازاڎیی کورڎسانی لاواز کەرۊ و پانیشتوو کورڎسانی، شەنگال و وەرنیشتوو کورڎسانی داگیرۍ کەرۊ و بە داگیرکەرڎەی هەرێمە تازەکا، حدوودەکاو میساقی میللیی تەمام کەرۊ و پێسە درێژە بە دەسەڵاتەکەیش بڎۊ. بەڵام نەتاواش ساڵەو ٢٠٢١ ئامانجەکەیش بارۊ دی. ڕژێم وەروو ئانەی تاوۊ جەنگی تایبەت جە ساڵەو ٢٠٢٢ێنە سەروو بناغەو هەمان پلانینە بیاونۊ ئامانج، دژوو گەریلاکاو ئازاڎیی کورڎسانی چەکی کیمیایی و بۊمبی قەدەغەکریاشا بەکار ئارد و گەرەکش بۍ پلانەکاش بارۊ یاگۍ. ڕژێمی فاشیست وەروو ئانەی بێدەنگی جە وەراوەروو ئا تاوانانە نیشانە دریۊ، پەشتگیریی ئاشکراش جە گڵادیۊی و ناتۊی و هێزە خائینە نۊکەرە هەرێمییەکا ور گێرت. سەروو ئی بنەمێوە جە ١٤و نیسانوو ٢٠٢٢ێنە هجوومی فراوانی عاسمانی، جە ١٧و نیسانوو ٢٠٢٢ێنە جە زەمینۊ، حەرپاسە بە نیایرەی سەروازا جە ڕاو ئاسمانیوە جە زاپ، ئاڤاشین و مەتینانە، دەسش بە هجوومی ئەرەگیرانە کەرد. ئا هجوومە ئەرەگیرییە پلانەکێش ئانۍ بۍ جە ماوەو چند حەفتێوەنە ئەنجام بەدەس بارۊ، تەکنیکی جەنگی وەڵیکەوتە و بۊردومانی قورس بەکار ئامۍ. وەلێم گەریلاکاو ئازاڎی جە ساڵەو ٢٠٢٢ێنە بە ڕۊح و ئیرادەی فیدایی ئاپۊییوە جە زاپ، ئاڤاشین و مەتینانە مڎرامانێوە گەورەشا نیشانە دا، دژوو هجوومەکاو دژوو ئینسانیەتی و تاوانەکاو جەنگی، سەنگەرۍ و بییەی وێشا پارێزنا، ڕاگێریشا جە ئەرەگیریی کەرد و ڕاشا نەدا دوژمن سەر گنۊ. جە ئەنجامنە سوپاو تورکی جە ئاخیروو ساڵەو ٢٠٢٢ێنە ناچار بی،  دەس جە بڕێوە مەنتێقا ورگێرۊ و کێشیۊوە.

ئی پڕۊسەو جەنگی و هجووموو جبەروو ئینسانیەتی، بە قسۍ تەیب ئەرڎۊغان و دەوڵەت باخچەلی دەسشا پەنە کەرد، وەروو ئانەی فرەتەر سەروو دەسەڵاتیوە مەناوە. چی جەنگنە گرڎوو دۊڵەمەنداو گەلاو تورکیای و دەوڵەتی بەکار ئامۍ. ڕژێمی فاشیست لەسەروو ونەو خەڵکیوە گەرەکش بۍ بەرژەوەندیی سیاسی بەدەست بارۊ، حەوڵێش دۍ هەمیشەییکەرڎەی دەسەڵاتەکەیش پێسە هەمیشەییکەرڎەی تورکیای نیشانە بڎۊ، و فشار وزۊ سەروو گرڎکەسی تا پەشتگیرییش کەرا. وەلێم سیاسەتوو جەنگی قێزەونوو ڕژێمی فاشیستی ڕۊ بەڕۊ زیاڎتەر تەشهیر بی، تاوانەکێش دژوو ئینسانیەتی تۊمارۍ کریۍ و ئاشكرۍ بیۍ، کە ئی دۊخەو تورکیای بەرەو کارەسات بەرۊ یاونۊش دۊخوو ورشانایۊ ئی دەسەڵاتە فاشیستەیە. بە دەسپەنەکەرڎەی پڕۊسەو ورچنیەی، زیاڎتەر ئاشکرا بی کە وەرپەرسی و کرڎەوەکاو جەنگی تایبەتی "تەیب ئەرڎۊغان و دەوڵەت باخچەلی، خولوسی ئاکار و سولەیمان سۊیلۊ" کە شێفۍ جەنگی تایبەتینۍ، بە مەبەسوو دەستکەوتی سیاسی ئی جەنگەشا ور گیسنا، بە متەی ونەو گەریلای و سەروازا حەوڵێشا دۍ سەروو دەسەڵاتیوە مەناوە و مسڵەحەتەکاشا مسۊگەرۍ کەرا، دماو ئانەی کە سەرۍ نەکەوتۍ  و ئیسەیچ  ئینۍ جە خەموو ڕزگارکەرڎەی وێشانە. ئیسە گرڎ کەسێوە چی ڕژێمە فاشیستەیە بێزار بییەن و پەشتگیرەکێچش کەمۍ بیێنێوە.

