ئەنجوومەنو مافەکا مرۆڤو نەتەوە یۆگێرتەکا داواش جە ۋەرپەرسا تورکیای کەرد دمایی بە پاشلکارییە نایاساییکاش بارۊنە و ئەرەیاۋناش: "ئا کەسۍ بە مەڵامەتو بەکارئاوردەی مافە ڕەواکا ۋێشا زینانیۍ کریێنۍ، مشۊم دەمودەس ئازاڎۍ بکریا."
ئەنجوومەنو مافەکا مرۆڤو نەتەوە یۆگێرتەکا (NY) سەبارەت بە دەسوەردای پۆلیسی جە چالاکییەکاو شەرمەزارکەردەینە جە ۋەرا ۋەرو زینانی کەردەی سەرۆک شارەوانی گۊرە شارو ئەستەنبوڵی ئەکرەم ئیمام ئۆغلۆی و گیریایەکا تەرینە ئەرەیاۋنێوەش وەڵا کەرڎۆ. واتەواچەو کۆمیسەرەو باڵاو ئەنجوومەنو مافەکا مرۆڤو نەتەوە یۆگێرتەکا لیز ترۆسێڵە ئەرەیاۋنێوەش دا.
جە ئەرەیاۋناکەینە ناڕەزایۍ تنش جە ۋەرا ۋەرو گېرتەی ۋەرو پاشێلکاریەکا پۆلیسینە نیشانەدا و داواش کەردە ئا کەسۍ زینانیۍ کریێنۍ دەمودەس ئازاڎۍ بکریا.
جە ئەرەیاۋناکەینە وچیا: "سەرۆک شارەوانی ئەستەنبوڵی ئەکرەم ئیمام ئۆغلۆ بە ڕێوە دیموکراتیک هۊرچنیان ڕووبەڕوو تاوانبارکەردەی بۆوە، جە ئەرکەکەیش دوور وزیاوە، لاو کەمیۆ ٩٢ کەسۍ جە حەفتەی ۋېیەردەنە باڵبەسۍ کریێنۍ."
جە بەردەوامی ئەرەیاۋناکەینە وچیان: "باڵبەسکەردەی جە وڵاتەکەنە بیەن بە مەڵامەتوو ۋێنیشاندای و ئی ۋێنیشاندایۍ جە یەرۍ شارانە بە قەڎەغەو ئاماو لوای گرڎیی نایاسایی پیادە کریان. جە ۋێنیشاندایەکانە لاو کەمیۆ ٩ کۊششکارۍ میدیایۍ باڵبەسۍ کریێنۍ.
ئا کەسۍ ۋەرو بەرکارئاوردەی مافەکا ۋێشا بە شێوێوە ڕەوا و ئاسایی، باڵبەسۍ کریێنۍ، مشۊم دەمودەس و بێ مەرج ئازاڎۍ بکریا."
جە ئەرەیاۋناکەینە داوا جە ۋەرپەرسا کریان بە پاو یاسایی مېیاننەتەوەیی، مافەکا ئازادی گلېرۊبیەی و ئازاڎیی ڕابەربڕیەی مامەڵە بکەرا.