٢٥٩ گەریلۍ گەشمەرڎۍ بیێ

بێگومان خوڵقنای ئەنجامۍ  تاریخیی چینە، مردنای هجوومی ئەرەگیری، مڎرامان وەراوەروو ئەرەگیراوە بە چەکی کیمایی و بۊمبی قەدەغەکریا ئاسان نییا. گەریلاکاو ئازاڎیی کورڎسانی کە بە ڕۊشنایی یاواینەی فەلسەفەی ئاپۊیی بیۍ بە داراو ئیرادێوە بەقووەتی و ڕۊحوو فیداکاری، جە وەراوەروو هجوومەکانە جە ساڵەکاو ٢٠٢١ و ٢٠٢٢ سەروو خەتەو قارەمانیوە مڎرامانشا کەرد. بە ئامای زمسانی سوپای ئەرەگیرە هجوومەکێش تا ڕاددێوە کەمۍ کەرڎێوە و بەناچاری بڕۍ یاگانە کێشیاوە، ئیسەنە جەنگ بڕۍ مەنتێقاو وەرکەوت و وەرنیشتوو زاپینە درێژەش هەن. جە پڕۊسەو جەنگوو ساڵێوەنە جە هەرێمەکاو پارێزنای میدیاینە، ٢٥٩ هامڕێما گەشمەرڎۍ بیێنۍ. ٢٨٣٣ داگیرکەرێچ سزا دریێنۍ، ٣٨٧ داگیرکەرۍ بریندارۍ بیێنۍ. هەرێمەکاو پارێزنای میدیا، بە تانک، ئۊبۊس و چەکی قورس بە هەزاران جارۍ تۊپوارانۍ کریێنۍ. ٤٢٣٣ جارۍ بە تەیارەی جەنگی و ٥٦٢٨ جارۍ بە هەلیکۊپتەری جەنگی هەرێمەکۍ بۊردومانۍ کریێنۍ. سەنگەرەکاو مڎرامانیما ٨٧٣٠ جارۍ بە بۊمبی قەدەغەکریا و چەکی کیمیاوی بۊردومانۍ کریێنۍ، ڕژێموو ئاکەپە و مەهەپەی فاشیستی تاوانی گەورەو دژە ئینسانییش کەرڎەن. ئاماروو جەنگوو ساڵێوە کە جە ١٤و نیسانوو ٢٠٢٢ دەسش پەنە کەرد و چەنی ئانەی تەڤگەرەکەیچما بێچالاکییچش ئەرەیاونان، جە دووە مانگی ویەرڎەنە، پێسنەن:

هجووموو سوپاو دەوڵەتوو تورکی

هجووم جە ڕاو بۊمبی قەدەغەکریای و چەکی کیمیاوی: ٣٧٣٠

هجووموو تەیرە جەنگییەکا: ٤٢٣٣

هجووموو هەلیکۊپتەرە جەنگییەکا: ٥٦٢٨

کوشیایەکاو دوژمنی

ژمارەو ئا ئەرەگیرا، کە سزا دریێنێ: ٢٨٣٣

ژمارەو بریندارەکاو دوژمنی: ٣٨٧

س.ز